Ayubu 22

22 ¹Ndipo Elifazi Mtemani akajibu: ²"Je, mwanadamu aweza kumfaidia Mungu? Hakika mtu mwenye hekima hujifaidia mwenyewe tu. ³Je, ni furaha yoyote kwa Mwenyezi ikiwa wewe ni mwenye haki, au ni faida yoyote kwake ikiwa unaishi bila lawama? ⁴Je, ni kwa sababu ya uchaji wako ndipo anakukemea na kukuleta hukumuni? ⁵Je, uovu wako si mkuu? Je, dhambi zako si zisizo na mwisho? ⁶Kwa maana uliwadai ndugu zako rehani bila sababu na kuwavua nguo walio uchi. ⁷Hukumpa maji aliyechoka anywe, nawe ulimzuia mkate mwenye njaa. ⁸Mtu mwenye nguvu aliimiliki nchi, na aliyependelewa aliishi ndani yake. ^a a v8 Elifazi anadokeza kuwa Ayubu aliichukulia nchi kuwa mali ya wenye nguvu peke yao, akiwaacha maskini bila kitu. ⁹Uliwaondoa wajane mikono mitupu na kuivunja mikono ya yatima. ¹⁰Ndiyo maana mitego imekuzunguka, na hofu ya ghafla inakulemea; ¹¹au giza, hata usiweze kuona, na mafuriko ya maji yanakufunika. ¹²Je, Mungu hayuko katika vilele vya mbingu? Tazama jinsi nyota zilizo juu zaidi zilivyo juu! ¹³Lakini wewe wasema, 'Mungu anajua nini? Je, aweza kuhukumu katika giza nene namna hii? ¹⁴Mawingu mazito yanamfunika hata asiweze kuona, naye anatembea juu ya anga la mbingu.' ¹⁵Je, utaishika njia ya kale ambayo watu waovu waliitembea? ¹⁶Walinyakuliwa kabla ya wakati wao, msingi wao ukasombwa na mafuriko. ¹⁷Walimwambia Mungu, 'Tuache! Mwenyezi aweza kutufanya nini?' ¹⁸Lakini ni yeye aliyezijaza nyumba zao mema—hivyo mimi sitaki kuwa na sehemu yoyote katika mipango ya waovu. ¹⁹Wenye haki wanaliona na kufurahi; wasio na hatia wanawadhihaki waovu, wakisema, ²⁰'Hakika adui zetu wameangamizwa, na moto umeteketeza walichokiacha.' ²¹Nyenyekea kwa Mungu sasa na uwe na amani naye; kwa njia hii mema yatakujia. ²²Pokea mafundisho kutoka kinywani mwake, na uyahifadhi maneno yake moyoni mwako. ²³Ukimrudia Mwenyezi utarejeshwa; ukiuondoa udhalimu mbali na nyumba yako, ²⁴na kuiweka dhahabu yako mavumbini, dhahabu ya Ofiri kati ya mawe ya bondeni, ^b b v24 Ofiri ilikuwa maarufu katika ulimwengu wa kale kama chanzo cha dhahabu iliyo bora kabisa. ²⁵ndipo Mwenyezi mwenyewe atakuwa dhahabu yako, fedha yako ya thamani. ²⁶Ndipo utakapofurahia katika Mwenyezi na kumwinulia Mungu uso wako. ²⁷Utamwomba, naye atakusikia, nawe utazitimiza nadhiri zako. ²⁸Utakachoamua kitatimizwa, na nuru itaangaza juu ya njia zako. ²⁹Wengine watakaposhushwa nawe useme, 'Wainueni!', yeye atawaokoa walioinama. ³⁰Atamwokoa hata yule asiye na hatia, ambaye ataokolewa kwa usafi wa mikono yako."