யாக்கோபு 5

5 ¹ஐசுவரியவான்களே, இப்பொழுது கேளுங்கள்; உங்கள்மேல் வரப்போகிற துன்பங்களை நினைத்து அழுது புலம்புங்கள். ²உங்கள் ஐசுவரியம் அழுகிப்போயிற்று, உங்கள் வஸ்திரங்களைப் பூச்சி அரித்துப்போயிற்று. ³உங்கள் பொன்னும் வெள்ளியும் துருப்பிடித்தது; அந்தத் துரு உங்களுக்கு விரோதமாய்ச் சாட்சியாயிருந்து, அக்கினியைப்போல் உங்கள் மாம்சத்தைத் தின்னும். கடைசி நாட்களில் நீங்கள் ஐசுவரியத்தைக் குவித்துக்கொண்டீர்கள். ⁴இதோ, உங்கள் வயல்களை அறுத்த வேலையாட்களுக்கு நீங்கள் கொடாமல் பிடித்துவைத்த கூலி கூக்குரலிடுகிறது; அறுவடை செய்தவர்களின் கூக்குரல் சேனைகளின் பரமபிதாவின் செவிகளில் எட்டியிருக்கிறது. ⁵நீங்கள் பூமியில் சுகபோகமாகவும் இச்சைநிறைவாகவும் வாழ்ந்தீர்கள்; கொலைநாளில் உங்கள் இருதயங்களைக் கொழுக்கப்பண்ணினீர்கள். ⁶உங்களை எதிர்க்காத நீதிமானை நீங்கள் ஆக்கினைக்குள்ளாகத் தீர்த்துக் கொலைசெய்தீர்கள்.

பொறுமையுள்ள இருதயத்தோடு காத்திருங்கள்

⁷ஆகையால், சகோதர சகோதரிகளே, கர்த்தருடைய வருகைமட்டும் பொறுமையாயிருங்கள். பயிரிடுகிறவனை நினைத்துப்பாருங்கள்: அவன் நிலத்தின் அருமையான பலனுக்காக, அது முன்மாரியையும் பின்மாரியையும் பெறும்மட்டும் பொறுமையோடு காத்திருக்கிறான். ⁸நீங்களும் பொறுமையாயிருங்கள்; கர்த்தருடைய வருகை சமீபமாயிருப்பதால், உங்கள் இருதயங்களை ஸ்திரப்படுத்துங்கள். ⁹சகோதர சகோதரிகளே, நீங்கள் நியாயந்தீர்க்கப்படாதபடிக்கு, ஒருவருக்கு விரோதமாய் ஒருவர் முறையிடாதிருங்கள். இதோ, நியாயாதிபதி வாசற்படியில் நிற்கிறார். ¹⁰சகோதர சகோதரிகளே, எங்கள் பிதாவின் நாமத்தினாலே பேசின தீர்க்கதரிசிகளையே பாடுபடுதலுக்கும் பொறுமைக்கும் முன்மாதிரிகளாக ஏற்றுக்கொள்ளுங்கள். ¹¹இதோ, சகித்திருந்தவர்களைப் பாக்கியவான்கள் என்று நாம் சொல்லுகிறோம். யோபுவின் பொறுமையைக்குறித்துக் கேள்விப்பட்டிருக்கிறீர்கள், எங்கள் பிதா நிறைவேற்றினதையும் கண்டிருக்கிறீர்கள்—எங்கள் பிதா இரக்கமும் மனதுருக்கமும் நிறைந்தவர்.

¹²என் சகோதர சகோதரிகளே, எல்லாவற்றிற்கும் மேலாக, வானத்தின்பேரிலாவது, பூமியின்பேரிலாவது, வேறெந்த ஆணையினாலாவது சத்தியம்பண்ணாதிருங்கள். நீங்கள் நியாயத்தீர்ப்புக்குள் வராதபடிக்கு, உங்கள் ஆம் என்பது ஆம் என்றும், உங்கள் இல்லை என்பது இல்லை என்றும் இருக்கக்கடவது.

விசுவாசத்தின் ஜெபம் சொஸ்தமாக்குகிறது

¹³உங்களில் ஒருவன் துன்பப்படுகிறானா? அவன் ஜெபம்பண்ணக்கடவன். ஒருவன் மனமகிழ்ச்சியாயிருக்கிறானா? அவன் துதிப்பாடல்களைப் பாடக்கடவன். ¹⁴உங்களில் ஒருவன் வியாதிப்பட்டிருக்கிறானா? அவன் சபையின் மூப்பர்களை வரவழைக்கக்கடவன்; அவர்கள் கர்த்தருடைய நாமத்தினாலே அவனை எண்ணெயால் அபிஷேகம்பண்ணி, அவனுக்காக ஜெபம்பண்ணக்கடவர்கள். ¹⁵விசுவாசத்தோடு பண்ணப்படும் ஜெபம் வியாதியஸ்தனை இரட்சிக்கும், கர்த்தர் அவனை எழுப்புவார்; அவன் பாவங்கள் செய்திருந்தால், அவைகளும் அவனுக்கு மன்னிக்கப்படும். ¹⁶ஆகையால், நீங்கள் சொஸ்தமடையும்படி, ஒருவருக்கொருவர் உங்கள் பாவங்களை அறிக்கையிட்டு, ஒருவருக்காக ஒருவர் ஜெபம்பண்ணுங்கள். நீதிமானுடைய ஊக்கமான ஜெபம் மிகுந்த வல்லமையுள்ளதாயும் பயனுள்ளதாயும் இருக்கிறது. ¹⁷எலியா நம்மைப்போன்ற மனுஷனாயிருந்தும், மழை பெய்யாதபடிக்கு ஊக்கமாய் ஜெபம்பண்ணினான்; அப்பொழுது மூன்று வருடமும் ஆறுமாதமும் தேசத்தின்மேல் மழை பெய்யவில்லை. ¹⁸பின்பு அவன் மறுபடியும் ஜெபம்பண்ணினான்; வானம் மழையைப் பொழிந்தது, பூமி தன் பலனைத் தந்தது.

¹⁹என் சகோதர சகோதரிகளே, உங்களில் ஒருவன் சத்தியத்தைவிட்டு விலகி அலைந்துபோகும்போது, ஒருவன் அவனைத் திருப்பினால், ²⁰பாவியை அவனுடைய தப்பான வழியிலிருந்து திருப்புகிறவன், ஒரு ஆத்துமாவை மரணத்தினின்று இரட்சித்து, திரளான பாவங்களை மூடுகிறான் என்று அறிந்துகொள்ளுங்கள்.