Theno keyi la ha Po mha kethoo

Jisue cemi keyi-o süprühlü ha Poe uko thisü süo celü thi tsa, pü sajiko münyo kesü natsimiko tsüsü, mu mha kükhrüo mhakünemi khresa mipü ce mha metü khi va te zi po. Pü thükri die vava. Thümako ce küto mo keto-o ha Po celü küto zo.

Kezhü 19.

Jisue jü hiko po laco die, Pu Galilee vava die, Jordan rükhüco Judea cejülü vota. Thüma kro küba Pu meshu ta die, Pu süsülü uko thi küsührho va.

Phariseekoe Pu müno na la Puce vori die, Pu küdo die po; “Mipüh-e dipüh mha lamori pu cemi khava püh thüzho me?” zisü.

Pu küla sü die po; “Prühlüno uko thi küsüo ha Poe, thüpumi mu thünomi thisü küti neko se mo zo me, mu po die, ‘Hio lamori mipüh-e pu po mu pu zu vava die, pu cemi züde khrikhro ta thita, thünyi zatho ti ta thita to’? Süla tsühi uko thünyi bamo, zatho ti zo; therü, ha Poe küdi hü küma küsüo thüma kükreoe cekho va hite.”

Pukoe Puce po die; “Süzilize dipüh la Mosae mipüh kha küva lüsi prüte, süpü kha va no süte, zi küti ketsü süo me?” zisü.

Pu sükoce po die; “Neko mülü rüdü te la, Mosae neko cemiko kha küva no süzo, vele prühlüno sübi bamota. I nekoce potü süto; thüma kühopüri, kükhrüküzü lamori lebi mo, pu cemi kha va sü de thüno kükreo ta yi lize, pu kürügü kürüzü thita zo.”

Pu sajiko Puce po die; “Mi nopu mu micemi dolü sübi lize, theno keyi mo zo süo veku zo,” zita.

Pu sükoce po die; “Thüma metüe jü hio ngoyi veyi mo, vele süo prü küsüko lebi ngoyi veto. Püzu nobulü sübi ceyo keyi veyi mo küta miko ba; thüma kükreko e sübi thi küsüo miko ba; mu ha Po kede la themu sübi thi küsüo miko ba. Hio ngoyi veyi küsüoe ngoyi te.”

Jisue Natsimiko Züh Keyi

Sücesü natsimiko Puce züh vorita, Pu uko po be thita die prayi na la; vele sajiko uko kezü keyiko lüda va.

Vele Jisue po die; “Natsimiko ace vori na khe, uko hodo thi hite, kekrelamori ha Po kede-o hiko bi küta miko züko zo.”

Mu Pue uko po be thita die, süsülüno vota.

Pu Mha Ti Lacü Küsüo

Sücesü mi püh Puce vori die po; “Kemethao, hü keketi ngoyi na la, I mha kevelü dipü thiyi na?” zisü.

Pue puce po die; “Dipü la mha kevelü la ace po süe? Kevelü-o ti lebi zo. No hü lü lüti nyi lize, ketsüko thi mu züyite.”

“Dipü ketsüko la?” zisü. Jisue po die; “Mi dokhri hi, kükhrü küzü hi, mi rego hi, kemeda zhopo thi hi, n po n zu rhoyite, mu n tho n khrü küma, n thephe thümako khrüyite.”

Khresa Puce po die; “Hiko metü I thi mu züta, tsühi I dipü lacü ba?” zisü.

Jisue puce po die; “No küve ti nyi lize, vo die, n mhapüzhüko zhuyi te, mu mha küdimiko prü te, süsa no tüyolü cene ngoto; sücesü vori die, a meshu te.”

Khresa hio se küsüce, pu thü süsa de tata, kekrelamori pu mhaküne shüh kübami la.

Jisue pu sajiko ukoce po die; “Mhakejülü I nekoce potü süto, kene mipüh-e ha Po kede lü lü keyi ceri hota. I nekoce menu potü süto; Kene mipüh-e ha Po kede lü lü keyi ceri lü, Ut püh-e theprü celü lü keta reyi ku to.”

Sajiko hio se küsüce, uko malhü thi mizü ri zota die po; “Süzilize sopüh-e külayi veta?” zisü.

Jisue uko ngosü die po; “Hio thüma la thiyi kehoko zo, vele ha Po la mha mütü thiyi ve zo.”

Süsa Peter-e Puce po die; “Hihe, hako mha mütü vava die, No meshu ta; süzilize hako dipü ngoto?” zisü.

Jisue sükoce po die; “Mhakejülü, uthi kesa sa lü, Mi Nuo pu therho küba kedeba lü sitsü de, I meshu küta nekoe ri kedeba shuye kerikena kolü sito, side Israel shuye kerikena koyo sheco ketito.

Thüma kehopüri, a za la, kethi mori sazü mori sazüpü mori po mori zu mori nunyi mori yi vava küsüoe, püse krapüh menu ngoto, mu hü keketi ri ngoto. Vele kethethi küta kükroe laco thito, mu laco küta kükroe thethi thito.”