Laa Kadhar Akha
Laa akha.
Kashap kahai otwui vang ngamāngkhavai laa — ithumwui Avāna awui pāngna huikhami, kala khangayang yurbingli ngamāng eina chitheikhami, Israelli tuingashit mayonda. Chieina lamayānbing ngahonga, luibingna pāng ngaphaoda phungreibingna laa sāa, khikhalajila ana mashun eina bichar sākhavai rāda lei.
98 1Ithumwui Avāli laa kadhar sālu, kaja ana matakhak kahai ot sāhaira; awui yāpāng kala awui kathara pāngthei eina huikhami samphanghaira. 2Ithumwui Avāna awui huikhami theingasakhaira; yurbingwui miktāli awui khamashung khangarong chitheimihaira. 3Ana awui makhangachei leikashi kala awui ningkatong Israel shimkhurli phaningunga; okathuiwui akatang saikorana ithumwui Avāwui huikhami theihaira.
4Okathui hupta ithumwui Avāli khamathānkhon vaolu; khamathānwui vang laa sāphokta masotlaa sālu. 5Tingteilā kala ningkhamayung laawui khon eina, tingteilā singda ithumwui Avāli masotlaa sālu. 6Talla̱ kala seingaji khon eina, Awunga ithumwui Avāwui mangāli khamathānkhon vaolu.
7Shamadruna ngaphaoranu, kala chiwui alungli khalei saikorala; okathui kala chiwui alungli kapam saikorala. 8Kongbingna athumwui pāng kapheranu; phungrābingna khamathānwui vang laa sāngarumranu, 9Ithumwui Avāwui mangāli, kaja ana okathuili bichar sākhavai rai. Ana apuk-apagali khamashung khangarong eina, kala mibingli mashun eina bichar sāra.
