Zaburi 135

135 ¹Haleluya! Lisifuni jina la Baba yetu; msifuni, enyi watumishi wa Baba yetu, ²ninyi mnaohudumu katika nyumba ya Baba yetu, katika nyua za nyumba ya Baba yetu.

³Msifuni Baba yetu, kwa maana Baba yetu ni mwema; liimbieni jina lake sifa, kwa maana ni kupendeza. ⁴Kwa maana Baba yetu amejichagulia Yakobo, Israeli kuwa milki yake ya thamani.

⁵Kwa maana najua ya kuwa Baba yetu ni mkuu, na Baba yetu mwenye enzi yu juu ya miungu yote. ⁶Yote yaliyompendeza Baba yetu, ameyafanya, mbinguni na duniani, katika bahari na vilindi vyake vyote. ⁷Yeye hupandisha mawingu toka miisho ya dunia; hufanya umeme kwa ajili ya mvua, na kuutoa upepo katika ghala zake.

⁸Aliwapiga wazaliwa wa kwanza wa Misri, wa wanadamu na wa wanyama. ⁹Alipeleka ishara na maajabu kati yako, Misri, juu ya Farao na watumishi wake wote. ¹⁰Aliwapiga mataifa mengi, na kuwaua wafalme wenye nguvu— ¹¹Sihoni mfalme wa Waamori, na Ogu mfalme wa Bashani, na falme zote za Kanaani— ¹²naye akaitoa nchi yao kuwa urithi, urithi kwa Israeli watu wake.

¹³Jina lako, Baba yetu, ladumu milele; kumbukumbu lako, Baba yetu, kwa vizazi vyote. ¹⁴Kwa maana Baba yetu atawatetea watu wake, na kuwahurumia watumishi wake.

¹⁵Sanamu za mataifa ni fedha na dhahabu, kazi ya mikono ya wanadamu. ¹⁶Zina vinywa, lakini haziwezi kunena; zina macho, lakini haziwezi kuona; ¹⁷zina masikio, lakini haziwezi kusikia, wala hamna pumzi vinywani mwazo. ¹⁸Wale wazitengenezao watakuwa kama hizo, na kila mtu anayezitumainia.

¹⁹Enyi nyumba ya Israeli, mhimidini Baba yetu; enyi nyumba ya Haruni, mhimidini Baba yetu; ²⁰Enyi nyumba ya Lawi, mhimidini Baba yetu; ninyi mnaomcha Baba yetu, mhimidini Baba yetu. ²¹Ahimidiwe Baba yetu toka Sayuni, yeye akaaye Yerusalemu. Haleluya!