Ɔko Si Israel ne Filistifo Ntam
Yonatan to hyɛ asraafo nsraban bi so, Filistifo boaboa wɔn ho ano ne nteaseɛnam a wontumi nkan, na Israel kɔhintaw abodan mu, a wonni atomfo biara a ɔbɛbɔ akofena. Saul hu sɛ n'asraafo regu, na ɔno ankasa bɔ afɔre no sen sɛ ɔbɛtwɛn. Wanni n'Agya ahyɛde so; n'ahenni rentra hɔ.
13 1Bere a Saulo bɛyɛɛ ɔhene no, na wadi mfe aduasa, na odii Israel so hene mfe aduanan abien. a a v1 Akontaahyɛde a ɛwɔ nkyekyem yi mu no ayera afi Hebri kasa no mu, na ɛkenkan se, “Saulo dii afe baako… na odii hene mfe abien.” Akontaahyɛde a ɛwɔ ha no di nea Bible foforo dodow no ara kenkan no akyi. 2Saulo yii Israelfo 3,000: 2,000 ka ne ho wɔ Mikmas ne Betel bepɔw asase so, na 1,000 ka Yonatan ho wɔ Gibea a ɛwɔ Benyamin. Ɔmaa nkurɔfo a wɔaka no kɔɔ fie, obiara kɔɔ ne ntamadan mu. 3Yonatan kunkum Filistifo asraafo a wɔwɔ Geba no, na Filistifo no tee. Afei Saulo hyɛn torobɛnto wɔ asase no so nyinaa se, “Hebrifo ntie!” 4Israel nyinaa tee sɛ Saulo akunkum Filistifo asraafo no, na Israel abɛyɛ akyiwade ama Filistifo. Enti nkurɔfo no boaa wɔn ho ano kɔɔ Saulo nkyɛn wɔ Gilgal. 5Filistifo boaa wɔn ho ano sɛ wɔne Israel bɛko—nteaseɛnam 3,000, apɔnkɔsotefo 6,000, ne asraafo a wɔdɔɔso te sɛ mpoano nwea a wontumi nkan. Wɔforoo kɔbɔɔ nsraban wɔ Mikmas, Bet-Awen apuei fam. 6Bere a Israel mmarima no huu sɛ wɔwɔ ɔhaw mu—na wɔhyɛ nkurɔfo no so denneennen—no, wɔkɔtetɛ wɔ abodan mu, nkwaa mu, abotan mu, amoa mu ne nsukorabea mu. b b v6 Nsukorabea yɛ amoa a wɔatwa wɔ abotan mu wɔ fam a wɔde boaboa osu nsu ano kora. 7Hebrifo binom mpo twa Yordan kɔɔ Gad ne Gilead asase so. Nanso Saulo traa Gilgal, na nkurɔfo no nyinaa de ahopopo dii nʼakyi.
Saulo Yɛ Ade a Ɛnyɛ Agya no Asɛm
8Ɔtwɛn nnanson, bere a Samuel hyɛe no; nanso Samuel amma Gilgal, na nkurɔfo no hwetee fii ne ho. 9Saulo kae se, “Momfa ɔhyew afɔre ne asomdwoe afɔre no mmrɛ me.” Na ɔbɔɔ ɔhyew afɔre no.
10Bere a ɔwiee ɔhyew afɔre no bɔ pɛ no, Samuel duruu hɔ, na Saulo fii adi kɔhyiaa no kyiaa no. 11Samuel bisaa se, “Dɛn na woayɛ yi?” Saulo buaa se, “Mihuu sɛ nkurɔfo no rehwete afi me ho, na woamma bere a wohyɛe no mu, na Filistifo no reboaboa wɔn ho ano wɔ Mikmas,
12enti mekae se, ‘Afei Filistifo no bɛba abɛko atia me wɔ Gilgal, na mennya nhwehwɛɛ yɛn Agya anim dom.’ Enti mehyɛɛ me ho bɔɔ ɔhyew afɔre no.”
13Samuel ka kyerɛɛ Saulo se, “Woayɛ nkwaseasɛm!” Ɔtoaa so se, “Woanni ahyɛde a wʼAgya de maa wo no so. Sɛ wodii so a, anka yɛn Agya bɛma wʼahenni atim wɔ Israel so daa. 14Nanso afei wʼahenni rentim. Yɛn Agya ahwehwɛ ɔbarima a ɔfata nʼakoma ama ne ho, na wayi no sɛ ne nkurɔfo so sodifo, efisɛ woanni nea ɔhyɛɛ wo no so.”
15Samuel fii Gilgal foro kɔɔ Gibea a ɛwɔ Benyamin. Saulo kan nkurɔfo a wɔka ne ho no—bɛyɛ mmarima 600.
Israel a Wonni Akode
16Saulo ne ne ba Yonatan ne nkurɔfo a wɔka wɔn ho no traa Geba a ɛwɔ Benyamin; na Filistifo no bɔɔ nsraban wɔ Mikmas. 17Afowfo fii Filistifo nsraban mu kuw abiɛsa. Kuw baako faa Ofra kwan so, wɔ Sual asase so; 18kuw baako nso faa Bet-Horon kwan so; na nea ɛto so abiɛsa faa ahye a ɛhwɛ Seboim Bon no so, kɔ sare no so. 19Wɔanhu odwumfo biara wɔ Israel asase nyinaa so, efisɛ na Filistifo no aka se, “Anyɛ saa a, Hebrifo no bɛbɔ akofena anaa mpeaw.” 20Enti Israel nyinaa sian kɔɔ Filistifo nkyɛn kɔsensɛn wɔn funtum dade, asɔsɔ, akuma ne nsɛsɛwa. 21Ka a na wotua no yɛ dwetɛ bɛyɛ ounse nkyem anan mu baako de sensɛn funtum dade, asɔsɔ ne nsoso, na bɛyɛ ounse nkyem awotwe mu baako de sensɛn akuma ne nkontebaa. c c v21 Nkontebaa yɛ dua tenten a dade a ano yɛ nnam wɔ ano, na wɔde wowɔ anantwi ma wɔnantew. 22Ɔko da no, wɔanhu akofena anaa peaw biara wɔ nkurɔfo a wɔka Saulo ne Yonatan ho no nyinaa mu; Saulo ne ne ba Yonatan nkutoo na na wɔwɔ bi.
23Filistifo asraafo kuw bi fii adi kɔɔ Mikmas kwan a ɛfa mmepɔw ntam no so.
