स्तोत्रसंहिता 63

63 ¹हे माझ्या पित्या, तूच माझा पिता आहेस; मी अगदी मनापासून तुझा शोध घेतो. माझा जीव तुझ्यासाठी तहानलेला आहे, पाणी नसलेल्या रुक्ष व शिणलेल्या भूमीत माझे सर्व शरीर तुझ्यासाठी आतुर झाले आहे. ²म्हणून मी पवित्रस्थानात तुझ्याकडे न्याहाळून पाहिले आहे, आणि तुझे सामर्थ्य व तुझे वैभव पाहिले आहे. ³तुझी प्रेमदया जीवनापेक्षा उत्तम आहे, म्हणून माझे ओठ तुझी स्तुती करतील. ⁴म्हणून मी जिवंत आहे तोवर तुला धन्यवाद देईन; तुझ्या नावाने मी माझे हात उंच करीन. ⁵उत्तम पक्वान्नांनी तृप्त व्हावे तसा माझा जीव तृप्त होतो, आणि आनंदित ओठांनी माझे मुख तुझी स्तुती करते.

⁶मी माझ्या अंथरुणावर तुझी आठवण करतो, आणि रात्रीच्या प्रदीर्घ प्रहरांतून तुझे मनन करतो. ⁷कारण तू माझा साहाय्यकर्ता झाला आहेस, आणि तुझ्या पंखांच्या सावलीत मी आनंदाने गातो. ⁸माझा जीव तुला बिलगून राहतो; तुझा उजवा हात मला घट्ट धरून ठेवतो.

⁹पण जे माझ्या जिवाचा नाश करू पाहतात ते पृथ्वीच्या खोल गर्तेत जातील. ¹⁰ते तलवारीच्या स्वाधीन केले जातील; ते कोल्ह्यांचे भक्ष्य होतील. ¹¹पण राजा आमच्या पित्यामध्ये आनंद करील; आमच्या पित्याची शपथ वाहणारे सर्व जण उल्हास करतील, कारण लबाड्यांची तोंडे बंद केली जातील.