Bav Kahinên Xwe Vediqetîne

Peywirdarkirin gav bi gav di heft rojan de: şûştin, kinckirin, rûnkirin, destan deynin ser conegê û beranan, xwîn li guh, tiliya dest û tiliya pê. Ew bi armanca her tiştî diqede — ezê di nav gelê Îsraêl de bijîm û ezê bibim Bavê wan, û ewê bizanin.

Bavê me di ayetan de dipeyive 1–46

Beş 29.

“Ji bo ku tu wan pîroz bikî da ku ji min re kahintiyê bikin, tê vê bikî: Conegayekî û du beranên bêqisûr hilde, û nanê şikeva, kadeyên şikeva yên ku bi zeytê hatine hevîrkirin û nanê sêlê yê şikeva yê ku zeyt lê hatiye kirin; hemûyan ji arvanê genim ê hûr çêke. Wan bixe selikekê û di selikê de, tevî conegê û herdu beranan pêşkêş bike. Paşê Harûn û kurên wî bîne ber deriyê Konê Hevdîtinê û wan bi avê bişo. Kincan hilde û li Harûn bike: mîntan, xiftanê êfodê, êfod û bersing. Piştênka êfodê ya honandî jî li ser wî girê bide. Şaşikê deyne ser serê wî û taca pîroz li ser şaşikê deyne. Paşê zeyta rûnkirinê hilde, bi ser serê wî de birijîne û wî rûn bike. Kurên wî bîne pêş û mîntanan li wan bike. Şûtik li pişta Harûn û kurên wî girê bide û kumên wan li serê wan bike. Bi qanûneke herheyî kahintî ya wan e. Bi vî awayî tê Harûn û kurên wî peywirdar bikî.

“Conegê bîne ber Konê Hevdîtinê; bila Harûn û kurên wî destên xwe deynin ser serê wî. Li hizûra min, li ber deriyê Konê Hevdîtinê conegê serjê bike. Ji xwîna conegê hinekî hilde û bi tiliya xwe li ser stiriyên gorîgehê bide; xwîna mayî li binê gorîgehê birijîne. Tevahiya bezê ku ûr û roviyan dinixêmîne, perdeya kezebê, herdu gurçik û bezê li ser wan hilde û li ser gorîgehê bişewitîne. Goşt, eyar û rêxa conegê li derveyî wargehê bişewitîne. Ev pêşkêşiya paqijiyê ye.

“Beranekî hilde; bila Harûn û kurên wî destên xwe deynin ser serê wî. Beran serjê bike, xwîna wî hilde û bi aliyên gorîgehê ve bireşîne. Beran perçe perçe bike, ûr û rovî û pepikên wî bişo û wan tevî perçe û serê wî deyne. Paşê tevahiya beran li ser gorîgehê bişewitîne. Ev ji min re qurbana şewitandinê ye ku bêhna wê bi min xweş tê, pêşkêşiyeke xwarinê ye ku ji min re tê pêşkêşkirin.

“Beranê din hilde û bila Harûn û kurên wî destên xwe deynin ser serê wî. Beran serjê bike, ji xwîna wî hinekî hilde û li nermika guhê rastê yê Harûn, li nermikên guhên rastê yên kurên wî, li tiliyên wan ên mezin ên destê rastê û yên lingê rastê bide; xwîna mayî jî bi aliyên gorîgehê ve bireşîne. Ji xwîna li ser gorîgehê û ji zeyta rûnkirinê hinekî hilde û bi ser Harûn û kincên wî de, bi ser kurên wî û kincên wan ên bi wî re de bireşîne. Wê gavê wê ew û kincên wî, tevî kurên wî û kincên wan pîroz bibin. Bezê beran hilde: dûvê bibez, bezê ku ûr û roviyan dinixêmîne, perdeya kezebê, herdu gurçik û bezê li ser wan û hêta rastê; çimkî ev beranê peywirdarkirinê ye. Ji selika nanê şikeva ya ku li hizûra min e, nanekî, kadeyê bi zeyt û nanekî sêlê hilde. Van hemûyan bixe destên Harûn û kurên wî û wekî pêşkêşiya hejandinê li hizûra min bihejîne. Wan ji destên wan hilde û li ser gorîgehê, li ser qurbana şewitandinê bişewitîne ku bêhna wê li hizûra min xweş be. Ev ji min re pêşkêşiya xwarinê ye.

