1 பேதுரு 1

1 ¹இயேசு கிறிஸ்துவின் அப்போஸ்தலனாகிய பேதுரு, பொந்து, கலாத்தியா, கப்பத்தோக்கியா, ஆசியா, பித்தினியா நாடுகளில் சிதறடிக்கப்பட்டு, தெரிந்துகொள்ளப்பட்ட அந்நியர்களுக்கு எழுதுகிறதாவது: ²எங்கள் பிதாவின் முன்னறிவின்படி தெரிந்துகொள்ளப்பட்டு, இயேசு கிறிஸ்துவுக்குக் கீழ்ப்படியவும், அவருடைய இரத்தத்தால் தெளிக்கப்படவும், பரிசுத்த ஆவியானவரால் பரிசுத்தமாக்கப்பட்ட உங்களுக்குக் கிருபையும் சமாதானமும் பெருகக்கடவது.

ஜீவனுள்ள நம்பிக்கைக்குள் பிறந்தவர்கள்

³எங்கள் பிதாவும், நம்முடைய கர்த்தராகிய இயேசு கிறிஸ்துவின் பிதாவுமானவர் ஸ்தோத்திரிக்கப்படுவாராக; அவர் தமது மிகுந்த இரக்கத்தின்படி, இயேசு கிறிஸ்து மரித்தோரிலிருந்து உயிர்த்தெழுந்ததின் மூலமாய், ஜீவனுள்ள நம்பிக்கைக்குள் நம்மை மறுபடியும் பிறக்கப்பண்ணினார்; ⁴அழிவும் மாசும் வாட்டமும் இல்லாத ஒரு சுதந்தரத்திற்குள்ளாகவே நம்மைப் பிறக்கப்பண்ணினார்; அது உங்களுக்காகப் பரலோகத்தில் வைக்கப்பட்டிருக்கிறது. ⁵கடைசிக் காலத்தில் வெளிப்படுத்தப்படும்படி ஆயத்தமாயிருக்கிற இரட்சிப்புக்கென்று, விசுவாசத்தின் மூலமாய் எங்கள் பிதாவின் வல்லமையினால் நீங்கள் காக்கப்பட்டிருக்கிறீர்கள். ⁶பலவிதமான சோதனைகளால் இப்பொழுது கொஞ்சக்காலம் நீங்கள் துக்கப்படவேண்டியதாயிருந்தாலும், அதைக்குறித்து மிகவும் சந்தோஷப்படுகிறீர்கள். ⁷அழிந்துபோகிற பொன் அக்கினியினால் புடமிடப்படுகிறது; அதைப்பார்க்கிலும் அதிக விலையேறப்பெற்றதாய், சோதிக்கப்பட்டு உண்மையுள்ளதாகக் காணப்படுகிற உங்கள் விசுவாசம், இயேசு கிறிஸ்து வெளிப்படும்போது புகழ்ச்சிக்கும் மகிமைக்கும் கனத்திற்கும் ஏதுவாயிருக்கும்படி இவை நேரிட்டன. ⁸நீங்கள் அவரைக் காணாமலிருந்தும் அவரிடத்தில் அன்புகூருகிறீர்கள்; இப்பொழுது அவரைக் காணாதிருந்தும் அவரிடத்தில் விசுவாசம் வைத்து, சொல்லிமுடியாததும் மகிமையால் நிறைந்ததுமாகிய சந்தோஷத்தோடே களிகூருகிறீர்கள்; ⁹உங்கள் விசுவாசத்தின் பலனாகிய ஆத்துமாக்களின் இரட்சிப்பை அடைந்துகொள்கிறீர்கள்.

¹⁰உங்களுக்காக ஏற்படுத்தப்பட்ட கிருபையைக்குறித்துத் தீர்க்கதரிசனம் உரைத்த தீர்க்கதரிசிகள், இந்த இரட்சிப்பைக்குறித்துக் கருத்தாய் ஆராய்ந்து விசாரித்தார்கள். ¹¹தங்களில் இருந்த கிறிஸ்துவின் ஆவியானவர், கிறிஸ்துவுக்கு உண்டாகும் பாடுகளையும் அவைகளுக்குப் பின்வரும் மகிமைகளையும் முன்னறிவித்தபோது, அவர் சுட்டிக்காட்டின காலத்தையும் சூழ்நிலையையும் அவர்கள் ஆராய்ந்தார்கள். ¹²பரலோகத்திலிருந்து அனுப்பப்பட்ட பரிசுத்த ஆவியானவராலே உங்களுக்குச் சுவிசேஷத்தைப் பிரசங்கித்தவர்கள் மூலமாய் இப்பொழுது உங்களுக்கு அறிவிக்கப்பட்ட இந்தக் காரியங்களைக்குறித்து அவர்கள் பேசினபோது, தங்களுக்கல்ல, உங்களுக்கே அவர்கள் ஊழியம் செய்தார்கள் என்று அவர்களுக்கு வெளிப்படுத்தப்பட்டது. இந்தக் காரியங்களை உற்றுப்பார்க்க தேவதூதர்களும் ஆவலாயிருக்கிறார்கள்.

