Aaron Mmabarima
Wɔkan Lewifo abusua biara, na wɔde wɔn ma sɛ wɔnwɛn na wɔnsoa ntamadan no. Yɛn Agya fa wɔn ma ne ho sɛ wɔsi Israel abakan ba barima biara anan mu, na wɔde dwetɛ a wɔde ma asɔfo no gye abakan 273 a wɔboro so no.
Yɛn Agya kasa wɔ nkyekyɛmu ahorow 6–10, 12–13, 15, 40–41, 45–48
3 1Yei ne Aaron ne Mose abusua, bere a yɛn Agya ne Mose kasaa wɔ Sinai Bepɔ so no. 2Aaron mmabarima din ni: Nadab a ɔyɛ abakan no, afei Abihu, Eleasar ne Itamar. 3Yeinom ne Aaron mmabarima din, asɔfo a wɔasra wɔn ngo a Mose hyɛɛ wɔn sɛ wɔnyɛ asɔfo adwuma no. 4Nadab ne Abihu wuwui wɔ yɛn Agya anim wɔ Sinai sare so, bere a wɔde ogya a wɔmmaa ho kwan bɔɔ afɔre wɔ nʼanim no; na wonni mma. Enti Eleasar ne Itamar yɛɛ asɔfo adwuma wɔ wɔn agya Aaron anim.
5Afei yɛn Agya ka kyerɛɛ Mose se:
6“Fa Lewi abusuakuw no bra, na fa wɔn si ɔsɔfo Aaron anim, na wɔnsom no. 7Ɛsɛ sɛ wɔhwɛ nʼadwuma ne asafo no nyinaa adwuma so wɔ Ahyiae Ntamadan no anim, na wɔyɛ ntamadan no som adwuma. 8Ɛsɛ sɛ wɔwɛn Ahyiae Ntamadan no nnwinnade nyinaa, na wɔyɛ Israelfo adwuma, na wɔyɛ ntamadan no som adwuma. 9Fa Lewifo no ma Aaron ne ne mmabarima; wɔde wɔn ama no koraa afi Israelfo mu. 10Yi Aaron ne ne mmabarima sɛ wɔnhwɛ wɔn asɔfodwuma so; ananafo biara a ɔbɛbɛn hɔ no, ɛsɛ sɛ owu.”
11Afei yɛn Agya ka kyerɛɛ Mose se:
12“Hwɛ, mayi Lewifo no afi Israelfo mu asi abakan biara a ɔbue awotwaa ano wɔ Israelfo mu no ananmu. Lewifo no yɛ me dea. a a v12 Lewifo no si Israel mmabarima abakan ananmu, wɔn a mfiase no wɔyii wɔn sii hɔ maa Onyankopɔn, bere a ɔkunkum Misraim abakan wɔ bere a wofii Misraim no (hwɛ Exodus 13:2). 13Abakan biara yɛ me dea. Da a mekunkum abakan biara wɔ Misraim no, meyii abakan biara wɔ Israel sii hɔ maa me ho—onipa ne aboa nyinaa. Wɔbɛyɛ me dea. Mene mo Agya.”
14Afei yɛn Agya ka kyerɛɛ Mose wɔ Sinai sare so se:
15“Kan Lewi mma sɛnea wɔn agyanom fi ne wɔn mmusua te; kan ɔbarima biara a wadi bosome baako na ɔboro saa.”
16Enti Mose kan wɔn sɛnea yɛn Agya asɛm te, sɛnea wɔhyɛɛ no no.
17Lewi mmabarima din ni: Gerson, Kohat ne Merari. 18Gerson mmabarima din ni sɛnea wɔn mmusua te: Libni ne Simei. 19Kohat mmabarima sɛnea wɔn mmusua te: Amram, Izhar, Hebron ne Usiel. 20Merari mmabarima sɛnea wɔn mmusua te: Mahli ne Musi. Yeinom ne Lewifo mmusua sɛnea wɔn agyanom fi te.
21Gerson mu na Libnifo abusua ne Simeifo abusua fi—yeinom ne Gersonfo mmusua. 22Mmarima a wɔkan wɔn, wɔn a wɔadi bosome baako anaa wɔboro saa no, dodow yɛ 7,500.
23Gersonfo mmusua no sisii wɔn nsraban wɔ ntamadan no akyi wɔ atɔe fam. 24Gersonfo agyanom fi no kandifo ne Lael babarima Eliasaf. 25Gerson mmabarima hwɛɛ ntamadan no, ne ntamabammɔ, ne nkataho ne Ahyiae Ntamadan no kwan ano ntama so wɔ Ahyiae Ntamadan no ho. 26Adiwo no ntama ne ne kwan ano ntama a ɛtwa ntamadan no ne afɔremuka no ho hyia, ne ne ntampehama a wɔde yɛ ne som adwuma nyinaa.
