Silav ji Selanîkiyan re
Nameyeke din a ku civîneke li ser roja Xudan tevlihevbûyî xurt dike, û bang li wan dike ku hîmgirtî bisekinin.
1 1Pawlos, Sîlwanos û Tîmotheyos, ji civîna Selanîkiyan re ya di Bavê me û Xudan Îsa Mesîh de: 2Kerem û aştî ji we re ji Bavê me û Xudan Îsa Mesîh.
Spasdarî ji bo baweriya we ya mezinbûyî
3Divê em her tim ji bo we spasiya Bavê me bikin, gelî birano û xwişkino—ev rast e—çimkî baweriya we her diçe zêdetir dibe, û hezkirina her yekî ji we ji bo hev zêdetir dibe. 4Loma em bi xwe di nav civînên Bavê me de bi we pesnê xwe didin, ji bo sebir û baweriya we di nav hemû zordarî û cefayên ku hûn dikişînin de.
5Ev delîlê dadperweriya dîwana Bavê me ye, ku hûn hêja tên hesibandin ji bo padîşahiya Bavê me, ya ku hûn jî ji bo wê cefayê dikişînin. 6Madem ku Bavê me dadperwer e, ewê tengahiyê li wan vegerîne yên ku we dixin tengahiyê, 7û rehetiyê bide we yên ku cefayê dikişînin, bi me re, dema ku Xudan Îsa ji ezmanan bi milyaketên xwe yên bihêz tê diyarkirin, 8di nav agirê gurr de, dadperweriyê tîne ser wan ên ku Bavê me nas nakin, û ser wan ên ku bi mizgîniya Xudanê me Îsa guh nadin. 9Ewê cezayê wêraniya herheyî bikişînin, dûrî huzûra Xudan û hêza wî ya birûmet, 10di wê rojê de, dema ku ew tê da ku di nav pîrozên xwe de bê birûmetkirin û di nav hemû yên ku bawer kirin de bê ecibandin—çimkî şahidiya me ya ji we re bawer hat kirin.
11Ji bo vê yekê em her tim ji bo we dua dikin, da ku Bavê me we hêja bihesibîne ji bo gazîkirina xwe, û bi hêza xwe her daxwaza qencî û her karê baweriyê pêk bîne, 12da ku navê Xudanê me Îsa di we de bê birûmetkirin, û hûn jî di wî de, bi kerema Bavê me û Xudan Îsa Mesîh.
