Jeremias 3 FHB Father's Heart Bible™

3 ¹Nagasiling sila: Kon bulagan sang isa ka lalaki ang iya asawa kag maghalin sia sa iya kag magpamana sa iban nga lalaki, magabalik pa bala sia liwat sa iya? Indi bala nga mahigkoan gid ina nga duta? Nagpakighilawas ka sa madamo nga mga hinigugma— apang magabalik ka pa bala sa akon? nagasiling ang imo Amay.

²Bayawa ang imo mga mata sa mahawan nga mga bukid kag tan-awa: diin ka wala pagdagtai? Sa mga higad sang dalan nagpungko ka nga nagahulat sang mga hinigugma, subong sang isa ka manuglakat sa kamingawan. Ginhigkoan mo ang duta sang imo pagpakighilawas kag sang imo pagkamalaut. ³Gani ginpunggan ang mga talithi, kag ang ulan sa tigpamulak wala mag-abut. Apang may dagway ka nga walay huya subong sang isa ka makihilawason nga babayi; nagadumili ka sa pagpakahuya. ⁴Indi bala karon lang nga nagtawag ka sa akon, “Akon Amay, ikaw ang abyan sang akon pagkapamatan-on”? ⁵“Magapabilin bala sia nga akig sa gihapon? Taguon bala niya ang iya kaakig tubtob sa katapusan?” Amo ini ang imo ginahambal, apang ginahimo mo ang tanan nga kalautan nga sarang mo mahimo.

Duha ka Magbugto nga Babayi nga Naglimot sang Ila Amay

⁶Nagsiling sa akon ang aton Amay sang mga adlaw ni Hari Josias: “Nakita mo bala ang ginhimo sang indi matutom nga Israel? Nagtaklad sia sa tagsa ka mataas nga bukid, sa idalom sang tagsa ka malabong nga kahoy, kag nagpakighilawas sia didto. ⁷Naghunahuna ako nga pagkatapos niya himoa ini tanan magabalik sia sa akon, apang wala sia magbalik, kag nakita ini sang iya maluibon nga utod nga si Juda. ⁸Nakita niya nga tungud sa tanan nga pagpanglahi sang indi matutom nga Israel ginpalayas ko sia kag ginhatagan sia sang kasulatan sang pagbulagay. Apang ang iya maluibon nga utod nga si Juda wala mahadlok; naglakat man sia kag nagpakighilawas. ⁹Tungud kay wala niya ginsapak ang iya pagpakighilawas, ginhigkoan niya ang duta, nga nagapanglahi sa mga bato kag mga kahoy. ¹⁰Walay sapayan sini, ang iya indi matutom nga utod nga si Juda wala magbalik sa akon sa bug-os niya nga tagipusoon, kondi sa pagpakuno-kuno lamang, nagasiling ang imo Amay.”

¹¹Nagsiling sa akon ang aton Amay: Ang indi matutom nga Israel labi pa nga matarung sang sa maluibon nga Juda.

¹²Lakat ka kag ibantala sa aminhan: Magbalik ka, indi matutom nga Israel, nagasiling ang imo Amay. Indi ko ikaw pagtulokon nga may kaakig, kay maloloy-on ako, nagasiling ang imo Amay; indi ako magpabilin nga akig sa gihapon. ¹³Kilalaha lamang ang imo kasal-anan— nga nagribok ka batok sa imo Amay, nga ginhatag mo sing bugana ang imo mga pabor sa mga dumuloong sa idalom sang tagsa ka malabong nga kahoy, kag wala magtuman sa akon tingog, nagasiling ang imo Amay. ¹⁴Magbalik kamo, kamo nga indi matutom nga mga anak, nagasiling ang inyo Amay, kay ako ang inyo bana. Kuhaon ko kamo—isa halin sa isa ka siudad kag duha halin sa isa ka panimalay— kag dalhon ko kamo sa Sion. ¹⁵Niyan hatagan ko kamo sang mga manugbantay nga suno sa akon tagipusoon, nga magapakaon sa inyo sang ihibalo kag paghangup.

¹⁶Kon magdamo na kamo kag magtubo sa duta, sa sadto nga mga adlaw, nagasiling ang inyo Amay, wala na sing magasiling liwat, “Ang kaban sang katipan sang aton Amay.” Indi na ini magsulod sa hunahuna, indi na madumduman, ukon kahidlawan, kag indi na maghimo sing iban.

¹⁷“Niyan pagatawgon nila ang Jerusalem nga Trono sang aton Amay, kag ang tanan nga mga pungsod magatipon didto sa pagpadungug sa ngalan sang aton Amay. Indi na sila magasunod sa ila matig-a kag malaut nga mga tagipusoon. ¹⁸Sa sadto nga mga adlaw ang panimalay ni Juda magaupod sa panimalay ni Israel, kag magakadto sila sing tingub halin sa duta sa aminhan padulong sa duta nga ginhatag ko sa inyo mga katigulangan subong palanublion. ¹⁹Ako mismo nagsiling, ‘Daw ano ka dako sang akon kalipay kon ibutang ko ikaw sa tunga sang akon mga anak kag hatagan ikaw sang matahum nga duta, ang labing matahum nga palanublion sang bisan ano nga pungsod!’ Kag naghunahuna ako nga tawgon mo ako nga ‘Akon Amay’ kag indi na gid magtalikod sa pagsunod sa akon. ²⁰Apang subong sang isa ka asawa nga indi matutom sa iya bana, amo man nga indi matutom ka sa akon, panimalay sang Israel, nagasiling ang imo Amay.

²¹May tingog nga nabatian sa mahawan nga mga bukid—ang paghibi kag pagpakiluoy sang mga anak sang Israel—kay ginpatiko nila ang ila dalanon kag ginkalimtan ang ila Amay.

²²“Magbalik kamo, kamo nga indi matutom nga mga anak; ayohon ko ang inyo pagkadimatutom.” “Yari kami, nagakari kami sa imo, kay ikaw ang amon Amay. ²³Sa pagkamatuud ang kagahud sa mga bukid kag mga kabukiran isa ka kabutigan; sa pagkamatuud yara sa amon Amay ang kaluwasan sang Israel. ²⁴Kutub sa amon pagkapamatan-on ginlamon sadtong makahuluya nga butang ang bunga sang pangabudlay sang amon mga katigulangan—ang ila mga panong kag mga kahayupan, ang ila mga anak nga lalaki kag mga anak nga babayi. ²⁵Maghigda kita sa aton kahuya, kag himoa nga ang aton pakahuya magtabon sa aton. Kay nakasala kami batok sa amon Amay—kami kag ang amon mga katigulangan—kutub sa amon pagkapamatan-on tubtob karon nga adlaw, kag wala kami magtuman sa tingog sang amon Amay.”