Wazodi wa Tesalonika 1 FHB Father's Heart Bible™

1 ¹Pholu, Silivanu, yi Thimoti, kwena Dibundu dya bisi Tesalonika, dyenina mwena Tata wetu yi Pfumu Yesu Kidisitu: ²Khenda yi ngemba kwena benu bitukidila kwena Tata wetu yi Pfumu Yesu Kidisitu.

Kuvutula matondu kikuma kya lukwikilu lwenu lwisi kola

³Tufweti vutula matondu kwena Tata wetu kosu tangwa kikuma kya benu, baphangi — bwabuna bwenina masonga — mukuma lukwikilu lwenu lwisi kola lukuluta, amana kosu mutu hana kati dya benu wisi luta kola mu lungongu benu yi benu. ⁴Yihana, betu-betu tusi dizatula ku mambu ma benu hana kati dya Mabundu ma Tata wetu, kikuma kya lukwikilu lwenu yi kikwamina kyenu mu minyanga yosu yi phasi zina lusi tambwasa.

⁵Kina kyenina kidimbu kya pfundusu ya masonga ya Tata wetu, ndangu lutambwasa hanga batu bana bafwanini mu Kipfumu kya Tata wetu, kina kikuma kyaki lusi nyokwama phi. ⁶Mukuma Tata wetu kenina wa masonga, kafúta kiwayi kwena batu bana bisi lunyokuna, ⁷amana mu kuhana lusadisu kwena benu bana lusi nyokwama, hakimosi yi betu, muna tangwa dina Pfumu Yesu kasengumuka kutuka kuna zilu hakimosi yi banzyo bandi ba ngolu, ⁸muna mbawu yina yisi lema, mu kunata ndola kwena batu bana bázayaku Tata wetu, yi kwena bana balémvukilaku Musamu wa Bukheti wa Pfumu wetu Yesu. ⁹Bawu batámbula lufutu lwa kuzangana kwa mvula yi mvula, thama ya mesu ma Pfumu yi thama ya ngolu ya khembu yandi, ¹⁰muna tangwa dina, tangwa kakwísa mu kumonika khembu yandi mwena batu bandi batoma yi kuyitukulwa hana kati dya boosu bana bákwikila — mukuma kimbangi kyetu kina twaluzimbwadini kyákwikama.

¹¹Kikuma kya bwabuna tusi sambila kikuma kya benu kosu tangwa, ndangu Tata wetu katambwasa benu hanga batu bana bafwanini mu kutela kwandi, amana kalungisa mu ngolu zandi kosu luzolu lwa mamboti yi muhangu wa lukwikilu, ¹²ndangu khumbu ya Pfumu wetu Yesu yazatulwa mwena benu, amana benu mwena yandi, mu khenda za Tata wetu yi Pfumu Yesu Kidisitu.