யோவான் 9

அதிகாரம் 9.

9 ¹இயேசு கடந்துபோகையில், பிறவியிலிருந்தே குருடனாயிருந்த ஒரு மனிதனைக் கண்டார். ²அப்பொழுது அவருடைய சீஷர்கள் அவரை நோக்கி, “ரபீ, இவன் குருடனாய்ப் பிறந்தது யாருடைய பாவத்தினால்? இவனுடைய பாவத்தினாலா, இவனுடைய பெற்றோரின் பாவத்தினாலா?” என்று கேட்டார்கள்.

³அதற்கு இயேசு, “இவனாலும் அல்ல, இவனுடைய பெற்றோராலும் அல்ல; எங்கள் பிதாவின் கிரியைகள் இவனில் வெளிப்படும்படியாகவே இப்படி நேரிட்டது. ^a a v3 இந்த மனிதனுடைய குருட்டுத்தனத்தைப் பாவத்திற்குரிய தண்டனையாக எண்ண இயேசு மறுக்கிறார். மாறாக, உலகம் தோல்வியை மட்டுமே கண்ட அந்த இடத்திலேயே தமது மீட்பின் கிரியையை வெளிப்படுத்தும் எங்கள் பிதாவின்பக்கம் அவர் சுட்டிக்காட்டுகிறார். ⁴பகலாயிருக்கையில் என்னை அனுப்பினவருடைய கிரியைகளை நாம் செய்யவேண்டும்; ஒருவனும் வேலை செய்யக்கூடாத இரவு வருகிறது. ⁵நான் உலகத்தில் இருக்குமளவும், நான் உலகத்திற்கு ஒளியாயிருக்கிறேன்” என்றார்.

⁶இப்படிச் சொல்லி, தரையிலே துப்பி, உமிழ்நீரினால் சேறுண்டாக்கி, அந்தச் சேற்றை அவனுடைய கண்களின்மேல் பூசி,

⁷“நீ போய், சிலோவாம் குளத்திலே கழுவு” என்று அவனுக்குச் சொன்னார் (சிலோவாம் என்றால் அனுப்பப்பட்டவன் என்று அர்த்தம்). அந்தப்படியே அவன் போய், கழுவி, பார்வையடைந்தவனாய்த் திரும்பிவந்தான்.

⁸அப்பொழுது அயலகத்தாரும், முன்பே அவன் பிச்சையெடுத்துக்கொண்டிருந்ததைக் கண்டவர்களும், “இவன் உட்கார்ந்து பிச்சையெடுத்துக்கொண்டிருந்தவன் அல்லவா?” என்றார்கள். ⁹சிலர், “இவன்தான்” என்றார்கள். வேறுசிலர், “அல்ல, இவன் அவனைப்போல் இருக்கிறான்” என்றார்கள். அவனோ, “நான்தான் அவன்” என்று சொல்லிக்கொண்டேயிருந்தான்.

¹⁰அப்பொழுது அவர்கள் அவனை நோக்கி, “அப்படியானால் உன் கண்கள் எப்படித் திறக்கப்பட்டன?” என்று கேட்டார்கள்.

¹¹அதற்கு அவன், “இயேசு என்னப்படுகிற மனிதர் சேறுண்டாக்கி, என் கண்களின்மேல் பூசி, ‘நீ சிலோவாமுக்குப் போய்க் கழுவு’ என்று எனக்குச் சொன்னார். அந்தப்படியே நான் போய், கழுவி, பார்வையடைந்தேன்” என்றான்.

¹²அவர்கள் அவனை நோக்கி, “அவர் எங்கே?” என்றார்கள். அதற்கு அவன், “எனக்குத் தெரியாது” என்றான்.

