ரோமர் 3

3 ¹அப்படியானால், யூதனுக்கு உண்டாகும் மேன்மை என்ன? அல்லது விருத்தசேதனத்தின் பயன் என்ன? ²எல்லா விதத்திலும் மிகுதியாக உண்டு. முதலாவது, எங்கள் பிதாவின் வார்த்தைகளே அவர்களிடம் ஒப்புவிக்கப்பட்டன. ³இப்படியிருக்க என்ன? சிலர் அவிசுவாசிகளாயிருந்தால், அவர்களுடைய அவிசுவாசம் எங்கள் பிதாவின் உண்மையை பயனற்றதாக்குமோ? ⁴ஒருபோதுமில்லை! ஒவ்வொரு மனுஷனும் பொய்யனாயிருந்தாலும், எங்கள் பிதா சத்தியமுள்ளவராயிருக்கட்டும். “உம்முடைய வார்த்தைகளில் நீர் நீதிபரராகக் காணப்படவும், நியாயந்தீர்க்கப்படும்போது வெற்றியடையவும் வேண்டும்” என்று எழுதியிருக்கிறபடியே.

⁵ஆனால் நம்முடைய அநீதி எங்கள் பிதாவின் நீதியை விளங்கப்பண்ணுமானால், நாம் என்ன சொல்லுவோம்? நம்மேல் கோபாக்கினையை வரப்பண்ணுகிற எங்கள் பிதா அநீதியுள்ளவரோ? (மனுஷ முறையில் பேசுகிறேன்.). ⁶அப்படியல்லவே! அப்படியானால், எங்கள் பிதா உலகத்தை எப்படி நியாயந்தீர்ப்பார்? ⁷ஆனால் என் பொய்யினால் எங்கள் பிதாவின் சத்தியம் அவருடைய மகிமைக்காகப் பெருகுமானால், நான் இன்னும் ஏன் பாவியாக நியாயந்தீர்க்கப்படுகிறேன்? ⁸“நன்மை வரும்படி நாம் தீமையைச் செய்வோம்” என்று ஏன் சொல்லக்கூடாது? சிலர் எங்களைக் குற்றம்சாட்டி இப்படி நாங்கள் சொல்லுகிறதாகப் பழிக்கிறார்களே. அவர்களுக்கு வரும் ஆக்கினைத்தீர்ப்பு நியாயமே.

நீதிமான் ஒருவனுமில்லை

⁹இப்படியிருக்க என்ன? நாம் மேன்மையுள்ளவர்களோ? அல்லவே—யூதரும் கிரேக்கரும் அனைவரும் பாவத்தின் பிடியில் இருக்கிறார்கள் என்று ஏற்கெனவே நாம் குற்றஞ்சாட்டியிருக்கிறோம், ¹⁰எழுதியிருக்கிறபடியே: “நீதிமான் ஒருவனுமில்லை, ஒருவனாகிலும் இல்லை; ¹¹உணர்ந்துகொள்ளுகிறவன் ஒருவனுமில்லை; எங்கள் பிதாவைத் தேடுகிறவன் ஒருவனுமில்லை. ¹²எல்லாரும் வழிதப்பிப் போனார்கள்; ஏகமாய் ஆகாதவர்களானார்கள்; நன்மை செய்கிறவன் ஒருவனுமில்லை, ஒருவனாகிலும் இல்லை. ¹³அவர்களுடைய தொண்டை திறக்கப்பட்ட பிரேதக்குழி; தங்கள் நாவுகளால் கபடம் செய்கிறார்கள்.” “அவர்களுடைய உதடுகளின்கீழ் விரியன்பாம்புகளின் விஷம் இருக்கிறது. ¹⁴அவர்களுடைய வாய் சாபத்தினாலும் கசப்பினாலும் நிறைந்திருக்கிறது. ¹⁵இரத்தம் சிந்தும்படி அவர்களுடைய கால்கள் தீவிரமாய் ஓடுகின்றன; ¹⁶அழிவும் நிர்ப்பந்தமும் அவர்களுடைய வழிகளில் இருக்கின்றன, ¹⁷சமாதானத்தின் வழியை அவர்கள் அறியாதிருக்கிறார்கள். ¹⁸அவர்களுடைய கண்களுக்கு முன்பாக எங்கள் பிதாவைப்பற்றிய பயம் இல்லை.”

