१ पेत्र 4

4 ¹म्हणून, ख्रिस्ताने देहात दुःख सोसले, तसेच तुम्हीही त्याच मनोवृत्तीने सज्ज व्हा; कारण जो देहात दुःख सोसतो त्याचा पापाशी संबंध तुटलेला असतो. ²यासाठी की, देहातील उरलेला काळ तुम्ही यापुढे मानवी वासनांसाठी नव्हे, तर आमच्या पित्याच्या इच्छेसाठी घालवावा. ³जे पित्याला ओळखत नाहीत त्यांच्या इच्छेप्रमाणे वागण्यात तुम्ही आधीच पुरेसा काळ घालवला आहे: विलासीपणा, कामवासना, दारूबाजी, धिंगाणा, मद्यपानाच्या मैफली आणि निषिद्ध मूर्तिपूजा यांत जगण्यात. ⁴तुम्ही यापुढे त्यांच्याबरोबर त्याच बेबंद जीवनाच्या पुरात धावत नाही याचे त्यांना आश्चर्य वाटते, म्हणून ते तुमची निंदा करतात. ⁵पण जो जिवंतांचा व मेलेल्यांचा न्याय करण्यास सिद्ध आहे, त्याला त्यांना जबाब द्यावा लागेल. ⁶यासाठीच आता जे मेलेले आहेत त्यांनाही सुवार्ता सांगण्यात आली: सर्व माणसांप्रमाणे देहात त्यांचा न्याय झाला, तरी आमच्या पित्याप्रमाणे ते आत्म्यात जगावेत.

⁷सर्व गोष्टींचा शेवट जवळ आला आहे. म्हणून तुम्ही सावध व संयमी असा, यासाठी की तुम्हांला प्रार्थना करता यावी. ⁸सर्वांहून महत्त्वाचे म्हणजे, एकमेकांवर मनापासून प्रीती करत राहा, कारण प्रीती पापांच्या राशीला झाकून टाकते. ⁹कुरकुर न करता एकमेकांचा आदरातिथ्य करा. ¹⁰आमच्या पित्याच्या नानाविध कृपेचे चांगले कारभारी या नात्याने, तुम्हांला जे दान मिळाले आहे ते प्रत्येकाने एकमेकांची सेवा करण्यासाठी वापरावे. ¹¹जो बोलतो त्याने आमच्या पित्याचीच वचने सांगणाऱ्यासारखे बोलावे. जो सेवा करतो त्याने पित्याने पुरवलेल्या सामर्थ्याने सेवा करावी, यासाठी की सर्व गोष्टींत येशू ख्रिस्ताद्वारे त्याचे गौरव व्हावे. गौरव व सामर्थ्य त्याचेच युगानुयुग आहे. आमेन.

पित्याच्या नावासाठी दुःख सोसणे

¹²प्रिय मित्रांनो, तुमची परीक्षा पाहणाऱ्या अग्निमय संकटाचे आश्चर्य मानू नका; जणू काही विचित्र घडत आहे असे समजू नका. ¹³उलट, तुम्ही जितके ख्रिस्ताच्या दुःखांचे भागीदार होता तितके आनंद करा, यासाठी की त्याचे गौरव प्रकट होईल तेव्हा तुम्हीही उल्हासाने आनंद कराल. ¹⁴ख्रिस्ताच्या नावासाठी तुमची निंदा झाली, तर तुम्ही धन्य आहात, कारण गौरवाचा व आमच्या पित्याचा आत्मा तुमच्यावर राहतो. ¹⁵तुमच्यांतील कोणीही खुनी, चोर, दुष्कर्मी किंवा दुसऱ्यांच्या कामांत लुडबुड करणारा म्हणून दुःख सोसू नये. ¹⁶पण जर कोणी ख्रिस्ती म्हणून दुःख सोसत असेल, तर त्याने लाज बाळगू नये, तर ते नाव धारण करतो म्हणून आमच्या पित्याचे गौरव करावे. ¹⁷कारण न्यायाला आमच्या पित्याच्या घरापासून सुरुवात होण्याची वेळ आली आहे; आणि तो आमच्यापासून सुरू झाला, तर आमच्या पित्याच्या सुवार्तेची आज्ञा न मानणाऱ्यांचे काय होईल? ¹⁸आणि, “जर नीतिमानच कसाबसा तारला जातो, तर भक्तिहीन व पापी यांची काय गत होईल?” ¹⁹म्हणून, जे आमच्या पित्याच्या इच्छेने दुःख सोसतात, त्यांनी चांगले करत आपले जीव आपल्या विश्वासू निर्माणकर्त्याच्या हाती सोपवावेत.