Esta 5

5 ¹Siku ya tatu, Esta akavaa mavazi ya kifalme, akasimama katika ua wa ndani wa jumba la mfalme, akiuelekea ukumbi wa mfalme. Naye mfalme alikuwa ameketi juu ya kiti chake cha enzi ndani ya ukumbi, akiuelekea mlango wa jumba. ²Mfalme alipomwona Malkia Esta amesimama katika ua, akapata kibali mbele yake, naye akamnyooshea ile fimbo ya dhahabu iliyokuwa mkononi mwake. Basi Esta akasogea, akaugusa ncha yake.

³Mfalme akamwuliza, "Una nini, Malkia Esta? Ni ombi gani lako? Hata nusu ya ufalme utapewa."

⁴Esta akasema, "Kama ikimpendeza mfalme, na aje mfalme pamoja na Hamani leo kwenye karamu niliyoiandaa."

⁵Mfalme akasema, "Mleteni Hamani upesi ili tufanye kama Esta alivyosema." Basi mfalme na Hamani wakaja kwenye karamu aliyoiandaa Esta.

⁶Walipokuwa wakinywa divai, mfalme akamwuliza Esta, "Ni haja gani yako? Nawe utapewa. Nalo ombi lako ni nini? Hata nusu ya ufalme—ni yako."

⁷Esta akajibu, "Haja yangu na ombi langu ni hili: ⁸Kama nimepata kibali mbele ya mfalme, na kama ikimpendeza kunikubalia haja yangu na kunitimizia ombi langu, basi mfalme na aje pamoja na Hamani kwenye karamu nitakayowaandalia. Kesho nitafanya kama mfalme asemavyo."

Ghadhabu ya Hamani Yamgeukia Mordekai

⁹Siku ile Hamani akatoka akiwa na furaha na moyo mkunjufu. Lakini alipomwona Mordekai kwenye lango la mfalme, wala hakusimama wala kutetemeka mbele yake, Hamani akajaa ghadhabu juu ya Mordekai. ¹⁰Hata hivyo, Hamani akajizuia, akaenda nyumbani kwake. Akatuma watu wawaite rafiki zake na Zereshi mkewe, ¹¹Hamani akawaeleza fahari ya utajiri wake, na wingi wa wanawe, na jinsi mfalme alivyomheshimu na kumpandisha cheo juu ya wakuu na watumishi wa mfalme.

¹²Hamani akaongeza, "Wala si hayo tu. Malkia Esta hakumwalika mtu mwingine pamoja na mfalme kwenye karamu yake ila mimi peke yangu, nami nimealikwa tena kesho pamoja na mfalme. ¹³Lakini haya yote hayanifai kitu kila ninapomwona Mordekai, yule Myahudi, ameketi kwenye lango la mfalme."

¹⁴Zereshi mkewe na rafiki zake wote wakamwambia, "Waamuru watengeneze mti wenye kimo cha dhiraa hamsini. Asubuhi mwombe mfalme atundikwe Mordekai juu yake. Ndipo uende pamoja na mfalme kwenye karamu ukiwa na furaha." Jambo hili likampendeza Hamani, akausimika ule mti.