१ शमुवेल 27

27 ¹दावीदाने मनात विचार केला, "एखाद्या दिवशी मी शौलाच्या हाती सापडून नष्ट होईन. पलिष्ट्यांच्या देशात तत्काळ पळून जाण्यापेक्षा माझ्यासाठी दुसरे काहीच चांगले नाही. मग इस्राएलाच्या सर्व सीमांमध्ये माझा शोध घेण्याचे शौल सोडून देईल, आणि मी त्याच्या हातून निसटेन." ²तेव्हा दावीद निघाला आणि आपल्याबरोबरच्या सहाशे माणसांसह गथाचा राजा, माओखाचा पुत्र आखीश, याच्याकडे पलीकडे गेला. ³दावीद आपल्या माणसांसह आखीशाजवळ गथात राहिला, प्रत्येकजण आपापल्या कुटुंबासह—दावीद आपल्या दोन बायकांसह, म्हणजे इज्रेएलाची अहीनवाम आणि कर्मेलाची अबीगईल, नाबालाची विधवा, हिच्यासह. ⁴दावीद गथास पळून गेला आहे असे शौलाला कळवण्यात आले, तेव्हा त्याने त्याचा आणखी शोध घेतला नाही.

⁵दावीद आखीशाला म्हणाला, "तुझी माझ्यावर कृपादृष्टी असेल तर राहण्यासाठी देशातील एखाद्या गावात मला जागा दे. तुझ्या दासाने राजनगरीत तुझ्याबरोबर का राहावे?" ⁶त्या दिवशी आखीशाने त्याला सिकलाग दिले; म्हणून सिकलाग आजपर्यंत यहूदाच्या राजांचे झाले आहे. ⁷दावीद पलिष्ट्यांच्या प्रदेशात राहिला तो काळ एक वर्ष चार महिने होता.

⁸दावीद आणि त्याची माणसे वर जाऊन गशूरी, गिर्जी व अमालेकी यांच्यावर हल्ले करीत, कारण ते लोक प्राचीन काळापासून शूरकडे आणि मिसर देशापर्यंतच्या त्या भूमीत राहत होते. ⁹दावीद जेव्हा त्या प्रदेशावर हल्ला करी, तेव्हा तो पुरुष किंवा स्त्री कोणालाही जिवंत ठेवत नसे; मेंढरे, गुरे, गाढवे, उंट व वस्त्रे घेऊन मग आखीशाकडे परत येई.

¹⁰आखीश विचारी, "आज तुम्ही कोठे हल्ला केला?" तेव्हा दावीद म्हणे, "यहूदाच्या नेगेबावर," किंवा "यरहमेली लोकांच्या नेगेबावर," किंवा "केनी लोकांच्या नेगेबावर."

¹¹गथास आणण्यासाठी दावीद कोणाही पुरुषाला किंवा स्त्रीला जिवंत ठेवत नसे, कारण तो विचार करी, "ते आमच्याविषयी वर्दी देतील आणि म्हणतील, 'दावीदाने असे केले.'" पलिष्ट्यांच्या प्रदेशात तो राहिला तेवढा सर्व काळ त्याची हीच रीत होती.

¹²आखीशाचा दावीदावर विश्वास बसला, कारण तो विचार करी, "त्याने आपल्या इस्राएल लोकांना स्वतःचा अत्यंत वीट आणवला आहे; तो कायमचा माझा दास होईल."