2 தீமோத்தேயு 1

1 ¹எங்கள் பிதாவின் சித்தத்தினாலே, கிறிஸ்து இயேசுவிலுள்ள ஜீவனைப்பற்றிய வாக்குத்தத்தத்தின்படி, கிறிஸ்து இயேசுவின் அப்போஸ்தலனாகிய பவுல், ²எனக்குப் பிரியமான பிள்ளையாகிய தீமோத்தேயுவுக்கு எழுதுகிறதாவது: எங்கள் பிதாவினாலும் நம்முடைய கர்த்தராகிய கிறிஸ்து இயேசுவினாலும் கிருபையும் இரக்கமும் சமாதானமும் உண்டாவதாக.

எங்கள் பிதா உனக்குக் கொடுத்த சுவாலையை மூட்டியெழுப்பு

³என் முன்னோர்கள் செய்ததுபோல, தூய்மையான மனச்சாட்சியோடே நான் ஆராதிக்கிற எங்கள் பிதாவுக்கு நான் நன்றி செலுத்துகிறேன்; இரவும் பகலும் என் ஜெபங்களில் உன்னை இடைவிடாமல் நினைத்துக்கொள்ளுகிறேன். ⁴உன் கண்ணீரை நினைத்து, நான் சந்தோஷத்தால் நிறையும்படி உன்னைக் காண ஏங்குகிறேன். ⁵உன்னிடத்திலுள்ள மாயமற்ற விசுவாசத்தை நான் நினைத்துக்கொள்ளுகிறேன்—அது முதலில் உன் பாட்டியாகிய லோவிசாளிடத்திலும் உன் தாயாகிய ஐனிக்கேயாளிடத்திலும் உயிரோடிருந்தது; இப்பொழுது உன்னிடத்திலும் இருக்கிறதென்று நிச்சயமாய் நம்புகிறேன்.

⁶ஆகையால், என் கைகளை வைத்ததினாலே உன்னிடத்திலுள்ள எங்கள் பிதாவின் வரத்தை நீ சுவாலித்தெழும்படி மூட்டிவிடவேண்டுமென்று உனக்கு நினைப்பூட்டுகிறேன். ⁷ஏனெனில், எங்கள் பிதா நமக்குப் பயமுள்ள ஆவியைக் கொடாமல், பெலனும் அன்பும் தெளிந்த புத்தியும் உள்ள ஆவியையே கொடுத்தார். ⁸ஆகையால், நம்முடைய கர்த்தரைப்பற்றிய சாட்சிக்காகிலும், அவருடைய கைதியாகிய என்னைப்பற்றியாகிலும் நீ வெட்கப்படாமல், எங்கள் பிதாவின் வல்லமையினாலே சுவிசேஷத்திற்காக என்னோடே பாடுபடு. ⁹அவர் நம்முடைய கிரியைகளின்படி அல்ல, தம்முடைய தீர்மானத்தின்படியும் கிருபையின்படியுமே நம்மை இரட்சித்து, பரிசுத்த அழைப்பினால் அழைத்தார்; இந்தக் கிருபை காலங்களுக்கு முன்னே கிறிஸ்து இயேசுவில் நமக்கு அளிக்கப்பட்டது, ¹⁰இப்பொழுது நம்முடைய இரட்சகராகிய கிறிஸ்து இயேசுவின் வெளிப்பாட்டினாலே அது வெளியரங்கமாக்கப்பட்டது; அவர் மரணத்தை அழித்து, சுவிசேஷத்தினாலே ஜீவனையும் அழியாமையையும் வெளிச்சத்திற்குக் கொண்டுவந்தார். ¹¹இந்தச் சுவிசேஷத்திற்காக நான் பிரசங்கியாகவும் அப்போஸ்தலனாகவும் போதகனாகவும் நியமிக்கப்பட்டேன். ¹²இதினிமித்தமே நான் இப்படிப் பாடுபடுகிறேன்; ஆனாலும் நான் வெட்கப்படுகிறதில்லை; ஏனெனில், நான் விசுவாசித்திருக்கிறவர் யாரென்று அறிவேன், அவர் திரும்பிவரும் நாள்வரைக்கும் என்னிடத்தில் ஒப்புவிக்கப்பட்டதைக் காத்துக்கொள்ள வல்லவராயிருக்கிறாரென்று நிச்சயித்திருக்கிறேன்.

¹³நீ என்னிடத்தில் கேட்ட ஆரோக்கியமான வார்த்தைகளின் மாதிரியைக் கிறிஸ்து இயேசுவிலுள்ள விசுவாசத்தோடும் அன்போடும் பற்றிக்கொள். ¹⁴உன்னிடத்தில் ஒப்புவிக்கப்பட்ட அந்த நல்ல பொக்கிஷத்தை, நமக்குள்ளே வாசமாயிருக்கிற பரிசுத்த ஆவியானவராலே காத்துக்கொள்.

¹⁵ஆசியா நாட்டிலுள்ள யாவரும் என்னைவிட்டு விலகிப்போனார்கள் என்பதை நீ அறிந்திருக்கிறாய்; அவர்களில் பிகெல்லுவும் எர்மொகெனேயும் இருக்கிறார்கள். ¹⁶நம்முடைய கர்த்தராகிய இயேசு ஒநேசிப்போருவின் குடும்பத்துக்கு இரக்கம் அளிப்பாராக; ஏனெனில் அவன் அநேகந்தரம் என்னை உற்சாகப்படுத்தினான், என் விலங்குகளைக்குறித்து வெட்கப்படவுமில்லை. ¹⁷அதற்குமாறாக, அவன் ரோமாபுரிக்கு வந்தபோது, என்னைக் கண்டுபிடிக்கும்வரைக்கும் அதிக ஜாக்கிரதையாய் என்னைத் தேடினான். ¹⁸அந்த நாளிலே அவன் கர்த்தரிடத்தில் இரக்கத்தைக் கண்டடையும்படி நம்முடைய கர்த்தராகிய இயேசு அருள்செய்வாராக. அவன் எபேசுவில் எவ்வளவாய் ஊழியஞ்செய்தானென்பதை நீ நன்றாய் அறிந்திருக்கிறாய்.