Hupti sing Malapit ang Kaalam
Isa ka amay nga nagatan-aw halin sa iya bintana nagasugid sang iya nakita. Isa ka pamatan-on nga lalaki nga wala sing alamag nagalakat padulong sa isa ka partikular nga balay sa pagkagab-i, ginsugata sang isa ka babayi nga nakaplano na kag nakahibalo nga wala ang iya bana. Nagsunod sia subong sang baka nga ginadala sa ihawan.
7 1Anak ko, tipigi ang akon mga pulong, kag tipuni sa imo kaugalingon ang akon mga sugo.
2Tumana ang akon mga sugo kag mabuhi ka; bantayi ang akon pagpanudlo subong sang kalimutaw sang imo mata. 3Ihigot ini sa imo mga tudlo; isulat ini sa papan sang imo tagipusoon.
4Magsiling ka sa kaalam, “Ikaw ang akon utod,” kag tawga ang paghangup nga imo pinakahigugmaon nga abyan, 5agud amligan ka nila sa gindilian nga babayi, sa dumuluong nga babayi nga may mahamis nga mga pulong.
6Kay sa talambwan sang akon balay nagtan-aw ako paubos sa akon rehas, 7kag nakita ko sa tunga sang mga walay alam, natalupangdan ko sa tunga sang mga pamatan-on, ang isa ka soltero nga kulang sing paghangup, 8nga nagaagi sa dalan malapit sa iya pamusod, nga nagapadulong sa dalan pakadto sa iya balay, 9sa sirum-sirum, samtang nagakahapon na, sa kadulom sang gab-i kag sa kadudulman.
10Kag yari karon, may babayi nga nagsugata sa iya, nga nagapanapot subong sang bigaon, nga may madaya nga tagipusoon. 11Mabanha sia kag matigdas; ang iya mga tiil indi mapahamtang sa balay. 12Kon kaisa sa dalan, kon kaisa sa mga plasa, nagahulat sia sa tagsa ka pamusod. 13Gindakup niya sia kag ginhalukan, kag sa walay huya nga nawong nagsiling sia sa iya:
14“May mga halad sa paghidait ako nga dapat dalhon; subong nga adlaw ginbayaran ko ang akon mga panaad. a a v14 Ang halad sa paghidait ginabahinbahin subong sang punsyon — ang buot niya silingon may handa na sia nga pagkaon kag may kabangdanan sa pagsinadya sa balay. 15Gani naggwa ako sa pagsugata sa imo, sa pagpangita sa imo sing hanuot, kag nakita ko ikaw. 16Ginhapin ko ang akon hiligdaan sang mga tabon, sang mga lino nga kolorado halin sa Egipto. 17Ginpahamot ko ang akon hiligdaan sang mira, abeya, kag kanela. 18Kari, magpainom kita sing bugana sang gugma tubtob sa aga; magkalipay kita sing bug-os sa gugma. 19Kay ang akon bana wala sa balay; naglakat sia sa malayo nga panglakaton. 20May dala sia nga puyo sang kuwarta kag indi sia mapauli tubtob sa pagtakdul sang bulan.”
21Paagi sa tanan niya nga makagalanyat nga mga pulong ginhaylo niya sia; paagi sa iya mahamis nga mga bibig gin-ganyat niya sia. 22Sa gilayon ginsunod niya sia, subong sang baka nga ginadala sa ihawan, subong sang usa nga nagatapak sa siod, 23tubtob nga ang baslay magtuhog sa iya atay; subong sang pispis nga nagadali pakadto sa siod, wala sia makahibalo nga ini magapatay sa iya.
24Karon, mga anak ko, pamati kamo sa akon, kag talupangda ninyo ang akon ginasiling. 25Dili pagtuguti nga magliso ang imo tagipusoon pakadto sa iya mga dalanon; dili ka magtalang pakadto sa iya mga banas. 26Kay madamo ang iya ginpukan nga mga biktima; ang iya mga ginpatay isa ka gamhanan nga kadam-an. 27Ang iya balay amo ang dalan pakadto sa lulubngan, nga nagapaidalom sa mga hulot sang kamatayon.