“Singê beranê peywirdarkirina Harûn hilde û wekî pêşkêşiya hejandinê li hizûra min bihejîne; ev para te ye. Singê pêşkêşiya hejandinê û hêta bilindkirî ya beranê peywirdarkirinê veqetîne; ev parên Harûn û kurên wî ne. Ev ji gelê Îsraêl wekî para herheyî ji Harûn û kurên wî re ye, çimkî ev diyarî ye: diyariya ji qurbanên aştiyê yên gelê Îsraêl, diyariya wan a ji min re.

“Kincên Harûn ên pîroz wê piştî wî derbasî kurên wî bibin, da ku ew bi wan kincan bên rûnkirin û peywirdarkirin. Kurê ku li şûna wî dibe kahin û ji bo xizmeta li Cihê Pîroz dikeve Konê Hevdîtinê, wê heft rojan wan li xwe bike.

“Tê beranê peywirdarkirinê hilînî û goştê wî li cihekî pîroz bikelînî. Wê Harûn û kurên wî li ber deriyê Konê Hevdîtinê goştê beran û nanê di selikê de bixwin. Divê ew wan tiştên ku di peywirdarkirin û pîrozkirina wan de kefaret pê hat kirin bixwin; lê bila tu kesê xerîb jê nexwe, çimkî ew pîroz e. Heke ji goştê peywirdarkirinê yan ji nan tiştek heta sibê bimîne, bermayiyê bi agir bişewitîne. Nabe ku bê xwarin, çimkî pîroz e.

“Li gorî hemû tiştên ku min li te emir kirine, ji bo Harûn û kurên wî wisa bike. Heft rojan wan peywirdar bike. Her roj conegayekî wekî pêşkêşiya paqijiyê ji bo kefaretê pêşkêş bike. Bi kirina kefaretê ji bo gorîgehê wê paqij bike û wê rûn bike da ku wê pîroz bikî. Heft rojan ji bo gorîgehê kefaretê bike û wê pîroz bike. Wê gavê wê gorîgeh pir pîroz be û her tiştê ku pê bikeve wê pîroz bibe.

“Tiştê ku divê tu li ser gorîgehê pêşkêş bikî ev e: Her roj, bê kêmasî, du berxên yek salî. Serê sibê berxekî pêşkêş bike û berêvarê yê din. Bi berxê pêşî re bi qasî du lître arvanê hûr ê ku bi qasî lîtreyekê zeyta kutayî hatiye hevîrkirin û wekî pêşkêşiya rijandinê bi qasî lîtreyekê şerab pêşkêş bike. Tê berxê din berêvarê pêşkêş bikî, bi heman pêşkêşiya dexlê û pêşkêşiya rijandinê re, wekî ya serê sibê. Ev qurbana şewitandinê ya ji min re ye ku bêhna wê bi min xweş tê. Ev wê di nav nifşên we de li ber deriyê Konê Hevdîtinê, li hizûra min, qurbana şewitandinê ya rojane be. Ezê li wir bi we re hev bibînim û bi we re bipeyivim. Ezê li wir bi gelê Îsraêl re hev bibînim û wê rûmeta min wî cihî pîroz bike. Ezê Konê Hevdîtinê û gorîgehê pîroz bikim. Ezê Harûn û kurên wî jî pîroz bikim, da ku ji min re kahintiyê bikin.

“Ezê di nav gelê Îsraêl de bimînim û bibim Bavê wan. Wê bizanibin ku ez Bavê wan im, Yê ku ew ji Misrê derxistin, da ku ez di nav wan de bimînim. Ez Bavê wan im.”