Ayubu 23

23 ¹Ndipo Ayubu akajibu: ²"Hata leo malalamiko yangu ni machungu; mkono wake ni mzito juu ya kuugua kwangu. ³Laiti ningejua pa kumpata, ili nifike hata makao yake! ⁴Ningeweka mashtaka yangu mbele zake na kujaza kinywa changu hoja. ⁵Ningejifunza maneno ambayo angenijibu na kuelewa yale ambayo angeniambia. ⁶Je, angeshindana nami kwa ukuu wa nguvu zake? La—bila shaka angenisikiliza. ⁷Hapo mtu mnyofu angeweza kuhojiana naye, nami ningeachiliwa huru milele na mwamuzi wangu. ⁸Lakini niendapo mashariki, hayupo; nami magharibi siwezi kumpata. ⁹Afanyapo kazi kaskazini, siwezi kumwona; ageukapo kusini, siwezi kumpata. ¹⁰Lakini yeye anaijua njia niiendeayo; atakaponijaribu, nitatoka kama dhahabu. ¹¹Mguu wangu umeshika nyayo zake; nimeishika njia yake wala sikugeuka kando. ¹²Sikuiacha amri ya midomo yake; nimeyathamini maneno ya kinywa chake kuliko chakula changu cha kila siku. ¹³Lakini yeye habadiliki—ni nani awezaye kumzuia? Chochote akitakacho, hukifanya. ¹⁴Kwa maana atatimiza yale aliyoniagizia, na mambo mengi kama hayo yamo moyoni mwake. ¹⁵Ndiyo sababu ninatetemeka mbele zake; niyafikiripo, ninamwogopa. ¹⁶Mungu ameufanya moyo wangu kuzimia; Mwenyezi amenitia hofu. ¹⁷Lakini sikunyamazishwa na giza, wala na kiza kinene kinifunikacho uso wangu."