Hezekia mhakhrüpü

Hiko Judah küdeo Hezekia miko lesidalü thopü Solomon jüveko zo, mu süo mha kemevelü puko kemetse tila: suna dzü, makrekro meso, kümhü türü kemo, mu mele melüyi nade. Pü mhashe mhatho kerelütho zo, küde mhüjülü rushüh tahi lamori celü, n khikhromi ki zümo thi ba tsü ketso.

Kezhü 25.

Hiko sheri Judah küdeo Hezekia miko lesidalü thopü Solomon mhsejüko zo. Mha resü khasü ha Po zapozale zo, vele mha phukesüo küdeko zapozale zo. Tüyo zhokuti mu cejü kerelütho sü, sübi küdeko kelü phutso keyimo zo. Presa celü küsuo khite, side presa thipümie loo thito. Küdeo mhüjülü kükreko khite, side püde zaco mezilü kha thito. Küdeo mhüjülü notho midolü süri tahi, mu kezhoko zalü süri tahi; Kekrelamori, “Hilü tsü vote,” ziyi kesü veku zo, no ngo keta kezhomi mhüjülü renuku zalü sü kesü celü. Mi zü küprülilü rushüh tahi, kekrelamori ngomulü no dibi thito, n khikhromie no münga thi süla? N mha n khikhromi züde tho kemeli te, vele amedo resü revayi tahi, Molize süo rüniyo thümae no münga thi, mu n mithapü küsu theri taho. Timesho veku lü jüpo kesü dzüo presa belü suna zhü sübizo. Suna bekha mori suna kevetho kedepira sübi, rünyiyo thümace mhase tarho zo. Mhapo kesü timesholü makrekro meso sübi, jütho shoyio pü ketsü kesüo ce zo; püe pü niepomiko mhanyo kürü süto. Türü kemo kümhü mu tükhra sübi, tsü kemo mhaküsüo kemeha thümao zo. Patilü dolü kemele melüyi to, mu talü kümünü züro küku to. No mükhizü ngoyi lize, n khrüpü sü ti te; molize no kükro ti die utho süto. N khikhromi ki zümo zümo vori tahi, molize pü no nyü tari die no murho süto. Thüsü, zecho, mu thei kütsü sübi, pü khikhromi celü kücezü zhopo utü thümao zo. Hu küsu mori phe küsa sübi, kürüh timesholü dzütho kemo thüma melü kesüo zo. Meso nyilü khüne khi kesü sübi, küza lü dzükhu pai kesü sübi, müsi kelü ce tsale thi kesüo zo. N ngomumi khü meri lize, mhapü tiyi khapü pü süte; mu pü thiri lize, jü mekra khapü pü süte; Kekrelamori no püpiyo keto meyikrapü hipü to, mu ha Po-e no zhokhro thipü prüto. Mesoco tükhrae türü vori süto, mu küsu resüpü talü nümo mhü thi süto. Kümüli cemi zü kezüde kilü hü kesü celü, cejüthu kolü hü kesü veku zo. Nyü ta mhanyo ce meso jüo sübi, kemecu rüna celü ketho po kere zo. Nyoba thipü dzüpra mori kereshü jüfü sübi, kükreko mhüjülü regü keta mezi thümao zo. Mükhizü kükro ti kesü kümo zo, n tho n zapozale phu kesü ri kümo zo. Pü tho pü rüpü mejo keku kemo thümao, sazho kemo die retu keta nadeo sübizo.