ஆதியாகமம் 13

13 ¹ஆபிராம் எகிப்திலிருந்து நெகேபுக்குப் போனான்; அவனும், அவன் மனைவியும், அவனுக்கு உண்டான யாவும், அவனோடேகூட லோத்தும் போனார்கள். ²ஆபிராம் மந்தைகளிலும், வெள்ளியிலும், பொன்னிலும் மிகவும் செல்வந்தனாயிருந்தான். ³அவன் நெகேபிலிருந்து பெத்தேல்வரைக்கும், பெத்தேலுக்கும் ஆயிக்கும் நடுவே தன் கூடாரம் முன்பு இருந்த இடம்வரைக்கும் இடம்விட்டு இடம் பயணமாய்ச் சென்று, ⁴தான் முதலில் பலிபீடத்தைக் கட்டியிருந்த இடத்துக்கு வந்தான். அங்கே ஆபிராம் எங்கள் பிதாவின் நாமத்தைத் தொழுதுகொண்டான். ⁵ஆபிராமோடேகூடப் பயணமாய் வந்த லோத்துக்கும் ஆடுகளும், மாடுகளும், கூடாரங்களும் இருந்தன. ⁶அவர்கள் ஒன்றாய்க் குடியிருக்க அந்த தேசம் போதுமானதாய் இருக்கவில்லை; அவர்களுடைய சொத்துக்கள் மிகுதியாய் இருந்ததால் அவர்களால் ஒன்றாய்த் தங்க முடியவில்லை. ⁷ஆபிராமின் மேய்ப்பருக்கும் லோத்தின் மேய்ப்பருக்கும் இடையே வாக்குவாதம் உண்டாயிற்று. அக்காலத்தில் கானானியரும் பெரிசியரும் அந்த தேசத்தில் குடியிருந்தார்கள். ⁸ஆபிராம் லோத்தை நோக்கி: “எனக்கும் உனக்கும், என் மேய்ப்பருக்கும் உன் மேய்ப்பருக்கும் இடையே வாக்குவாதம் வேண்டாம்; நாம் சகோதரர்களல்லவா. ⁹தேசமெல்லாம் உனக்கு முன்பாக இருக்கிறதல்லவா? தயவுசெய்து என்னைவிட்டுப் பிரிந்துகொள்; நீ இடதுபுறம் போனால் நான் வலதுபுறம் போவேன்; நீ வலதுபுறம் போனால் நான் இடதுபுறம் போவேன்” என்றான்.

¹⁰லோத்து தன் கண்களை ஏறெடுத்துப் பார்த்தபோது, யோர்தான் சமபூமி முழுவதும் சோவார்வரைக்கும் எங்கும் நன்றாய் நீர்வளம் உள்ளதாய்—எங்கள் பிதாவின் தோட்டத்தைப்போலவும், எகிப்தின் தேசத்தைப்போலவும் இருக்கக் கண்டான். (இது எங்கள் பிதா சோதோமையும் கொமோராவையும் அழிப்பதற்கு முன்னாய் இருந்தது.) ¹¹லோத்து யோர்தான் சமபூமி முழுவதையும் தனக்குத் தெரிந்துகொண்டு கிழக்கே பயணமானான்; இருவரும் ஒருவரையொருவர் விட்டுப் பிரிந்தார்கள். ¹²ஆபிராம் கானான் தேசத்தில் குடியிருந்தான்; லோத்து சமபூமியின் பட்டணங்களுக்குள்ளே குடியிருந்து, சோதோம்வரைக்கும் கூடாரங்களைப் போட்டான். ¹³சோதோமின் மனிதர் பொல்லாதவர்களாயும், எங்கள் பிதாவுக்கு விரோதமாய் மிகவும் பாவம் செய்கிறவர்களாயும் இருந்தார்கள்.

¹⁴லோத்து அவனைவிட்டுப் பிரிந்தபின்பு, எங்கள் பிதா ஆபிராமை நோக்கி: “நீ நிற்கிற இடத்திலிருந்து உன் கண்களை ஏறெடுத்து, வடக்கேயும் தெற்கேயும் கிழக்கேயும் மேற்கேயும் பார். ¹⁵நீ காண்கிற தேசமெல்லாம் உனக்கும் உன் பிள்ளைகளுக்கும் என்றென்றைக்கும் கொடுப்பேன். ¹⁶உன் பிள்ளைகளைப் பூமியின் தூளைப்போலப் பெருகப்பண்ணுவேன்—பூமியின் தூளை எண்ணக்கூடுமானால், உன் பிள்ளைகளையும் எண்ணக்கூடும். ¹⁷எழுந்து, தேசத்தின் நீளமும் அகலமும் எங்கும் நடந்துபார்; அதை உனக்குக் கொடுக்கிறேன்” என்றார்.

¹⁸அப்பொழுது ஆபிராம் தன் கூடாரங்களைப் பெயர்த்து, எபிரோனிலுள்ள மம்ரேயின் கர்வாலி மரங்களண்டையிலே போய்க் குடியிருந்து, அங்கே எங்கள் பிதாவுக்கு ஒரு பலிபீடத்தைக் கட்டினான்.