Ayubu 24

24 ¹"Kwa nini Mwenyezi haweki nyakati za hukumu? Kwa nini wale wamjuao kamwe hawazioni siku zake? ²Waovu huhamisha mawe ya mpaka; hunyakua makundi na kuyachunga kama yao wenyewe. ³Humwondoa punda wa yatima; huchukua ng'ombe wa mjane kuwa rehani. ⁴Huwasukuma wahitaji watoke njiani, hata maskini wa nchi wanalazimika kujificha. ⁵Tazama—kama punda-mwitu jangwani, maskini hutoka kwenda kazini mwao, wakitafuta chakula; nyika huwapa watoto wao mkate. ⁶Huvuna malisho katika mashamba yasiyo yao na kuokota masalia ya shamba la mizabibu la mwovu. ⁷Hulala usiku uchi, bila nguo, bila cha kujifunika dhidi ya baridi. ⁸Hulowa kwa mvua za milimani na kujikusanya karibu na mwamba kwa kukosa hifadhi. ⁹Mtoto yatima hunyakuliwa kutoka kwenye titi, na mchanga wa maskini huchukuliwa kuwa rehani. ¹⁰Huzunguka uchi, bila nguo; wakiwa na njaa, hubeba miganda. ¹¹Kati ya mibuni ya mizeituni hukamua mafuta; hufanya kazi ya mashinikizo ya divai, lakini wana kiu. ¹²Kutoka mjini wanaokufa hulia kwa uchungu, na koo za waliojeruhiwa hupiga kelele kuomba msaada—lakini Mungu hamshtaki yeyote kwa uovu.

¹³"Kuna wale wanaoiasi nuru; hawazijui njia zake wala kukaa katika mapito yake. ¹⁴Alfajiri muuaji huamka kuwaua maskini na wahitaji, na usiku huzurura kama mwizi. ¹⁵Jicho la mzinzi hungojea giza la jioni, akifikiri, 'Hakuna jicho litakaloniona,' naye huuficha uso wake. ¹⁶Gizani huvunja nyumba za watu; mchana hujifungia ndani, kwa maana hawataki kufanya lolote na nuru. ¹⁷Kwa maana giza nene ni asubuhi kwao wote; wamezoea vitisho vya giza.

¹⁸"Lakini wewe wasema wao ni wepesi juu ya uso wa maji; fungu lao la ardhi limelaaniwa, wala hakuna ageukiaye mashamba yao ya mizabibu. ¹⁹Kama vile ukame na joto huiondoa theluji iyeyukayo, ndivyo kaburi liwanyakuavyo waliotenda dhambi. ²⁰Tumbo lililowazaa huwasahau; funza huwafanyia karamu; hawakumbukwi tena, na uovu huvunjwa kama mti. ²¹Humwinda mwanamke tasa asiyezaa mtoto na hawaonei mjane huruma.

²²"Lakini kwa nguvu zake Mungu huwaburuta wenye nguvu; hujiinua, wala hakuna aliye na uhakika wa uhai wake mwenyewe. ²³Mungu huwaacha wapumzike salama, nao hutegemea hilo, lakini macho yake yako juu ya njia zao. ²⁴Hutukuzwa kwa kitambo kidogo, kisha hawapo tena; hushushwa chini na kukusanywa kama watu wote, hukatwa kama masuke ya nafaka. ²⁵Kama si hivyo, ni nani awezaye kunithibitisha kuwa mwongo na kuyafanya maneno yangu kuwa si kitu?"