Canê Min Li Bendê Ye
Ji serokê sazbendan re. Ji Yedûtûn re. Zebûra Dawid.
Dawid bi bêdengî bi tenê li benda Bavê xwe disekine, dema ku yên din wek dîwarekî xwar lê dixin, bi devê xwe wî pîroz dikin, lê di hundirê xwe de nifiran lê dikin. Ew hem nizm û hem bihêzan dikêşe û wan ji bihnekê siviktir dibîne, paşê ji her kesê din re dibêje ku ew jî dilê xwe birijînin.
62 1Canê min bi tenê bi bêdengî li benda Bavê min e; rizgariya min ji wî tê. 2Tenê ew zinarê min û rizgariya min e, keleha min e; ez tu car pir nahejim. 3Heta kengê hûnê hemû êrîşî mirovekî bikin, wî bixin û hilweşînin, wekî dîwarekî xwar, wekî çîtekî ku diheje? 4Ew tenê şêwr dikin ku wî ji payeya wî ya bilind biavêjin; ji derewan kêfa wan tê. Bi devê xwe pîroz dikin, lê di hundirê xwe de nifiran dikin.
5Bi tenê li benda Bavê min, ey canê min, bi bêdengî bimîne, çimkî hêviya min ji wî ye. 6Tenê ew zinarê min û rizgariya min e, keleha min e; ez nahejim. 7Rizgariya min û rûmeta min li ser Bavê min e; zinarê min ê hêzdar, penageha min, di Bavê min de ye. 8Ey gelno, her gav baweriya xwe bi wî bînin; dilê xwe li ber wî birijînin; Bavê me ji me re penageh e.
9Bi rastî, kesên nizm tenê bihnek in, yên bihêz jî xapandinek in; li ser terazûyê ew hildikişin — bi hev re ji bihnekê siviktir in. 10Baweriya xwe bi zordariyê neynin; ji talanê hêviyên vala mekin; heke dewlemendî zêde bibe, dilê xwe pê ve megirêdin. 11Carekê Bavê me peyivî; du caran min ev bihîst: ku hêz ya Bavê me ye, a a v11 “Carekê… du caran” şêweyekî helbestî yê Îbranî ye, tê wateya: ji her tiştî bêtir ev e ya herî girîng. 12û, ya Bavê min ê Serwer, dilovaniya peymanê ya te ye. Çimkî tuyê li gorî kirinên her kesî heqê wî bidî.
