2 தீமோத்தேயு 2

2 ¹ஆகையால், என் பிள்ளையே, கிறிஸ்து இயேசுவிலுள்ள கிருபையிலே பலங்கொள். ²அநேக சாட்சிகளுக்கு முன்பாக நீ என்னிடத்தில் கேட்டவைகளை, மற்றவர்களுக்கும் போதிக்கத் தகுதியான உண்மையுள்ள மனிதர்களிடத்தில் ஒப்புவி. ³கிறிஸ்து இயேசுவின் நல்ல போர்வீரனைப்போல நீயும் பாடுகளில் உன் பங்கை ஏற்றுக்கொள். ⁴போரில் ஈடுபட்டிருக்கிற எந்தப் போர்வீரனும் உலகவாழ்க்கையின் காரியங்களில் சிக்கிக்கொள்ளமாட்டான்—தன்னைச் சேவைக்கு அமர்த்தினவரைப் பிரியப்படுத்தவே அவன் விரும்புகிறான். ⁵மேலும், ஒரு மல்லன் நியமங்களின்படி போராடினாலொழிய முடிசூட்டப்படுவதில்லை. ⁶பாடுபடுகிற பயிரிடுகிறவனே பலனில் முதற்பங்கைப் பெறுவதற்குத் தகுதியுள்ளவன். ⁷நான் சொல்லுகிறவைகளைச் சிந்தித்துப்பார்; எல்லாவற்றிலும் கர்த்தர் உனக்கு அறிவை அருளுவார்.

⁸என் நற்செய்தியில் சொல்லப்பட்டபடி, மரித்தோரிலிருந்து உயிர்த்தெழுந்தவரும், தாவீதின் சந்ததியில் பிறந்தவருமான இயேசு கிறிஸ்துவை நினைத்துக்கொள். ⁹அந்த நற்செய்திக்காகவே நான் ஒரு குற்றவாளியைப்போல விலங்கிடப்பட்டுப் பாடுபடுகிறேன். ஆனாலும் எங்கள் பிதாவின் வார்த்தை விலங்கிடப்படவில்லை! ¹⁰ஆகையால் தெரிந்துகொள்ளப்பட்டவர்களினிமித்தம், அவர்களும் நித்திய மகிமையோடே கிறிஸ்து இயேசுவிலுள்ள இரட்சிப்பை அடையும்படி, நான் எல்லாவற்றையும் சகித்துக்கொள்ளுகிறேன். ¹¹இந்த வார்த்தை நம்பத்தக்கது: நாம் அவரோடேகூட மரித்திருந்தால், அவரோடேகூட பிழைத்துமிருப்போம்; ¹²நாம் சகித்திருந்தால், அவரோடேகூட ஆளுகையும் செய்வோம்; நாம் அவரை மறுதலித்தால், அவரும் நம்மை மறுதலிப்பார்; ¹³நாம் உண்மையற்றவர்களாய் இருந்தாலும், அவர் உண்மையுள்ளவராகவே இருக்கிறார்; தம்மைத்தாமே மறுதலிக்க அவராலே கூடாது.

பிதாவினால் உகந்தவனாக ஏற்கப்பட்ட ஊழியன்

¹⁴இவைகளை அவர்களுக்கு நினைப்பூட்டி, வார்த்தைகளைக்குறித்து வாக்குவாதம் செய்யாதபடிக்கு எங்கள் பிதாவுக்கு முன்பாக அவர்களை எச்சரி—அது பிரயோஜனமற்றது, கேட்கிறவர்களைக் கெடுக்கிறது.

¹⁵சத்திய வசனத்தை நிதானமாய்ப் பகுத்துப் போதிக்கிற, வெட்கப்படாத ஊழியனாக, உகந்தவனாக உன்னை எங்கள் பிதாவுக்கு முன்பாக நிறுத்தும்படி ஜாக்கிரதையாய் முயற்சிசெய். ¹⁶பட்டணத்தனமும் வீணுமான வம்புவார்த்தைகளுக்கு விலகியிரு; அவைகள் மக்களை அதிக அவபக்திக்குள் நடத்திக்கொண்டு போகும், ¹⁷அவர்களுடைய பேச்சு அழுகல்புண்போல் பரவும். இவர்களில் இமெனேயுவும் பிலேத்துவும் அடங்குவார்கள், ¹⁸இவர்கள் சத்தியத்தைவிட்டு விலகி, உயிர்த்தெழுதல் ஏற்கெனவே நடந்துவிட்டதென்று சொல்லி, சிலருடைய விசுவாசத்தைக் கவிழ்த்துப்போடுகிறார்கள். ¹⁹ஆயினும் எங்கள் பிதாவின் உறுதியான அஸ்திபாரம் நிலைத்திருக்கிறது; அதற்கு இந்த முத்திரை போடப்பட்டிருக்கிறது: “அவர் தம்முடையவர்களை அறிந்திருக்கிறார்,” “அவருடைய நாமத்தைச் சொல்லுகிற யாவரும் அநியாயத்தைவிட்டு விலகக்கடவர்கள்.”

²⁰பெரிய வீட்டிலே பொன்னும் வெள்ளியுமான பாத்திரங்கள் மாத்திரமல்ல, மரமும் மண்ணுமான பாத்திரங்களும் உண்டு—சில கனத்துக்கும், சில கனவீனத்துக்கும் உரியவைகள். ²¹ஆகையால் ஒருவன் இவைகளைவிட்டு தன்னைத் தூய்மையாக்கிக்கொண்டால், அவன் பரிசுத்தமாக்கப்பட்டு, எஜமானுக்குப் பிரயோஜனமுள்ளதும், எந்த நற்கிரியைக்கும் ஆயத்தமாக்கப்பட்டதுமான கனத்துக்குரிய பாத்திரமாயிருப்பான்.

²²வாலிபத்தின் இச்சைகளுக்கு விலகியோடி, சுத்த இருதயத்தோடே கர்த்தரைத் தொழுதுகொள்ளுகிறவர்களோடேகூட நீதியையும், விசுவாசத்தையும், அன்பையும், சமாதானத்தையும் தேடிச்செல். ²³புத்தியீனமும் அறியாமையுமான தர்க்கங்களுக்கு விலகியிரு; அவைகள் சண்டைகளைப் பிறப்பிக்கிறதென்று அறிந்திருக்கிறாய். ²⁴கர்த்தருடைய ஊழியன் சண்டைபண்ணுகிறவனாயிராமல், எல்லாரிடத்திலும் சாந்தமுள்ளவனும், போதிக்கத் தகுதியுள்ளவனும், அநியாயத்தைப் பொறுமையோடே சகிக்கிறவனுமாய் இருக்கவேண்டும். ²⁵தன்னை எதிர்க்கிறவர்களைச் சாந்தத்தோடே திருத்துகிறவனாயும் இருக்கவேண்டும். சத்தியத்தை அறிந்துகொள்ளும்படி எங்கள் பிதா அவர்களுக்கு மனந்திரும்புதலை அருளக்கூடும், ²⁶அப்பொழுது அவர்கள் மயக்கம் தெளிந்து, பிசாசினுடைய சித்தத்தின்படி செய்யும்படி அவனால் சிறைப்பிடிக்கப்பட்டிருந்த அவனுடைய கண்ணியிலிருந்து தப்பித்துக்கொள்வார்கள்.