Mithali 12

12 ¹Apendaye adabu hupenda maarifa, bali achukiaye kurekebishwa ni mpumbavu. ²Mtu mwema hupata kibali kwa Baba yetu, bali yeye humhukumu mtu afanyaye hila za uovu. ³Hakuna mtu awezaye kuimarishwa kwa uovu, bali mzizi wa wenye haki hautaondolewa kamwe. ⁴Mke mwenye tabia adhimu ni taji ya mumewe, bali aletaye aibu ni kama uozo mifupani mwake. ⁵Mipango ya wenye haki ni ya adili, bali mashauri ya waovu ni ya udanganyifu. ⁶Maneno ya waovu huotea ili kumwaga damu, bali usemi wa wanyofu huwaokoa wasio na hatia. ⁷Waovu hupinduliwa wasiwepo tena, bali nyumba ya wenye haki itasimama. ⁸Mtu husifiwa kwa kadiri ya busara yake, bali mwenye moyo uliopotoka hudharauliwa. ⁹Afadhali kuwa mnyonge na kuwa na mtumishi kuliko kujidai ukuu na kukosa chakula. ¹⁰Mwenye haki hujali mahitaji ya wanyama wake, bali hata huruma ya waovu ni ukatili. ¹¹Alimaye shamba lake atakuwa na chakula tele, bali afuataye mambo ya ubatili hana akili. ¹²Waovu hutamani nyara za watu wabaya, bali mzizi wa wenye haki huzaa matunda. ¹³Mtu mbaya hunaswa kwa maneno yake ya dhambi, bali mwenye haki huokoka kutoka taabuni. ¹⁴Kwa tunda la maneno yake mtu hushibishwa mema, na kazi ya mikono yake humrudia kama thawabu. ¹⁵Njia ya mpumbavu huonekana sawa machoni pake mwenyewe, bali mwenye hekima husikiliza shauri. ¹⁶Mpumbavu huonyesha hasira yake papo hapo, bali mwenye busara hupuuza tukano. ¹⁷Anenaye kweli hutoa ushuhuda wa haki, bali shahidi wa uongo husema uongo. ¹⁸Maneno ya uzembe huchoma kama upanga, bali ulimi wa mwenye hekima huleta uponyaji. ¹⁹Midomo ya kweli hudumu milele, bali ulimi wa uongo hukaa kitambo kidogo tu. ²⁰Hila hujaza mioyo ya wale wapangao uovu, bali furaha ni ya wale waenezao amani. ²¹Hakuna baa limpatalo mwenye haki, bali waovu wamejaa taabu. ²²Midomo ya uongo ni chukizo kwa Baba yetu, bali watendao kwa uaminifu ni furaha yake. ²³Mwenye busara huficha maarifa yake, bali moyo wa wapumbavu hupayuka upumbavu. ²⁴Mikono yenye bidii itatawala, bali uvivu huishia katika kazi ya kulazimishwa. ²⁵Wasiwasi hulemea moyo, bali neno la wema hufurahisha. ²⁶Mwenye haki humwongoza jirani yake, bali njia ya waovu huwapotosha. ²⁷Mvivu haoki mawindo yake, bali mwenye bidii huthamini mali zake. ²⁸Katika njia ya haki kuna uzima, na katika njia hiyo hakuna mauti.