Biribiara Wɔ Ne Bere
Biribiara wɔ ne bere, awo ne owu, ɔko ne asomdwoe, na obiara ntumi nte nea Onyankopɔn ayɛ nyinaa ase, ɛwom sɛ ɔde daapem ahyɛ nnipa koma mu de. Porɔwee tra baabi a ɛsɛ sɛ atɛntrenee tra. Nnipa ne mmoa home ahome koro na wɔkyɛ ɔda koro.
3 1Biribiara wɔ ne bere, na asɛm biara a ɛwɔ ɔsoro ase nso wɔ ne bere: 2bere a wɔwo onipa, ne bere a onipa wu; bere a wɔdua, ne bere a wotu nea wɔadua; 3bere a wokum, ne bere a wɔsa yare; bere a wobubu, ne bere a wosi; 4bere a wosu, ne bere a wɔserew; bere a wodi awerɛhow, ne bere a wosaw; 5bere a wotow abo gu, ne bere a woboaboa abo ano; bere a wɔyɛ atuu, ne bere a wɔkwati atuu; 6bere a wɔhwehwɛ, ne bere a wɔhwere; bere a wɔkora, ne bere a wotow gu; 7bere a wosunsuan, ne bere a wopam; bere a wɔyɛ komm, ne bere a wɔkasa; 8bere a wɔdɔ, ne bere a wɔtan; bere a wɔko ɔko, ne bere a asomdwoe wɔ hɔ.
9Mfaso bɛn na odwumayɛfo nya fi ne brɛ mu? 10Mahu adwuma a Onyankopɔn de ama nnipa sɛ wɔmfa wɔn ho nhyɛ mu no. 11Ɔyɛɛ biribiara fɛfɛ wɔ ne bere mu, na ɔde daa hyɛɛ onipa koma mu—nanso obiara ntumi nhu nea Onyankopɔn ayɛ fi mfiase kosi awiei. 12Minim sɛ biribiara nni hɔ a eye mma wɔn sen sɛ wɔbɛdi ahosɛpɛw na wɔayɛ papa bere a wɔte ase no. 13Afei nso, sɛ obiara bedidi, anom, na nʼani agye wɔ nʼadwuma nyinaa mu no—eyi yɛ Onyankopɔn akyɛde. 14Minim sɛ nea Onyankopɔn yɛ biara tim hɔ daa; wɔntumi mfa biribiara mmata ho, na wɔntumi nyi biribiara mfi mu. Ɔyɛɛ saa sɛnea ɛbɛyɛ a nnipa bɛsuro wɔ nʼanim. 15Nea ɛwɔ hɔ seesei no, ɛno na ɛwɔ hɔ dedaw, na nea ɛbɛba no, ɛno na ɛwɔ hɔ dedaw; na Onyankopɔn hwehwɛ nea wɔapam no.
Amumɔyɛ Wɔ Atemmu Beae
16Mahu bio nso wɔ owia ase sɛ: amumɔyɛ wɔ atemmu beae, na amumɔyɛ wɔ trenee beae. 17Mekaa wɔ me koma mu se, “Onyankopɔn bebu ɔtreneeni ne omumɔyɛfo atɛn, efisɛ bere wɔ hɔ ma asɛm biara ne nneyɛe biara, wɔ hɔ.” 18Mekaa wɔ me koma mu se, “Onyankopɔn sɔ nnipa hwɛ, sɛnea ɛbɛyɛ a wobehu sɛ wɔyɛ mmoa kɛkɛ.” 19Nnipa ne mmoa nya awiei koro: sɛnea baako wu no, saa ara na ɔfoforo nso wu; wɔn baanu nyinaa home ahome koro. Onipa nni mfaso biara nsen aboa—biribiara yɛ huhuw. 20Wɔn nyinaa kɔ baabi koro; wɔn nyinaa fi mfutuma mu, na wɔn nyinaa san kɔ mfutuma mu. 21Hena na onim sɛ onipa honhom kɔ soro, na sɛ aboa honhom sian kɔ fam asase mu? 22Enti mihuu sɛ biribiara nni hɔ a eye sen sɛ onipa ani bɛgye nʼadwuma ho, efisɛ ɛno ne ne kyɛfa. Efisɛ hena na obetumi akyerɛ no nea ɛbɛba wɔ nʼakyi?
