சங்கீதம் 14

14 ¹“தேவன் இல்லை” என்று மூடன் தன் இருதயத்தில் சொல்லுகிறான். அவர்கள் கெட்டுப்போனார்கள், அவர்களுடைய செய்கைகள் அருவருப்பானவை; நன்மை செய்கிறவன் ஒருவனும் இல்லை.

²உணர்வுள்ளவன் யாரேனும் உண்டோ, தம்மைத் தேடுகிறவன் யாரேனும் உண்டோ என்று பார்க்கும்படி, எங்கள் பிதா வானத்திலிருந்து மனுப்புத்திரர்மேல் நோக்கிப்பார்க்கிறார். ³எல்லாரும் வழிவிலகிப்போனார்கள்; அனைவரும் ஒருமிக்கக் கெட்டுப்போனார்கள்; நன்மை செய்கிறவன் ஒருவனும் இல்லை, ஒருவன்கூட இல்லை.

⁴அப்பம் தின்பதுபோல் என் ஜனத்தை விழுங்குகிற இந்த அக்கிரமக்காரர் அனைவருக்கும் ஒன்றும் தெரியாதோ? அவர்கள் எங்கள் பிதாவை ஒருபோதும் தொழுதுகொள்வதில்லையே. ⁵அங்கே அவர்கள் மகா பயத்தினால் திடுக்கிட்டார்கள், ஏனெனில் எங்கள் பிதா நீதிமான்களின் சந்ததியோடு இருக்கிறார். ⁶அக்கிரமக்காரரே, நீங்கள் சிறுமையானவனுடைய திட்டங்களைப் பாழாக்கப் பார்க்கிறீர்கள், ஆனால் எங்கள் பிதா அவனுக்கு அடைக்கலமாயிருக்கிறார்.

⁷இஸ்ரவேலின் இரட்சிப்பு சீயோனிலிருந்து வந்தால் எவ்வளவு நலம்! எங்கள் பிதா தம் ஜனத்தின் சிறையிருப்பைத் திருப்பும்போது, யாக்கோபு களிகூரட்டும், இஸ்ரவேல் மகிழ்ந்திடட்டும்.