27Kohat mu na Amramfo abusua, Izharfo abusua, Hebronfo abusua ne Usielfo abusua fi; yeinom ne Kohatfo mmusua. 28Mmarima a wɔadi bosome baako na wɔboro saa no dodow yɛ 8,600, na wɔhwɛ kronkronbea no so.
29Kohat mmabarima mmusua no sisii wɔn nsraban wɔ ntamadan no anafo fam. 30Kohatfo mmusua no agyanom fi kandifo ne Usiel babarima Elisafan. 31Wɔhwɛɛ Apam Adaka no, ɛpon no, kanea dua no, afɔremuka ahorow no, kronkronbea no nkuku a wɔde som no, ntama a wɔde kyekyɛ mu no ne ne nnwuma nyinaa so. 32Ɔsɔfo Aaron babarima Eleasar yɛ Lewifo kandifo panyin, na ɔhwɛ wɔn a wɔwɛn kronkronbea no so.
33Merari mu na Mahlifo abusua ne Musifo abusua fi—yeinom ne Merari mmusua. 34Mmarima a wɔkan wɔn, wɔn a wɔadi bosome baako anaa wɔboro saa no, dodow yɛ 6,200.
35Merarifo mmusua agyanom fi kandifo ne Abihail babarima Suriel; wɔsisii wɔn nsraban wɔ ntamadan no atifi fam. 36Wɔde ntamadan no nsɛnnua, nnwemmaa, nnyinaso, nnyinasonnae, ne nnwinnade nyinaa ne ne som adwuma nyinaa hyɛɛ Merari mmabarima nsa, 37ne adiwo a atwa ho ahyia no nnyinaso ne wɔn nnyinasonnae, nnaadewa ne ntampehama.
38Wɔn a wɔsisii wɔn nsraban wɔ ntamadan no apuei fam, Ahyiae Ntamadan no anim wɔ owia apuei fam no ne Mose, Aaron ne ne mmabarima, wɔn a wɔhwɛɛ kronkronbea no so maa Israelfo no; ananafo biara a ɔbɛbɛn hɔ no, ɛsɛ sɛ wokum no. 39Lewifo a Mose ne Aaron kan wɔn sɛnea yɛn Agya hyɛe no nyinaa, sɛnea wɔn mmusua te, mmarima biara a wadi bosome baako na ɔboro saa: 22,000.
Abakan Ho Agyede
40Afei yɛn Agya ka kyerɛɛ Mose se, “Kan Israel mmarima abakan biara a wadi bosome baako anaa ɔboro saa, na kyerɛw wɔn din dodow. 41Yi Lewifo no ma me—Mene mo Agya—si abakan biara a ɔwɔ Israelfo mu no ananmu, na yi Lewifo no mmoa si abakan biara a ɛwɔ Israelfo mmoa mu no ananmu.”
42Enti Mose kan abakan biara a ɔwɔ Israelfo mu, sɛnea yɛn Agya hyɛɛ no no. 43Mmarima abakan a wɔadi bosome baako anaa wɔboro saa nyinaa, a wɔkyerɛw wɔn din: 22,273.
44Afei yɛn Agya ka kyerɛɛ Mose se:
45“Yi Lewifo no si abakan biara a ɔwɔ Israelfo mu no ananmu, na yi Lewifo no mmoa si wɔn mmoa ananmu. Lewifo no bɛyɛ me dea. Mene mo Agya. 46Na woagye Israel abakan 273 a wɔboro Lewifo no dodow no. 47Gye bɛyɛ ounse 2 fi obiara hɔ, sɛnea kronkronbea no susude te (susude biara bɛyɛ dwetɛ ounse fa). 48Fa sika no ma Aaron ne ne mmabarima sɛ agyede ka ma mmabarima abakan a wɔboro so no.”
49Enti Mose gyee agyede sika no fii mmabarima abakan a wɔboro Lewifo no dodow so no hɔ; 50ɔgyee 1,365 fii Israel mmabarima abakan hɔ—bɛyɛ ounse 2, sɛnea kronkronbea no susude te. 51Mose de agyede sika no maa Aaron ne ne mmabarima, sɛnea yɛn Agya asɛm te, sɛnea yɛn Agya hyɛɛ Mose no.
