Masotna Pemtinghai Kasaikha

Laa kasingabing akuili. Davidwui laa lairik akha. Laa akha.

Masotkhami chingri eina hokthāngda lui ngavaokazā eina zanga. Ithumwui Avāna khayonkhamāng pheomi kala okathui akatangwui eina seihā shāmi, chieina zingkum chili lukhumsangmi: luiwuk tara̱ chaimi, kaphungbing mathānna pemtinghai, seihomphung kala hupta ngarumda vaoshoka.

Chapter 65.

O ithumwui Avā, Zionli masotna kasaikha eina nali ngaraili; kala ithumwui khangashit nali ungshung ngasakra.

Nana seihā kasā nganā, kala mi saikorana nali rāra. Moreina ili kheizata tharan, nana ithumwui khayonkhamāng pheomi. ^a Nana kapangkhuida nali nganaida khuivāda nawui kayāngli okthui khavai a chi sokhamina! Ithumna nawui shimwui kaphāna chipemra, nawui khorumshimwui katharna.

Nana ithumli khamashung khangarongwui khangachee khangachā otsak eina ngahānkā, O ithumli huikhame ithumwui Avā, okathui akatanga saikora kala tāmeikap shamadruwui kachihān, awui yāng eina kaphungbing sakā kahaina, pangshap eina chonvai sākahaina; shamadruwui khangang chi chingrihai ngasakkhame, athumwui khangaphaowui khangang, kala yurbingwui rotkhamarāt. Okathui akatangli kapambingna nawui machutkakhuibingli ngacheerang eina nganingra; nana kazing kathang kala ngazinshong chili panglāk eina vao ngasaka.

Nana ngaleili yangmida tara̱ chaimi; nana chili mavātla chungsang ngasaka. Ithumwui Avāwui kongrei tara̱na pemtinghai; nana mibingli athumwui mā mira, kaja chithāda nana ngalei ngarānhai kahaina. Nana chiwui tinkhurbing tara̱na yingasaka, kala chiwui kajujuibing tāngpat ngasaka; nana chili zingrot eina timfa ngasaka, kala chiwui kashon chi somi. Nana nawui kaphāna zingkumli kuihon sangmi, kala nawui shongfabing heiunna pemtinghai. Lamhāngwui seihomphungbing pemtha̱-pemtai ngasaka, kala phungrābing khamathān eina shaksai. Wonnui katimpambing yaoshangna chonvai sāhaira, kala tampākbing māna ngaphumhaira; athum panglāk eina vaoda laa sāruma.