Mithali 4

4 ¹Sikilizeni, watoto wangu, mafundisho ya baba; sikilizeni kwa makini, mpate ufahamu. ²Ninawapa mafundisho mema, basi msiache maagizo yangu. ³Kwa maana mimi nami nilikuwa mwana kwa baba yangu, mpole na mpendwa wa pekee wa mama yangu. ⁴Alinifundisha, akaniambia, "Moyo wako uyashike maneno yangu; zishike amri zangu nawe utaishi. ⁵Jipatie hekima, jipatie ufahamu; usisahau, wala usiyaache maneno ya kinywa changu. ⁶Usimwache, naye atakulinda; umpende, naye atakutunza. ⁷Mwanzo wa hekima ni huu: jipatie hekima; na kwa vyote uvipatavyo, jipatie ufahamu. ⁸Mthamini, naye atakuinua juu; mkumbatie, naye atakuletea heshima. ⁹Atakuvika kichwani chako taji la neema; atakukabidhi taji la utukufu."

¹⁰Sikiliza, mwanangu, uyapokee maneno yangu, nayo miaka ya maisha yako itakuwa mingi. ¹¹Nimekufundisha njia ya hekima; nimekuongoza katika mapito yaliyonyoka. ¹²Utembeapo, hatua zako hazitazuiliwa; na ukimbiapo, hutajikwaa. ¹³Yashike mafundisho, usiyaache; yalinde, kwa maana ni uhai wako.

¹⁴Usiuguse mguu wako katika njia ya waovu, wala usitembee katika njia ya watendao mabaya. ¹⁵Iepuke, usiipite; geuka na kuiacha, upite mbali. ¹⁶Kwa maana hawawezi kulala usingizi wasipotenda ubaya; usingizi wao huondolewa wasipomkwaza mtu. ¹⁷Wao hula mkate wa uovu na kunywa divai ya udhalimu.

¹⁸Bali njia ya wenye haki ni kama mwanga wa mapambazuko, unaozidi kung'aa hata mchana mkamilifu. ¹⁹Njia ya waovu ni kama giza nene; hawajui kinachowakwaza.

²⁰Mwanangu, yasikilize maneno yangu; utege sikio lako kwa misemo yangu. ²¹Yasiondoke machoni pako kamwe; yahifadhi ndani sana ya moyo wako. ²²Kwa maana ni uhai kwa wale wayapatao, na afya kwa mwili wao wote.

²³Zaidi ya yote, uulinde moyo wako, kwa maana yote uyatendayo hutoka humo. ²⁴Uondoe usemi wa upotovu kinywani mwako, na midomo ya udanganyifu iweke mbali nawe. ²⁵Macho yako na yatazame mbele moja kwa moja; kaza macho yako mbele yako. ²⁶Fikiria kwa makini njia ya miguu yako, nazo njia zako zote zitakuwa imara. ²⁷Usigeuke kuume wala kushoto; ukiepushe mguu wako na uovu.