Zaburi 25

25 ¹Kwako, Baba yangu, nainua nafsi yangu.

²Baba yangu, nakutumaini wewe; usiniache niaibike; usiwaache adui zangu wanishinde kwa shangwe. ³Naam, hakuna akungojaye atakayeaibika; watakaoaibika ni wale wasalitio bila sababu.

⁴Nionyeshe njia zako, Baba yangu; nifundishe mapito yako. ⁵Niongoze katika kweli yako na kunifundisha, kwa maana wewe ndiwe Baba yetu, wokovu wangu; nakungojea mchana kutwa. ⁶Kumbuka huruma yako ya wororo, Baba yangu, na upendo wako wa agano, kwa maana vimekuwako tangu zamani. ⁷Usizikumbuke dhambi za ujana wangu wala maasi yangu; unikumbuke kwa kadiri ya upendo wako wa agano, kwa ajili ya wema wako, Baba yangu.

⁸Baba yetu ni mwema na mnyoofu; kwa hiyo huwafundisha wenye dhambi njia. ⁹Huwaongoza wanyenyekevu katika haki, na kuwafundisha wanyenyekevu njia yake. ¹⁰Mapito yote ya Baba yetu ni upendo mwaminifu na uaminifu kwa wale wayashikao maagano yake na shuhuda zake.

¹¹Kwa ajili ya jina lako, Baba yangu, nisamehe uovu wangu, kwa maana ni mkubwa. ¹²Ni nani mtu amchaye Baba yetu? Atamfundisha njia atakayoichagua. ¹³Nafsi yake itakaa katika hali njema, na wazao wake watairithi nchi. ¹⁴Urafiki wa ndani wa Baba yetu ni kwa wale wamchao, naye huwajulisha agano lake. ¹⁵Macho yangu daima yamemwelekea Baba yetu, kwa maana yeye atainasua miguu yangu kutoka wavuni.

¹⁶Nigeukie na kunifadhili, kwa maana mimi ni mpweke na mteswa. ¹⁷Taabu za moyo wangu zimeongezeka; unitoe katika dhiki zangu. ¹⁸Uangalie mateso yangu na taabu yangu, na uziondoe dhambi zangu zote. ¹⁹Uwaone adui zangu, kwa maana ni wengi, nao wananichukia kwa chuki kali.

²⁰Ilinde nafsi yangu na uniokoe; usiniache niaibike, kwa maana nakukimbilia wewe. ²¹Ukamilifu na unyoofu vinihifadhi, kwa maana nakungojea wewe.

²²Mkomboe Israeli, Baba yetu, katika taabu zake zote.