१ करिंथकरांस 6

6 ¹तुमच्यापैकी कोणाचा दुसऱ्याशी वाद असेल, तर तो देवाच्या लोकांपुढे न नेता न्यायासाठी अनीतिमानांपुढे नेण्याचे धाडस कसे करतो? ²पवित्र जन जगाचा न्याय करतील, हे तुम्हाला ठाऊक नाही काय? आणि जर तुम्ही जगाचा न्याय करणार, तर अगदी क्षुल्लक खटले सोडवण्यास तुम्ही अपात्र आहात काय? ³आपण देवदूतांचा न्याय करणार, हे तुम्हाला ठाऊक नाही काय? मग या जीवनातील गोष्टींची तर किती अधिक! ⁴म्हणून अशा प्रकारचे वाद तुमच्यात असतील, तेव्हा मंडळीत ज्यांना काहीच किंमत नाही अशांना तुम्ही न्यायाधीश म्हणून नेमता काय? ⁵तुमची लाज वाटावी म्हणून मी हे बोलतो. सहविश्वासणाऱ्यांमध्ये न्याय करण्याइतका शहाणा एकही मनुष्य तुमच्यात नाही काय? ⁶उलट, एक बंधू दुसऱ्या बंधूला न्यायालयात नेतो, आणि तेही अविश्वासणाऱ्यांसमोर! ⁷तुमच्यात एकमेकांविरुद्ध खटले आहेत, हाच तुमचा पूर्ण पराभव आहे. त्याऐवजी तुमच्यावर अन्याय का होऊ देत नाही? त्याऐवजी तुमची फसवणूक का होऊ देत नाही? ⁸उलट, तुम्ही स्वतःच अन्याय करता व फसवता, आणि तेही आपल्याच बंधुभगिनींशी.

⁹अथवा अनीतिमान आमच्या पित्याच्या राज्याचे वतन मिळवणार नाहीत, हे तुम्हाला ठाऊक नाही काय? फसू नका: कोणीही जारकर्मी, कोणीही मूर्तिपूजक, व्यभिचारी, पुरुषवेश्या, पुरुषांशी संग करणारा पुरुष, ¹⁰चोर, लोभी, दारुडे, निंदक किंवा फसवणारे यांपैकी कोणीही आमच्या पित्याच्या राज्याचे वतन मिळवणार नाहीत. ¹¹तुमच्यांपैकी काहीजण असेच होते. परंतु तुम्ही धुतले गेलात, तुम्ही पवित्र केले गेलात, प्रभु येशू ख्रिस्ताच्या नावाने व आमच्या पित्याच्या आत्म्याद्वारे तुम्ही नीतिमान ठरवले गेलात.

¹²“मला काहीही करण्याचे स्वातंत्र्य आहे”—पण सर्वच गोष्टी हितकारक नाहीत. “मला काहीही करण्याचे स्वातंत्र्य आहे”—पण कोणतीही गोष्ट माझ्यावर सत्ता चालवणार नाही. ¹³“अन्न पोटासाठी आणि पोट अन्नासाठी”—आणि आमचा पिता या दोहोंचा नाश करील. पण शरीर जारकर्मासाठी नाही—ते प्रभूसाठी आहे, आणि प्रभु शरीरासाठी आहे. ¹⁴आणि ज्या आमच्या पित्याने प्रभूला उठवले, तोच आपल्यालाही आपल्या सामर्थ्याने उठवील. ¹⁵तुमची शरीरे ख्रिस्ताचे अवयव आहेत, हे तुम्हाला ठाऊक नाही काय? मग मी ख्रिस्ताचे अवयव घेऊन ते वेश्येचे अवयव करू काय? कधीही नाही! ¹⁶अथवा जो वेश्येशी जडतो तो तिच्याशी एकदेह होतो, हे तुम्हाला ठाऊक नाही काय? कारण शास्त्रात म्हटले आहे, “ती दोघे एकदेह होतील.” ¹⁷पण जो प्रभूशी जडतो तो त्याच्याशी एकात्मा होतो.

¹⁸जारकर्मापासून दूर पळा. मनुष्य जे इतर प्रत्येक पाप करतो ते शरीराबाहेर असते, पण जारकर्मी आपल्याच शरीराविरुद्ध पाप करतो. ¹⁹अथवा तुमचे शरीर हे तुमच्यामध्ये वसणाऱ्या पवित्र आत्म्याचे मंदिर आहे, जो तुम्हाला आमच्या पित्याकडून मिळाला आहे, हे तुम्हाला ठाऊक नाही काय? तुम्ही स्वतःचे नाही, ²⁰कारण तुम्हाला मोलाने विकत घेतले आहे. म्हणून तुमच्या शरीराने आमच्या पित्याचे गौरव करा.