Ahonyade Ntumi Mfa Wo Nkɔ Fie

Ma dwonkyerɛfo no. Kora mma no dwom.

Abebuo a wɔde ato adefo ne ahiafo nyinaa anim: obiara nni ahonya a ɛdɔɔso sɛ ɔde begye ne nua afi owu mu. Onyansafo ne ɔkwasea nyinaa gyaw wɔn sika hɔ saa ara. Odwontofo no anidaso wɔ baabi foforo — yɛn Agya begye no akɔ ne nkyɛn.

Ti 49.

Montie yei, amanaman nyinaa; monyɛ aso, mo a mote wiase nyinaa, nnipa nketewa ne akɛse, adefo ne ahiafo nyinaa. Mʼano bɛka nyansa; mʼakoma mu adwene bɛde ntease aba. Mɛyɛ mʼaso ama abebu bi; mede sanku bɛkyerɛ me kasakoa no ase. Adɛn nti na ɛsɛ sɛ misuro bere a nna bɔne ba no, bere a wɔn a wɔpɛ sɛ wɔtwa me hwe no amumɔyɛ twa me ho hyia no, wɔn a wɔde wɔn ho to wɔn ahonyade so na wɔde wɔn ahode bebree hoahoa wɔn ho no? Nokware, obiara ntumi nnye ne nua nkwa, anaa ontumi ntua ne ho ka mma yɛn Agya, nkwa ho akatua bo yɛ den; akatua biara nnɔɔso da, sɛnea ɛbɛyɛ a ɔbɛtena ase daa na ɔrenhu ɔda da. Efisɛ ohu sɛ anyansafo mpo wuwu; nkwasea ne wɔn a wonni adwene nyinaa yera, na wogyaw wɔn ahonyade ma afoforo. Wɔn nna ne wɔn afie daa, wɔn atenae ma awo ntoatoaso nyinaa, ɛwom sɛ na wɔde wɔn ankasa din atoto nsase so de. Onipa, ɛmfa ho ne nidi kɛse no, ɔntena hɔ nkyɛ; ɔte sɛ mmoa a wɔyera no. Yei ne wɔn a wɔde wɔn ho to nkwaseasɛm so no kwan, ne wɔn a wodi wɔn akyi a wɔpene wɔn nsɛm so no de.

Wɔahyɛ wɔn ato hɔ ama ɔda te sɛ nguan, na owu bɛyɛ wɔn hwɛfo. Atreneefo bedi wɔn so anɔpa; wɔn nipadua bɛporɔw wɔ ɔda mu, akyirikyiri wɔ wɔn afie atenten no ho. Nanso yɛn Agya bɛgye me kra afi ɔda tumi mu; ampa ara ɔbɛfa me de me akɔ ne nkyɛn. ^a

Nsuro bere a obi di yiye nya ade no, bere a ne fi anuonyam kɔ soro no, efisɛ ɔremfa hwee nkɔ bere a owu no; nʼanuonyam renni nʼakyi nkɔ fam. Ɛwom sɛ bere a ɔte ase no ɔfrɛ ne ho nhyirafo— na nnipa kamfo wo bere a wudi yiye ma wo ho no, ɔbɛkɔka nʼagyanom awo ntoatoaso ho, wɔn a wɔrenhu hann no bio da. Onipa, ɛmfa ho ne nidi kɛse no, a onni ntease no, te sɛ mmoa a wɔyera no.