लूक 21

21 ¹वर पाहताना येशूने श्रीमंत लोकांना मंदिराच्या भांडारात आपली दाने टाकताना पाहिले. ²त्याने एका गरीब विधवेलाही तांब्याची दोन छोटी नाणी टाकताना पाहिले.

³तो म्हणाला, “मी तुम्हांला खरे सांगतो, या गरीब विधवेने इतर सर्वांपेक्षा अधिक टाकले आहे. ⁴कारण या सर्वांनी आपल्या विपुलतेतून दाने दिली, पण हिने आपल्या दारिद्र्यातून, आपल्या उपजीविकेचे सर्वस्व दिले.”

मंदिर पडेल

⁵काही जण मंदिराविषयी बोलत होते—ते सुंदर दगडांनी व आमच्या पित्याला अर्पण केलेल्या दानांनी सजवलेले होते—तेव्हा तो म्हणाला:

⁶“तुम्ही जे पाहत आहात, त्याविषयी असे दिवस येत आहेत की एक दगड दुसऱ्यावर राहणार नाही—प्रत्येक दगड खाली पाडला जाईल.”

⁷त्यांनी विचारले, “गुरुजी, या गोष्टी केव्हा घडतील, आणि या गोष्टी घडणार आहेत हे कोणत्या चिन्हावरून कळेल?”

⁸तो म्हणाला, “जपून राहा, फसू नका. पुष्कळ जण माझ्या नावाने येऊन म्हणतील, ‘तो मीच आहे,’ आणि ‘वेळ जवळ आली आहे.’ त्यांच्यामागे जाऊ नका. ⁹युद्धांविषयी व बंडांविषयी तुम्ही ऐकाल, तेव्हा घाबरू नका. या गोष्टी प्रथम घडल्याच पाहिजेत, पण शेवट लगेच येणार नाही.”

¹⁰मग तो त्यांना म्हणाला, “राष्ट्र राष्ट्रावर आणि राज्य राज्यावर उठेल. ¹¹मोठे भूकंप होतील, ठिकठिकाणी दुष्काळ व मरी पडतील, आणि आकाशातून भयंकर गोष्टी व मोठी चिन्हे दिसतील. ¹²पण या सर्वांच्या आधी, ते तुम्हांला धरतील व तुमचा छळ करतील, तुम्हांला सभास्थानांच्या व तुरुंगांच्या स्वाधीन करतील, आणि माझ्या नावामुळे तुम्हांला राजे व राज्यपाल यांच्यापुढे ओढून नेतील. ¹³साक्ष देण्याची ही तुमची संधी ठरेल. ¹⁴म्हणून आपल्या बचावाची तयारी आधीच करू नये, असे आपल्या हृदयांत ठरवा, ¹⁵कारण मी तुम्हांला अशी वाणी व असे ज्ञान देईन की तुमच्या कोणत्याही विरोधकाला त्याला विरोध करता येणार नाही किंवा खोडून काढता येणार नाही. ¹⁶आईवडील, भाऊ, नातलग व मित्र हेसुद्धा तुमचा विश्वासघात करतील, आणि ते तुमच्यातील काहींना ठार मारतील. ¹⁷माझ्या नावासाठी सर्व लोक तुमचा द्वेष करतील. ¹⁸पण तुमच्या डोक्याचा एक केसही नष्ट होणार नाही. ¹⁹तुमच्या धीराने तुम्ही आपले जीव मिळवाल.”

²⁰“जेव्हा तुम्ही यरुशलेमेला सैन्यांनी वेढलेले पाहाल, तेव्हा तिचा नाश जवळ आला आहे हे ओळखा. ²¹तेव्हा यहूदीयात असणाऱ्यांनी डोंगरांकडे पळावे, शहरात असणाऱ्यांनी बाहेर निघावे, आणि खेड्यापाड्यांत असणाऱ्यांनी तिच्यात प्रवेश करू नये, ²²कारण हे न्यायाचे दिवस आहेत, ज्यांत लिहिलेले सर्व काही पूर्ण होईल. ²³त्या दिवसांत गरोदर स्त्रियांची व बाळ पाजणाऱ्या मातांची केवढी दुर्दशा होईल! कारण या देशावर मोठे संकट व या लोकांवर क्रोध येईल. ²⁴ते तलवारीच्या धारेने पडतील व बंदिवान होऊन सर्व राष्ट्रांत नेले जातील. राष्ट्रांचे नेमलेले काळ पूर्ण होईपर्यंत यरुशलेम राष्ट्रांकडून तुडवली जाईल.”

²⁵“सूर्य, चंद्र व तारे यांच्यात चिन्हे दिसतील, आणि पृथ्वीवर राष्ट्रे संकटात पडतील, समुद्राच्या गर्जनेने व लाटांच्या तडाख्याने गोंधळून जातील. ²⁶जगावर जे येत आहे त्याच्या भीतीने व धास्तीने लोक मूर्च्छित होतील, कारण आकाशांतील शक्ती हालवल्या जातील. ²⁷तेव्हा मनुष्याचा पुत्र सामर्थ्याने व मोठ्या वैभवाने मेघांतून येताना ते पाहतील. ²⁸या गोष्टी घडू लागतील, तेव्हा ताठ उभे राहा व आपली मस्तके वर करा, कारण तुमची मुक्तता जवळ आली आहे.”

²⁹मग त्याने त्यांना एक दृष्टान्त सांगितला: “अंजिराच्या झाडाकडे व सर्व झाडांकडे पाहा. ³⁰जेव्हा त्यांना पालवी फुटते, तेव्हा उन्हाळा आताच जवळ आला आहे हे तुम्ही स्वतःच पाहून जाणता. ³¹त्याचप्रमाणे, या गोष्टी घडताना तुम्ही पाहाल, तेव्हा आमच्या पित्याचे राज्य जवळ आले आहे हे जाणा. ³²मी तुम्हांला खरे सांगतो, या सर्व गोष्टी घडेपर्यंत ही पिढी नाहीशी होणार नाही. ³³आकाश व पृथ्वी नाहीशी होतील, पण माझी वचने कधीही नाहीशी होणार नाहीत.”

³⁴“स्वतःविषयी जपून राहा, नाहीतर अनियंत्रित चैनबाजी, दारूबाजी व जीवनाच्या चिंतांनी तुमची हृदये जड होतील, आणि तो दिवस सापळ्यासारखा अचानक तुमच्यावर येऊन पडेल. ³⁵कारण तो अखिल पृथ्वीच्या पाठीवर राहणाऱ्या प्रत्येकावर येईल. ³⁶घडणार असलेल्या सर्व गोष्टींतून निसटण्यासाठी व मनुष्याच्या पुत्रापुढे उभे राहण्यासाठी सामर्थ्य मिळावे म्हणून प्रार्थना करत सर्वदा जागृत राहा.”

³⁷दिवसा तो मंदिरात शिकवत असे; रात्री बाहेर जाऊन जैतूनाच्या डोंगरावर मुक्काम करी. ³⁸सर्व लोक त्याचे ऐकण्यासाठी पहाटेच मंदिरात त्याच्याकडे येत असत.