பரிசுத்தராயிருக்க அழைக்கப்பட்டவர்கள்

¹³ஆகையால், உங்கள் மனதை ஆயத்தப்படுத்தி, தெளிந்த புத்தியுள்ளவர்களாய், இயேசு கிறிஸ்து வெளிப்படும்போது உங்களுக்குக் கொண்டுவரப்படும் கிருபையின்மேல் முழுவதும் நம்பிக்கை வையுங்கள். ¹⁴கீழ்ப்படிகிற பிள்ளைகளாய், உங்கள் அறியாமையில் முன்பு நீங்கள் பின்பற்றின இச்சைகளுக்கேற்றபடி இனி உங்களை உருவாக்கிக்கொள்ளாதிருங்கள். ¹⁵உங்களை அழைத்தவர் பரிசுத்தராயிருக்கிறதுபோல, நீங்களும் உங்கள் நடக்கைகளிலெல்லாம் பரிசுத்தராயிருங்கள்.

¹⁶ஏனெனில், “நான் பரிசுத்தராயிருக்கிறபடியால், நீங்களும் பரிசுத்தராயிருங்கள்” என்று எழுதியிருக்கிறது.

¹⁷பட்சபாதமில்லாமல் அவனவனுடைய செய்கைக்குத்தக்கதாய் நியாயந்தீர்க்கிற பிதாவை நீங்கள் தொழுதுகொள்கிறபடியால், இங்கே நீங்கள் அந்நியராய்த் தங்கியிருக்கும் காலத்தைப் பயபக்தியோடே கழியுங்கள். ¹⁸உங்கள் முன்னோர்களால் கைமாறாய் விடப்பட்ட வீணான வாழ்க்கையினின்று, அழிந்துபோகிற வெள்ளியும் பொன்னும்போன்ற பொருள்களால் நீங்கள் மீட்கப்படவில்லை என்று அறிந்திருக்கிறீர்கள்; ¹⁹பழுதற்றதும் மாசற்றதுமான ஆட்டுக்குட்டியாகிய கிறிஸ்துவின் விலையேறப்பெற்ற இரத்தத்தினாலேயே மீட்கப்பட்டீர்கள். ²⁰அவர் உலகத்தோற்றத்திற்கு முன்னே தெரிந்துகொள்ளப்பட்டு, உங்கள் நிமித்தமாய் இந்தக் கடைசிக் காலங்களில் வெளிப்படுத்தப்பட்டார். ²¹அவர்மூலமாய், அவரை மரித்தோரிலிருந்து எழுப்பி, அவருக்கு மகிமையைக் கொடுத்த எங்கள் பிதாவை நீங்கள் விசுவாசிக்கிறீர்கள்; இப்படியாக உங்கள் விசுவாசமும் நம்பிக்கையும் எங்கள் பிதாவின்மேல் இருக்கின்றன.

²²மாயமற்ற சகோதர சிநேகம் உண்டாகும்படி, சத்தியத்திற்குக் கீழ்ப்படிந்து உங்கள் ஆத்துமாக்களைச் சுத்திகரித்துக்கொண்டவர்களாய், சுத்த இருதயத்தோடே ஒருவரிலொருவர் ஊக்கமாய் அன்புகூருங்கள். ²³அழிவுள்ள வித்தினாலல்ல, அழிவில்லாத வித்தினால், அதாவது, ஜீவனுள்ளதும் என்றென்றைக்கும் நிலைத்திருக்கிறதுமான எங்கள் பிதாவின் வார்த்தையினால், நீங்கள் மறுபடியும் பிறந்திருக்கிறீர்கள். ²⁴ஏனெனில், “மனுஷர் யாவரும் புல்லைப்போலவும், அவர்களுடைய மகிமையெல்லாம் வயல்வெளியின் மலரைப்போலவும் இருக்கிறது; புல் உலர்ந்து, மலர் உதிர்ந்துபோகிறது, ²⁵ஆனால் எங்கள் பிதாவின் வார்த்தையோ என்றென்றைக்கும் நிலைத்திருக்கும்.” உங்களுக்குப் பிரசங்கிக்கப்பட்ட வார்த்தையும் இதுவே.