शलमोनाचे गीत 3

3 ¹रात्रभर माझ्या अंथरुणावर मी माझ्या जिवाच्या प्रियकराचा शोध घेतला; मी त्याचा शोध घेतला, पण तो मला सापडला नाही. ²आता मी उठेन आणि नगरात फिरेन, रस्त्यांतून आणि चौकांतून; मी माझ्या जिवाच्या प्रियकराचा शोध घेईन. मी त्याचा शोध घेतला, पण तो मला सापडला नाही. ³नगराची राखण करत फिरणाऱ्या पहारेकऱ्यांना मी भेटले. “माझ्या जिवाच्या प्रियकराला तुम्ही पाहिले आहे का?” ⁴मी त्यांना ओलांडून पुढे गेले नाही तोच मला माझ्या जिवाचा प्रियकर सापडला. मी त्याला धरून ठेवले आणि जोपर्यंत मी त्याला माझ्या आईच्या घरी, जिने मला गर्भात धारण केले तिच्या खोलीत आणले नाही, तोपर्यंत मी त्याला जाऊ दिले नाही. ⁵यरुशलेमेच्या कन्यांनो, रानातील हरिणी व सांबरींची शपथ घालून मी तुम्हांला बजावते: जोपर्यंत प्रीतीची इच्छा होत नाही, तोपर्यंत तिला चाळवू नका किंवा जागवू नका.

⁶धुराच्या स्तंभांसारखी, गंधरस व ऊद यांनी सुगंधित झालेली, व्यापाऱ्याच्या सर्व सुवासिक चूर्णांनी दरवळणारी, रानातून वर येणारी ही कोण आहे? ⁷पाहा—ही शलमोनाची स्वतःची पालखी आहे, इस्राएलाच्या वीरांपैकी साठ वीर तिच्याभोवती आहेत, ⁸ते सर्व तलवारी धारण करणारे, युद्धात तरबेज आहेत, रात्रीच्या भयापासून रक्षण करण्यास प्रत्येकाची तलवार त्याच्या कमरेला आहे. ⁹शलमोन राजाने लबानोनाच्या लाकडापासून स्वतःसाठी पालखी बनवली. ¹⁰त्याने तिचे खांब रुप्याचे, तिची पाठ सोन्याची, तिचे आसन जांभळ्या रंगाचे बनवले; तिचा आतील भाग यरुशलेमेच्या कन्यांनी प्रेमाने जडवला. ¹¹सीयोनेच्या कन्यांनो, बाहेर या आणि शलमोन राजाकडे न्याहाळून पाहा, त्याच्या विवाहाच्या दिवशी, ज्या दिवशी त्याचे हृदय आनंदित झाले, त्या दिवशी त्याच्या आईने त्याच्या मस्तकी घातलेला मुकुट परिधान केलेल्या राजाकडे पाहा.