உன்னதப்பாட்டு 4

4 ¹என் பிரியமே, நீ எவ்வளவு அழகாயிருக்கிறாய், நீ எவ்வளவு அழகாயிருக்கிறாய்! உன் முக்காட்டுக்குப் பின்னாலிருக்கிற உன் கண்கள் புறாக்கள். உன் தலைமயிர் கீலேயாத் மலைச்சரிவுகளில் இறங்கிவரும் வெள்ளாட்டு மந்தையைப் போலிருக்கிறது. ²உன் பற்கள் அப்பொழுதுதான் மயிர் கத்தரிக்கப்பட்டு, குளிப்பாட்டப்பட்டு ஏறிவரும் ஆட்டு மந்தையைப் போலிருக்கிறது; அவை ஒவ்வொன்றும் இரட்டைக் குட்டிகளைப் பெறுகிறது, அவற்றில் ஒன்றும் தன் குட்டியை இழந்துபோகவில்லை. ³உன் உதடுகள் சிவப்பு நூலைப் போலிருக்கிறது, உன் வாய் இனிமையானது. உன் முக்காட்டுக்குப் பின்னாலிருக்கிற உன் கன்னங்கள் மாதுளம்பழத்தின் பாதிகளைப் போலிருக்கிறது. ⁴உன் கழுத்து தாவீதின் கோபுரத்தைப் போலிருக்கிறது, அது வரிசை வரிசையான கற்களால் கட்டப்பட்டது; அதில் 1,000 கேடகங்கள் தொங்குகிறது, ஒவ்வொன்றும் வீரனுடைய கேடகம். ⁵உன் இரண்டு ஸ்தனங்களும் வெளிமானின் இரட்டைக் குட்டிகளாகிய இரண்டு மறியைப் போலிருக்கிறது, அவை லீலிமலர்களுக்குள்ளே மேய்கிறது. ⁶பொழுதுவிடிந்து நிழல்கள் ஓடிப்போகும்வரைக்கும், நான் வெள்ளைப்போளமலைக்கும் சாம்பிராணிக் குன்றுக்கும் போவேன். ⁷என் பிரியமே, நீ முழுவதும் அழகாயிருக்கிறாய்; உன்னில் ஒரு குற்றமும் இல்லை.

⁸என் மணவாளியே, லீபனோனிலிருந்து என்னோடேகூட வா; லீபனோனிலிருந்து என்னோடேகூட வா. ஆமானாவின் சிகரத்திலிருந்தும், சேனீர் எர்மோனின் சிகரத்திலிருந்தும், சிங்கங்களின் குகைகளிலிருந்தும், சிறுத்தைகள் தங்கும் மலைகளிலிருந்தும் கீழே பார். ⁹என் சகோதரியே, என் மணவாளியே, நீ என் இருதயத்தைக் கவர்ந்துகொண்டாய்; உன் கண்களின் ஒரே பார்வையினாலும், உன் கழுத்தணியின் ஒரே இரத்தினத்தினாலும் நீ என் இருதயத்தைக் கவர்ந்துகொண்டாய். ¹⁰என் சகோதரியே, என் மணவாளியே, உன் நேசம் எவ்வளவு அழகாயிருக்கிறது! உன் நேசம் திராட்சரசத்தைப் பார்க்கிலும் எவ்வளவு நல்லது, உன் பரிமளதைலங்களின் வாசனை சகல வாசனைப் பொருள்களைப் பார்க்கிலும் எவ்வளவு நல்லது! ¹¹என் மணவாளியே, உன் உதடுகள் தேன்துளிகளை ஒழுகவிடுகிறது; தேனும் பாலும் உன் நாவின்கீழ் இருக்கிறது; உன் வஸ்திரங்களின் வாசனை லீபனோனின் வாசனையைப் போலிருக்கிறது.

¹²என் சகோதரியாகிய மணவாளி பூட்டப்பட்ட தோட்டம், அடைக்கப்பட்ட நீரூற்று, முத்திரையிடப்பட்ட ஊற்று. ¹³உன் தளிர்கள் உயர்ந்த கனிகளையுடைய மாதுளம்பழத் தோப்பு; மருதோன்றியும் நளதமும், ¹⁴நளதமும் குங்குமப்பூவும், வசம்பும் லவங்கப்பட்டையும், சகலவித சாம்பிராணி மரங்களும், வெள்ளைப்போளமும் அகிலும், சகல உயர்ந்த வாசனைப் பொருள்களும் உண்டு. ^a a v14 வசம்பு ஒரு நறுமணமுள்ள வாசனைப் பொருளாகப் பயன்படுத்தப்படும் இனிய வாசனையுள்ள நாணல். ¹⁵நீ தோட்டங்களின் நீரூற்று, ஜீவத்தண்ணீரின் கிணறு, லீபனோனிலிருந்து ஓடிவரும் நீரோடைகள். ¹⁶வாடைக் காற்றே, விழித்தெழு; தென்றல் காற்றே, வா! என் தோட்டத்தின்மேல் ஊது, அதன் வாசனைப் பொருள்கள் வழிந்தோடட்டும். என் நேசர் தம்முடைய தோட்டத்திற்குள் வந்து, அதின் உயர்ந்த கனிகளைப் புசிப்பாராக.