Bisi Kiseledi babaka lukanu lwa kusanda Tata wetu
Tavidi wáhyula batu boosu amana wásitula mukunzu wa Tata wetu, wuna basándaku, hana mutukumbila wa pha. Tangwa bangombi bidibwidi amana Uza wásimba mukunzu, wáfwila homa meni. Tavidi wákala yi makasi, buna yi woma, amana mukunzu wásala ku nzu ya Obedi-edomi — kwakuna kikanda kyásakumunwa.
13 1Tavidi wákutakana yi bapfumu ba mafunda yi ba khama, yi bapfumu boosu. 2Tavidi wázimbula kwena kibuka kyosu kya Kiseledi: «Yuka ni mboti bwenina kwena benu, amana yuka ni dyátuka kwena Tata wetu, tutumenu nsamu kyana kwena baphangi betu bana basadidi muna mahata moosu ma Kiseledi, yi kumosi yi bawu banganga Nzambi yi balefi bana benina muna mbanza za bawu yi muna mahata ma kudisila bibulu, ndangu bakutakana kwena betu. 3Tuvutulenu mukunzu wa Tata wetu kwena betu, mukuma katusándaku wawu muna bilumbu bya Sawulu.»
4Amana kibuka kyosu kyatámbwasa mu kusala bwabuna, mukuma dyambonikini bumboti kwena batu boosu.
5Tavidi wákhokisa bisi Kiseledi boosu, tuka ku Siholi wa Ngiphiti tii ku Lebo-Hamati, mu kunata mukunzu wa Tata wetu tuka ku Kiliyati-Yeyalimi.
6Tavidi yi bisi Kiseledi boosu bátombuka ku Bala, disongidila Kiliyati-Yeyalimi dyenina muna Yuta, mu kunata tuka kwakuna mukunzu wa Tata wetu, wuna wuzakadini hana thandu ya basyedibe, kuna basamuna khumbu yandi. 7Bánata mukunzu wa Tata wetu hana thandu ya mutukumbila wa pha, tuka ku nzu ya Abinadabi; Uza yi Ahiyo bawu batwadisi wawu. 8Tavidi yi bisi Kiseledi boosu básepha ku mesu ma Tata wetu yi ngolu za bawu zoosu, ni mikunga, zinzenze, zihapa, zindungu, bibende yi mimpungi.
9Buna bátula ku homa ya bule ya Kidoni, Uza wáyalumuna koku dyandi mu kusimba mukunzu, mukuma bangombi bádikhukula. 10Amana khabu za Tata wetu zálema kwena Uza, amana wámubeta kikuma kya kuyalumuna koku dyandi kwena mukunzu; wáfwa kwakuna ku mesu ma Tata wetu. 11Tavidi wáyuka khabu kikuma Tata wetu wábúdika kwena Uza, buna homa dina basi tela ni Peresi-Uza tii yi lelu. 12Tavidi wáyuka bweya bwa Tata wetu muna kilumbu kina, hanga wuzimbudi: «Abweti ngilendila kunata mukunzu wa Tata wetu kwena meni?» 13Buna Tavidi kanátaku mukunzu kwena mbanza ya Tavidi; wáwutotisa kwena nzu ya Obedi-Edomi, mwisi Ngati. 14Mukunzu wa Tata wetu wánanga kumosi yi biwutu bya Obedi-Edomi muna nzu yandi, ngonda tatu, amana Tata wetu wásambula biwutu bya Obedi-Edomi yi byosu bina kavwa.
