Hîkmetê li ba xwe bigire

Bavek ji pencereya xwe dinêre û dibêje ka wî çi dît. Xortekî ku ji aqil bêpar e di tariya êvarê de ber bi xaniyekî taybet ve dimeşe, jinek pêşberî wî derdikeve ku pîlanên xwe çêkirine û dizane ku mêrê wê ne li malê ye. Ew wek gayekî ber bi serjêkirinê ve diçe.

Beş 7.

Kurê min, peyvên min biparêze, û emrên min di hundurê xwe de bicivîne.

Emrên min biparêze û bijî; hînkirina min wek bîbika çavê xwe biparêze. Wan li tiliyên xwe girê bide; wan li ser depa dilê xwe binivîse.

Ji hîkmetê re bibêje: “Tu xwişka min î,” û ji têgihîştinê re bibêje dosta xwe ya herî delal, da ku te ji jina qedexekirî, ji jina biyanî ya bi peyvên xwe yên nerm biparêze.

Çimkî li ser pencereya mala xwe, ji şebekeya xwe min xwar nêrî, û min di nav sadeyan de dît, di nav xortan de min ferq kir, xortek ku ji aqil bêpar bû, ew di kolanê re derbas dibû, nêzî quncikê wê, riya mala wê digirt, di tariya êvarê de, dema ku roj çû ava, di reşa şevê û di tariyê de.

Û va ye, jinek hat pêşberî wî, wek qehpeyekê li xwe kiribû, û di dilê wê de fêlbazî hebû. Ew dengbilind û serhişk e; lingên wê li malê namînin. Carek li kolanê, carek li meydanan, li her quncikî li benda ye. Wê ew girt û ramûsa, û bi rûyekî bêşerm jê re got:

“Diviyabû ez qurbanên silametiyê pêşkêş bikim; îro min nezrên xwe pêk anîn. ^a Loma ez derketim pêşberî te, da ku bi dilxwazî li te bigerim, û min tu dîtî. Min nivîna xwe bi serpêçan raxist, bi ketana rengîn ya ji Misrê. Min nivîna xwe bi mîrê bîhnxweş kir, bi aloe û darçînê. Were, em heta sibehê ji evînê têr vexwin; bila em xwe di evînê de winda bikin. Çimkî mêrê min ne li malê ye; ew çûye seferek dûr û dirêj. Wî tûrikek diravan bi xwe re bir û heta hîva çardehşevî wê venegere malê.”

Bi hemû gotinên xwe yên qanîker wê ew razî kir; bi lêvên xwe yên nerm wê ew kaş kir hundur. Ji nişkê ve ew li pey wê çû, wek gayê ku diçe serjêkirinê, wek xezalê ku linge xwe dixe xefikê, heta ku tîrek kezeba wî birî; wek çûkê ku ber bi davê ve difire, ew nizane ku ev dê bibe bihayê canê wî.

Îcar, kurên min, guhdariya min bikin, û bala xwe bidin gotinên min. Bila dilê te ber bi riyên wê ve neçe; di rêçikên wê de winda nebe. Çimkî wê gelek qurban xistine; kuştiyên wê pirr û bêhejmar in. Mala wê riya ber bi gorê ve ye, ku ber bi odeyên mirinê ve dadikeve.