Pue Pu miko khava motato
Samepü miko mu rüsomiko say die mipüri ngo mo zisü lüpü thümako ce po kethi Chele. Kela khava süo mhase kükre: shusü kebao reni mome? Mezi lü utho yi po: aphe shü keyo zita po lize, a Po jükho kekhrü-e a tozu.
94 1Khüpo kethipü ha Po—ha Po; khüpo kethipü ha Po, keve thiyite! 2Cejü khüpo kethipü, tosütha süte; kemeha kemeko ketakoce uko kropü süo tsüte. 3Kürüzüko mücho kesüce, ha Po—kürüzüko mücho kesüce unüphito tatato?
4Uko kemeha jü paiyo; mhakesu kesako metü uko mha meho tayo. 5Ukoe neko miko megünyo die, ha Po, neko kalüo süsazü shetibayo. 6Ukoe samepü mu sekemo sayo, mu po kemokopo dokhri vayo. 7Uko po die, “Niepoo ngomo; Jacob Jihovae süo seba mota.”
8Miko dolü melü mezüko, utütso thite; ne kemeloko, mücho kesüce neko kesemi tato? 9Uni shusü kebao reni mome? Mhü müra kesü kebao ngo mome? 10Miko metha kebao, thüma mhase metha kebao, uko tarho mome? 11Ha Po thüma lüdoko seba, süko kerhü la zo zisü.
12Ha Po, noe methi die neko thezho celü metha kebao thümae hisa ngoyiyo, 13müzhie bavüdo celü püce thomelu süde, kürüzüko po tekhülü prü ngoyi ceneko batato. 14Kekrelamori ha Po Pu miko khava motato; Pue Pu kalü tsüzi motato. 15Kekrelamori khüpo kümathoko ce retu, mu mülü jütho metüe süo füzü.
16Kürüzüko mütsu ayo mipüe tosütha tato? Mhakesu kesako mütsu ayo mipüe thayi tato? 17Ha Po a khrühi sü kemola lize, a khri mecho mode sa sileo lü vo lhü batato. 18I, “Aphe shü keyo,” zita po lize, neko jükho kekhrü, ha Po, akekriyi süta. 19Alü tsakhu metü khapü kezho bata lize, neko thomelu a khri anü süta.
20Thezho lü mezikemo thosü kürüzü bodü noyo züde ba veme? 21Kümathoko rhü mütsu uko hoshü die, kekri mozokoyo sa müjoyo. 22Vele ha Po a khakesüo le tata, mu ha Po a rezhüyi leo ketsü zo. 23Pue uko küphoma uko lü retu süde, uko mhakesu la uko müdi vato; ha Po uko müdi vato.
