David-e Sileo de Münu Keba
Tsale kethifü kezhooce, Jeduthun po. David-e chele.
David mesakemo miko ngode baba 'münuto, mha jüpo kemo' de pü thüta, süsa sileo süoe kemezhe suku süta, mejolü phoyo ta. Phoyo süo hio zo: 'A Po, a thüla I tha süte, a tütse dipü kro züla, a nha mürüh la zo seyi te' die cü, mu pü ta mpe pü phimezhe te die cü.
39 1I poti die, “I a chokolü münuto, süsa a se kemojülü phoma mozo; sekemoko a hupü kebatüce I a mülü kübao basü tayo.” 2I jüpo keho de sileo bata; mhakeveko sheri I sileo bata, süla a kemezhe suku ketala. 3A mülü a melü lü ketala; I süo lüyo kolü me thüta; süsa I poti: 4A Po, a thüla I tha süte, mu a tütse kro dipü züla; I dipü aphrünyi zola se te.
5Yhie, noe a nha tsazo mürüh thisü, süla a kerhüro no ce nothi zo. Sizo thüma metü kerhü merezü zo. 6Sizo thüma metü keso bi malhü tayo; sizo uko kebu metü nothi la; pü ceneko küngu süyo, vele sopü süo kengu süto püe semo. 7Süsa tsü, Niepoo Apo, I dipü meri ba? A saju no yo zo. 8A phoma metülü celü I küla süte; kümüloo zhoshu I thi tahite. 9I jüpo keho; I a mülü khakhri mo, kekrelamori noe süo thipü la. 10Alü n dipü khipü düte; n be kedoo la I mezoyi ta.
11Lekhu süde phoma sheri noe thüma methi süyo; silhü bi pü ceneko noe mezoyi süyo; sizo thüma metü kerhü merezü zo. 12A Po, a prayi reni süte, mu a semeto reni süte; a mhüdzü kri menu hite; kekrelamori I no züde malhü mi merezü zo, a potsaneko metü bi reso mi zo. 13Alü n mhü khipü düte, süsa I sala nüswüto, I tata de nothi zoto meri.