¹⁹நியாயப்பிரமாணம் சொல்லுகிறதெல்லாம் அதற்குட்பட்டவர்களுக்கே சொல்லுகிறது என்று அறிந்திருக்கிறோம்; இப்படியாக எல்லா வாயும் அடைக்கப்பட்டு, உலகம் முழுவதும் எங்கள் பிதாவுக்கு முன்பாகக் குற்றவாளியாய் நிற்கிறது. ²⁰நியாயப்பிரமாணத்தின் கிரியைகளால் ஒருவனும் அவருக்கு முன்பாக நீதிமானாக்கப்படுவதில்லை; நியாயப்பிரமாணத்தினால் பாவத்தைப்பற்றிய உணர்வு உண்டாகிறது.

இயேசுவின்மேலுள்ள விசுவாசத்தினால் நீதிமான்களாக்கப்படுதல்

²¹இப்பொழுதோ, நியாயப்பிரமாணமில்லாமல், எங்கள் பிதாவின் நீதி வெளிப்படுத்தப்பட்டிருக்கிறது; அதைக்குறித்து நியாயப்பிரமாணமும் தீர்க்கதரிசிகளும் சாட்சிபகர்கின்றன. ²²இயேசு கிறிஸ்துவின்மேலுள்ள விசுவாசத்தினால் எங்கள் பிதாவின் இந்த நீதி விசுவாசிக்கிற யாவருக்கும் உண்டாகிறது; வித்தியாசமே இல்லை, ²³எல்லாரும் பாவஞ்செய்து, எங்கள் பிதாவின் மகிமையை இழந்து குறைவுள்ளவர்களானார்கள், ²⁴கிறிஸ்து இயேசுவிலுள்ள மீட்பினாலே அவருடைய கிருபையினால் இலவசமாய் நீதிமான்களாக்கப்படுகிறார்கள். ²⁵எங்கள் பிதா அவரை அவருடைய இரத்தத்தின்மேலுள்ள விசுவாசத்தின்மூலமாய் பாவநிவாரண பலியாக ஏற்படுத்தினார்; இதனால் தம்முடைய நீதியை விளங்கப்பண்ணினார், ஏனெனில் தம்முடைய பொறுமையினால் முன்பு செய்யப்பட்ட பாவங்களைக் கடந்துபோனார், ²⁶இக்காலத்திலே தம்முடைய நீதியை விளங்கப்பண்ணும்படிக்கே இப்படிச் செய்தார்; அப்படியே அவர் தாமே நீதியுள்ளவராயும், இயேசுவின்மேல் விசுவாசமாயிருக்கிறவனை நீதிமானாக்குகிறவராயும் இருக்கிறார்.

²⁷அப்படியானால் மேன்மைபாராட்டுதல் எங்கே? அது நீக்கப்பட்டது. எந்தப் பிரமாணத்தினால்? கிரியைகளின் பிரமாணத்தினாலோ? அல்லவே—விசுவாசத்தின் பிரமாணத்தினால். ²⁸ஆகையால், மனுஷன் நியாயப்பிரமாணத்தின் கிரியைகளில்லாமல் விசுவாசத்தினாலே நீதிமானாக்கப்படுகிறான் என்று திடமாய்ச் சொல்லுகிறோம். ²⁹எங்கள் பிதா யூதருக்குமாத்திரம் பிதாவோ? புறஜாதிகளுக்கும் பிதா அல்லவோ? ஆம், புறஜாதிகளுக்கும் பிதாதான், ³⁰ஏனெனில் எங்கள் பிதா ஒருவரே; அவர் விருத்தசேதனமுள்ளவர்களை விசுவாசத்தினாலும், விருத்தசேதனமில்லாதவர்களை விசுவாசத்தின்மூலமாயும் நீதிமான்களாக்குவார்.

³¹இந்த விசுவாசத்தினால் நியாயப்பிரமாணத்தை அவமாக்குகிறோமோ? ஒருபோதுமில்லை—நாம் நியாயப்பிரமாணத்தை உறுதிப்படுத்துகிறோம்.