A Tüsozhoko Kerhü Lebi Zo

Job pü kehü cetao münü mu zhokhri küyimi zhokhro fü keyi bi thi tsü: tüzü laco khro khro keba, upho merü keba. Pü mi khava themo. Pü chele kra thi reni, Jihovae dipüla thüma kemelü ketsüsa pesü zi dzü die, mu pü yono i lüno retu khisüte zi cho.

Kezhü 7.

“Thüma cejülü mhatho küzhie ba mome, mu uko tüsozhoko zhokhri küyimi tüsozhoko bi zomo? Cetao pü rüsüh münyü küzü bi, mu zhokhri küyimi pü zhokhro fü bazo bi, Süna i kümürü tekhriko kezapü, mu kemezhe tüzühzho i ce medepü ba. I rü lize i poti, ‘Di küthice i tosü?’ Vele tüzü münu münu bata, mu i tüso laco khro khro rhüh bata. A uthiupho sathi mu cejü meküto thi bepü ba; a upho thi merü, süsa ta mekusü sala tayo. A tüsozhoko thieco mha ceri krüpü vayo, mu kemeri bamo la uko thelaco va. A kemeta kerhü lebi zo süte; i mha keve humi ta ngoyi lho. A tsühi ngopü mhüpü i mha ngoyi lho; neko mhüko i yo bato, vele i dita vato. Kemhü dita de shütayo bi, sübi mezalü sü vomi retu tosü lho; Pü pücelü mha retu lho, mu pü dipü pü mha se yi lho.

“Therho i a mi khava lho; i a rüpü kümüre celü po süto, i a pho jükekhuko lü pacü süto. I jükezho zome, mori jükezho khonu zome, no a yo münumi ketsüo? I poti lize, ‘A thüzi i tho melu süto, a rü a pacü melu süto,’ süsa no umho thi i cieküru, mu vemho thi i mpe vato, Süna i mükre mu kesa a amo hio ceri i keda to. I müka va yo; i kechothe thiyi lho. A khava te, kekrelamori a tüsozhoko kerhü zo.

“Thüma dipü zo, no püo rekrü sü, mu no pü yo n lü ketsü, tüsozho metü keshu no pü nyüsa, mu sütü metülü no pü medophi süo? Di küthice no a yolü n mhü rü pra süto, mu a mhütsa mezo tovekro sü i khava süto? I phoma lize, i noce dipü thi ta, thüma münumi? No dipüla i n dokhri mha thi ve, süna i utho lü püh thi ta? No dipüla a kephoma kejo va mu a kejo müka va mozo? Kekrelamori rekri i cejülü rü to; no i phu süto, vele i dita va to.”