स्तोत्रसंहिता 64

64 ¹हे माझ्या पित्या, माझ्या विलापात माझी वाणी ऐक; शत्रूच्या धाकापासून माझ्या जिवाचे रक्षण कर. ²दुष्टांच्या गुप्त कारस्थानांपासून, दुष्कर्म करणाऱ्यांच्या गजबजलेल्या घोळक्यापासून मला लपव. ³ते तरवारीसारख्या आपल्या जिभा धारदार करतात; बाणांप्रमाणे ते आपले कडवट शब्द रोखतात, ⁴म्हणजे दबा धरून निर्दोष माणसावर मारावे; अकस्मात व निर्भयपणे ते त्याच्यावर मारतात. ⁵ते आपल्या दुष्ट हेतूला घट्ट धरून राहतात; ते गुप्तपणे सापळे रचण्याविषयी बोलतात आणि म्हणतात, “ते कोण पाहणार?”

⁶ते अन्यायाचे कट रचतात आणि म्हणतात, “आम्ही उत्तम रीतीने आखलेली योजना परिपूर्ण केली आहे.” माणसाचे अंतर्मन व हृदय खोल असते. ⁷पण आमचा पिता त्यांच्यावर बाण मारील; अकस्मात ते जखमी होतील. ⁸त्यांना ठेच लागावी असे केले जाते; त्यांच्याच जिभा त्यांच्याविरुद्ध वळतात; जे कोणी त्यांना पाहतील ते सर्व आपली डोकी हलवतील.

⁹तेव्हा सर्वजण भितील; ते आमच्या पित्याचे कार्य जाहीर करतील आणि त्याने जे केले त्यावर मनन करतील. ¹⁰नीतिमानांनी आमच्या पित्यामध्ये आनंद करावा आणि त्याच्यात आश्रय घ्यावा; सर्व सरळ मनाच्या लोकांनी आनंदाने जयजयकार करावा!