ईयोब 16

16 ¹मग ईयोबाने उत्तर दिले: ²"अशा गोष्टी मी पुष्कळ ऐकल्या आहेत; तुम्ही सर्व कुचकामी सांत्वन करणारे आहात. ³तुमच्या वारेमाप शब्दांना काही अंत आहे की नाही? कशामुळे चिडून तुम्ही उत्तरे देतच राहता? ⁴तुम्ही माझ्या जागी असता, तर मीही तुमच्यासारखे बोलू शकलो असतो; मी तुमच्याविरुद्ध शब्द जुळवून तुमच्याकडे पाहून मान हलवली असती. ⁵परंतु मी माझ्या मुखाने तुम्हांला बळ दिले असते, आणि माझ्या ओठांच्या सांत्वनाने तुमची वेदना हलकी केली असती. ⁶मी बोललो, तरी माझी वेदना हलकी होत नाही; आणि मी गप्प राहिलो, तरी माझ्यातून काय निघून जाते? ⁷खरोखर आता देवाने मला थकवून टाकले आहे; तू माझ्या सर्व मंडळीचा नाश केला आहेस. ⁸तू मला वाळवून टाकले आहेस, आणि तेच साक्षीदार बनले आहे; माझी क्षीणता माझ्याविरुद्ध उठून माझ्या तोंडावर साक्ष देते. ⁹त्याच्या क्रोधाने मला फाडले आणि माझ्यावर हल्ला केला; त्याने माझ्यावर दात खाल्ले; माझा शत्रू माझ्यावर आपली नजर रोखतो. ¹⁰माणसांनी आपली तोंडे उघडून माझ्याकडे पाहिले; त्यांनी तिरस्काराने माझ्या गालावर मारले; ते माझ्याविरुद्ध एकवटतात. ¹¹देव मला अन्यायी लोकांच्या हाती देतो आणि दुष्टांच्या पकडीत मला टाकतो. ¹²मी सुखात होतो, आणि त्याने मला मोडून टाकले; त्याने माझ्या मानेला धरून मला तुकडे तुकडे केले; त्याने मला आपले लक्ष्य बनवले आहे. ¹³त्याचे धनुर्धारी मला घेरतात; तो दयेशिवाय माझी मूत्रपिंडे फाडतो आणि माझे पित्त जमिनीवर ओततो. ¹⁴तो मला घावावर घाव घालून मोडतो; तो योद्ध्याप्रमाणे माझ्यावर धावून येतो. ¹⁵मी माझ्या कातडीवर शोकवस्त्रे शिवली आहेत आणि माझे कपाळ धुळीत गाडले आहे. ¹⁶रडून रडून माझा चेहरा लाल झाला आहे, आणि माझ्या पापण्यांवर घनदाट सावली पसरली आहे, ¹⁷तरीही माझ्या हातांत कोणताही हिंसाचार नाही आणि माझी प्रार्थना शुद्ध आहे. ¹⁸हे पृथ्वी, माझे रक्त झाकू नकोस, आणि माझ्या आक्रोशाला विसावा मिळू देऊ नकोस. ¹⁹आताही, माझा साक्षीदार स्वर्गात आहे, आणि माझा वकील उच्चस्थानी आहे. ²⁰माझे मित्र माझा तिरस्कार करतात; माझा डोळा देवाकडे अश्रू ढाळतो, ²¹यासाठी की त्याने माणसाच्या वतीने देवासमोर वाद मांडावा, जसा मनुष्यपुत्र आपल्या शेजाऱ्यासाठी विनवणी करतो. ²²कारण फक्त थोडीच वर्षे जातील, आणि मग मी अशा मार्गाने जाईन जिथून परत येणे नाही."