यशया 39

39 ¹त्या वेळी बाबेलचा राजा बलदानाचा पुत्र मरोदख-बलदान याने हिज्कीयाला पत्रे व एक भेट पाठवली, कारण हिज्कीया आजारी पडून बरा झाल्याचे त्याने ऐकले होते. ²हिज्कीयाने त्यांचे आनंदाने स्वागत केले आणि आपले खजिनाघर त्यांना दाखवले — चांदी, सोने, सुगंधी द्रव्ये, उत्तम तेल, त्याचे सगळे शस्त्रागार, आणि त्याच्या भांडारांतले सगळे काही. आपल्या घरातली किंवा राज्यातली अशी कोणतीच वस्तू नव्हती जी हिज्कीयाने त्यांना दाखवली नाही. ³मग यशया संदेष्टा हिज्कीया राजाकडे येऊन त्याला विचारले, “ह्या माणसांनी काय सांगितले, आणि ते कोठून आले?” हिज्कीया म्हणाला, “दूरच्या देशातून, बाबेलातून.”

⁴त्याने विचारले, “त्यांनी तुझ्या घरात काय पाहिले?” हिज्कीयाने उत्तर दिले, “माझ्या घरातले सगळे काही त्यांनी पाहिले. माझ्या भांडारांतले असे काहीच नव्हते जे मी त्यांना दाखवले नाही.”

⁵मग यशया हिज्कीयाला म्हणाला, “स्वर्गातील सैन्यांच्या पित्याचे वचन ऐक:

⁶असे दिवस येत आहेत की, तुझ्या घरातले सगळे काही, आजवर तुझ्या पूर्वजांनी साठवलेले सर्व, बाबेलला नेले जाईल. काहीच शिल्लक राहणार नाही, असे आमचा पिता म्हणतो. ⁷तुझ्याच पुत्रांपैकी काही, तुझ्याच वंशजांपैकी काही, नेले जातील आणि ते बाबेलच्या राजाच्या राजवाड्यात अधिकारी म्हणून सेवा करतील.”

⁸मग हिज्कीया यशयाला म्हणाला, “आमच्या पित्याचे जे वचन तू सांगितलेस ते चांगले आहे.” कारण त्याने विचार केला, “माझ्या आयुष्यात शांती व सुरक्षितता राहील.”