¹³குருடனாயிருந்த அந்த மனிதனைப் பரிசேயரிடத்தில் அவர்கள் கொண்டுவந்தார்கள். ¹⁴இயேசு சேறுண்டாக்கி அவனுடைய கண்களைத் திறந்த நாள் ஓய்வுநாளாயிருந்தது. ¹⁵ஆகவே அவன் எப்படிப் பார்வையடைந்தான் என்று பரிசேயரும் மறுபடியும் அவனைக் கேட்டார்கள். அவன் அவர்களை நோக்கி, “அவர் என் கண்களின்மேல் சேறு வைத்தார்; நான் கழுவினேன், இப்போது பார்க்கிறேன்” என்றான்.

¹⁶அப்பொழுது பரிசேயரில் சிலர், “இந்த மனிதன் ஓய்வுநாளைக் கைக்கொள்ளாதபடியால், இவன் தேவனிடத்திலிருந்து வந்தவன் அல்ல” என்றார்கள். வேறுசிலர், “பாவியாயிருக்கிற மனிதன் இப்படிப்பட்ட அற்புத அடையாளங்களை எப்படிச் செய்யக்கூடும்?” என்றார்கள். இப்படி அவர்களுக்குள்ளே பிரிவினையுண்டாயிற்று.

¹⁷அவர்கள் மறுபடியும் அந்தக் குருடனை நோக்கி, “அவர் உன் கண்களைத் திறந்தாரே, அவரைக்குறித்து நீ என்ன சொல்லுகிறாய்?” என்றார்கள். அதற்கு அவன், “அவர் ஒரு தீர்க்கதரிசி” என்றான்.

¹⁸பார்வையடைந்த மனிதனுடைய பெற்றோரை யூதர்கள் அழைப்பிக்கும்வரையில், இவன் குருடனாயிருந்து பார்வையடைந்தான் என்பதை அவர்கள் விசுவாசிக்கவில்லை. ¹⁹அவர்கள் அந்தப் பெற்றோரை நோக்கி, “குருடனாய்ப் பிறந்தான் என்று நீங்கள் சொல்லுகிற உங்கள் மகன் இவன்தானா? அப்படியானால் இவன் இப்போது எப்படிப் பார்க்கிறான்?” என்று கேட்டார்கள்.

²⁰அதற்கு அவனுடைய பெற்றோர், “இவன் எங்கள் மகன் என்றும், இவன் குருடனாய்ப் பிறந்தான் என்றும் எங்களுக்குத் தெரியும். ²¹ஆனால் இப்போது எப்படிப் பார்க்கிறான் என்பதோ எங்களுக்குத் தெரியாது; இவனுடைய கண்களை யார் திறந்தார் என்பதும் எங்களுக்குத் தெரியாது. இவனையே கேளுங்கள்; இவன் வயதுவந்தவன், இவனைக்குறித்து இவனே பேசுவான்” என்றார்கள். ²²இயேசுவைக் கிறிஸ்து என்று அறிக்கையிடுகிற எவனாகிலும் ஜெபஆலயத்திலிருந்து தள்ளிவைக்கப்படவேண்டும் என்று யூதர்கள் முன்பே ஒருமித்திருந்தபடியால், அவர்களுக்குப் பயந்து அவனுடைய பெற்றோர் இப்படிச் சொன்னார்கள். ^b b v22 ஜெபஆலயத்திலிருந்து தள்ளிவைக்கப்படுவது என்பது யூத சமூகத்திலிருந்து முழுமையான சமூக மற்றும் மத விலக்கம் என்று பொருள்பட்டது. ²³இதனாலேயே, “இவன் வயதுவந்தவன்; இவனையே கேளுங்கள்” என்று அவனுடைய பெற்றோர் சொன்னார்கள்.

²⁴அப்பொழுது குருடனாயிருந்த மனிதனை அவர்கள் மறுபடியும் அழைத்து, “தேவனை மகிமைப்படுத்து; இந்த மனிதன் பாவி என்று நாங்கள் அறிவோம்” என்றார்கள்.

²⁵அதற்கு அவன், “அவர் பாவியோ அல்லவோ, அது எனக்குத் தெரியாது; ஒன்று மட்டும் அறிவேன், நான் குருடனாயிருந்தேன், இப்போது பார்க்கிறேன்” என்றான்.

