Ha Poe Mi Melü Dojü Peto

Cekro kümüzhelü: kümüli no khava süo nü kesülü kede, mhaseyi thekümi mithekümi münga küzhomi nuo yo anghto, u nune nuyie kehükrümiko küde zo. Kekhayie dipü thiyo pü ngode poyo—mhakesu kethimi melülü mhakesu lebi phu bi, künyomi la mükhi püvü zü ce zho; mu kekre thüma pü ce rhoyo.

Kezhü 17.

Kemekre lü kesao tekrü keho süo, de hu ngotho chupü küzhe mo tipü ce zhoku veto. Mhaküse mithekümi münga küzhomi nuo yo anghto, mu sazüh dolü mhakha na peto. Rüna la melü thükhapü ba, ser la khapü ba, vele ha Poe mi melü dojü peto. Mhakesu kethimi mesakemo mülü fü reniyo; kücejümi keva kelü meyi fü reniyo. Thüma kehopüri küdimi krühnyi süo pü makeba rüdayo; thüma kehopüri mha medi vayo lü nüyo sü, pu puni mozo kematho. U nune nuyie kehükrümiko küde zo, mu nunekoe zapozale uko utho ukrüne zo. Keve kepo künyomi la revo mo—mori kücejü mülü mha kezhomi la ri zhoku revo mo. Thejü pe kesüo la, süo thenyü medu bi ngoyo; pü dipüce vota sheri, pü arevü to zisü thino. Thüma kehopüri mejo vo süo kekhrü phuyo, vele thüma kehopüri süo sala sala poyo sü khrethoko kreyo. Kethisü mipü mhakesemi melülü tho votayo, künyomi la va kümükhi püvü ce zhoku. Kekhayi kehomi mhakesu lebi phuyo, mu pü yo keta saju kepomi ketsü süto. Nune rügoyi tice sathü tü pü süo, pü künyodzülü künyomi tü pü süo zhoku veto. Mhace humi mhakeve zhokhro mhakesu retu lize, pü de hu lüno mhakesu mhatho tahi prajüho. Küzhe shudü süo jü rüo rephü khava bi zo, süla süo pügu kezüce kepide kha vate. Thüma kehopüri mezikemokolü mezi süo, mu thüma kehopüri kemathomi mejo süo—botho-o Ha Po mhüjülü keretse zo. Künyomi la pü belü mhakese khrisü rüna dipü bate, pü seküyi melü bamo zori? Khretho mhametü tilü khrüyo, mu sazüh mha kemezhe timesü la menu kevao. Mhakese kümomi be ketsü de dzü rao, mu pü usüzanumi la zhokhro putsü. Thüma kehopüri küjo khrü süo küzhe khrüyo; thüma kehopüri pü keho kethelü huzo sü medi va cüyo. Melü kereviko mhakeve ngoyi mo, mu meyi kerevi mha kemezhe lü prüyo. Thüma kehopüri künyomi menu sü, pü utho lü lüzhe kevo; müsakümo künyomi po la nü bamo. Lünyi melü medi keve zo, vele sata rüpüoe uro kesao süyo. Mhakesu kethimi thejü taketa, mükhrühlü thece mejo cho bü süsü. Mhakesemi mhüjülü mhakese bayo, vele künyomi mhü cejü metülü mürhü vato. Künyomi nuo pü po la lüzhe zo, mu pü menupü zü la jükekhu zo. Kemathomi puni süo keve mo, mori mha kezhomi uko sürhü sürho la vüva süo ri keve mo. Thüma kehopüri pü po kheyo sü mhase bayo, mu kemekre rüpü ba kesüo mhakesemi zo. Künyomi sileo ba kesüo sheri mhakesemi zisü thino; pü mülü khave, pü mhakesemi bi ngoyo.