स्तोत्रसंहिता 103

103 ¹हे माझ्या जिवा, आमच्या पित्याचा धन्यवाद कर; आणि माझ्या ठायी जे काही आहे ते सर्व, त्याच्या पवित्र नावाचा धन्यवाद करो!

²हे माझ्या जिवा, आमच्या पित्याचा धन्यवाद कर, आणि त्याचे कोणतेही उपकार विसरू नकोस, ³जो तुझ्या सर्व पापांची क्षमा करतो, जो तुझे सर्व रोग बरे करतो, ⁴जो तुझा जीव कबरेतून खंडून घेतो, जो प्रेमदया व कळवळा यांचा मुकुट तुला घालतो, ⁵जो जोवर तू जगतोस तोवर तुला उत्तम पदार्थांनी तृप्त करतो, त्यामुळे गरुडासारखे तुझे तारुण्य नवे होते.

⁶आमचा पिता सर्व जाचलेल्यांसाठी नीतिमत्ता व न्याय करतो.

⁷त्याने आपले मार्ग मोशेला कळवले, आपली कृत्ये इस्राएल लोकांना कळवली. ⁸आमचा पिता कनवाळू व कृपाळू आहे, रागास मंद व प्रेमदयेत विपुल आहे. ⁹तो सर्वदा दोष लावणार नाही, आणि सर्वकाळ आपला राग धरून राहणार नाही. ¹⁰तो आमच्या पापांप्रमाणे आमच्याशी वागत नाही, आणि आमच्या अपराधांप्रमाणे आम्हांला प्रतिफळ देत नाही. ¹¹कारण जसे आकाश पृथ्वीहून उंच आहे, तशी त्याची प्रेमदया त्याचे भय धरणाऱ्यांवर थोर आहे; ¹²जसा पूर्व पश्चिमेपासून दूर आहे, तसे आमच्या पित्याने आमचे अपराध आमच्यापासून दूर केले आहेत.

¹³जसे पित्याचे हृदय आपल्या मुलांकडे ओढ घेते, तसे आमच्या पित्याचे हृदय त्याचे भय धरणाऱ्यांकडे ओढ घेते. ¹⁴कारण आम्ही कशाचे घडलो आहोत हे तो जाणतो; आम्ही माती आहोत हे त्याला आठवते. ¹⁵माणसाचे दिवस गवतासारखे आहेत; ते शेतातल्या रानफुलासारखे बहरतात; ¹⁶कारण त्यावरून वारा वाहून जातो, आणि ते नाहीसे होते, आणि त्याचे ठिकाण त्याला पुन्हा ओळखत नाही. ¹⁷परंतु आमच्या पित्याची प्रेमदया अनादिकालापासून अनंतकालापर्यंत त्याचे भय धरणाऱ्यांवर आहे, आणि त्याची नीतिमत्ता मुलांच्या मुलांवर आहे, ¹⁸जे त्याचा करार पाळतात आणि त्याच्या आज्ञा पाळण्याचे स्मरण ठेवतात त्यांच्यावर.

¹⁹आमच्या पित्याने आपले सिंहासन स्वर्गात स्थापिले आहे, आणि त्याचे राज्य सर्वांवर अधिकार चालवते.

²⁰हे त्याच्या दूतांनो, त्याचे वचन पाळणाऱ्या पराक्रमी वीरांनो, त्याच्या प्रत्येक वचनाचे पालन करीत आमच्या पित्याचा धन्यवाद करा! ²¹हे त्याच्या सर्व सैन्यांनो, त्याची इच्छा पूर्ण करणाऱ्या त्याच्या सेवकांनो, आमच्या पित्याचा धन्यवाद करा! ²²हे त्याच्या सर्व निर्मितींनो, त्याच्या राज्यभर आमच्या पित्याचा धन्यवाद करा. हे माझ्या जिवा, आमच्या पित्याचा धन्यवाद कर!