²⁶அவர்கள் மறுபடியும் அவனை நோக்கி, “அவர் உனக்கு என்ன செய்தார்? உன் கண்களை எப்படித் திறந்தார்?” என்றார்கள்.

²⁷அதற்கு அவன், “ஏற்கெனவே உங்களுக்குச் சொன்னேனே, நீங்கள் கேட்கவில்லை. மறுபடியும் ஏன் அதைக் கேட்க விரும்புகிறீர்கள்? நீங்களும் அவருடைய சீஷராக விரும்புகிறீர்களா?” என்றான்.

²⁸அப்பொழுது அவர்கள் அவனை நிந்தித்து, “நீ அவனுடைய சீஷன்; நாங்களோ மோசேயின் சீஷர்கள். ²⁹தேவன் மோசேயுடனே பேசினார் என்று அறிவோம்; இந்த மனிதனோ எங்கேயிருந்து வந்தவன் என்று அறியோம்” என்றார்கள்.

³⁰அந்த மனிதன் அவர்களுக்குப் பிரதியுத்தரமாக, “அவர் என் கண்களைத் திறந்திருந்தும், அவர் எங்கேயிருந்து வந்தவர் என்று நீங்கள் அறியாதிருப்பது ஆச்சரியமான காரியந்தான். ³¹தேவன் பாவிகளுக்குச் செவிகொடுக்கிறதில்லை என்று அறிவோம்; ஒருவன் தேவனுக்குப் பயபக்தியாயிருந்து அவருடைய சித்தத்தின்படி செய்தால், அவனுக்கே தேவன் செவிகொடுக்கிறார். ³²பிறவிக்குருடனுடைய கண்களை ஒருவன் திறந்தான் என்பதை உலகம் உண்டானதுமுதல் ஒருபோதும் ஒருவரும் கேள்விப்பட்டதில்லை. ³³இந்த மனிதன் தேவனிடத்திலிருந்து வந்தவனாயிராவிட்டால், இவரால் ஒன்றையும் செய்யமுடியாது” என்றான்.

³⁴அதற்கு அவர்கள், “நீ முழுவதும் பாவத்தில் பிறந்தவன், நீயா எங்களுக்குப் போதிக்கிறாய்?” என்று சொல்லி, அவனை வெளியே தள்ளிவிட்டார்கள்.

நீ விசுவாசிக்கிறாயா?

³⁵அவர்கள் அவனை வெளியே தள்ளிவிட்டதை இயேசு கேள்விப்பட்டு, அவனைக் கண்டபோது, “நீ மனுஷகுமாரனிடத்தில் விசுவாசமாயிருக்கிறாயா?” என்றார்.

³⁶அதற்கு அவன், “ஆண்டவரே, நான் அவரிடத்தில் விசுவாசமாயிருக்கும்படி அவர் யார்?” என்றான்.

³⁷இயேசு அவனை நோக்கி, “நீ அவரைக் கண்டிருக்கிறாய்; உன்னுடனே பேசுகிறவர் அவர்தான்” என்றார்.

³⁸உடனே அவன், “ஆண்டவரே, விசுவாசிக்கிறேன்” என்று சொல்லி, அவரைப் பணிந்துகொண்டான்.

³⁹அப்பொழுது இயேசு, “பார்க்காதவர்கள் பார்க்கும்படியாகவும், பார்க்கிறவர்கள் குருடராகும்படியாகவும், நியாயத்தீர்ப்புக்காக நான் இந்த உலகத்தில் வந்தேன்” என்றார்.

⁴⁰அவரோடிருந்த பரிசேயரில் சிலர் இதைக் கேட்டு, “நாங்களும் குருடரோ?” என்றார்கள்.

⁴¹அதற்கு இயேசு, “நீங்கள் குருடராயிருந்தால் உங்களுக்குப் பாவம் இராது; ‘நாங்கள் பார்க்கிறோம்’ என்று சொல்லுகிறபடியால், உங்கள் பாவம் நிலைத்திருக்கிறது” என்றார்.