Tata wetu Wisi Heka Tavidi Kinunga Kyosu
Mazimbudila ma binunga—bisi Phila, Mowabi, Zoba, Alami, Edomi—ni makabu makwísa yi ndisu wáyidikwa kikuma kya nzu yina Tavidi kakatungaku. Ndinga yina yenina yi mfunu mbala zodi: Tata wetu wámuheka kinunga kwosu kuna kakala kwenda, amana wáyala mu masonga.
18 1Kunima dya mama, Tavidi wábedisila bisi Phila amana wábayala, amana wábonga Ngati yi mahata mandi mu koku kwa bisi Phila. 2Wábedisila mpe Mowabi, amana bisi Mowabi bákituka bisi lemvukila Tavidi amana bákala kumunata makabu.
3Tavidi wábedisila Hadadezeli kyamvu wa Zoba, tee ku Hamati, bu kakala kwenda zangula hamu dyandi tee ku nzadi Efalata. 4Tavidi wábonga kwena yandi mitukumbila mya phunda 1 000, bakwa baphunda 7 000, yi baphumbulu ba malu 20 000. Wátabula misinga mya malu ma baphunda boosu bana badatanga mitukumbila, kaasi wásisa baphunda bafwanini mu mitukumbila khama. 5Muna tangwa bisi Alami ba Tamasi bísa sadisa Hadadezeli kyamvu wa Zoba, Tavidi wáhonda bisi Alami 22 000. 6Tavidi wásya baphumbulu mu Alami-Tamasi; amana bisi Alami bákituka basadi bandi, bakála kumunata makabu. Amana Tata wetu wáheka Tavidi kinunga kwosu kuma kuna kakala kwenda. 7Tavidi wábonga nguba za wolu zina zakala nata bapfumu ba Hadadezeli amana wánata ku Yelusalemi. 8Mu Tibati yi Kuni, mbanza za Hadadezeli, Tavidi wábonga ndisu wa lawu lawu; muna wawu Solumoni wásala Yanga dya ndisu, makunzi, yi bilekwa bya ndisu.
9Muna tangwa Towu kyamvu wa Hamati wáyuka ni Tavidi wábedisila kibuka kyosu kya baphumbulu kya Hadadezeli kyamvu wa Zoba, 10wáthuma mwana wandi Hadolami kwena kyamvu Tavidi mu kumuheka mboti yi mu kusakumuna kikuma kánwana yi wábedisila Hadadezeli, wuna wakala nwana ndangu yi Towu. Hadolami wánata bilekwa bya mitindu myosu bya wolu, bya phalata, yi bya ndisu. 11Kyamvu Tavidi wánengina byawu kwena Tata wetu, kumosi yi phalata yi wolu bina kábonga kwena makanda moosu: Edomi, Mowabi, bisi Amoni, bisi Phila, yi Amaleki.
12Abisayi mwana wa Seluya wáhonda bisi Edomi 18 000 mu Beti dya Mungwa. 13Tavidi wásya baphumbulu mu Edomi; amana bisi Edomi boosu bákituka bisi lemvukila bandi, amana Tata wetu wáheka yandi kinunga kwosu kuma kuna kakala kwenda.
Tavidi Wuyala mu Mukanu yi Masonga
14Buna Tavidi wáyala ha thandu ya Kiseledi kyosu, amana wákala hangila mukanu yi masonga kwena batu bandi boosu. 15Yowabi mwana wa Seluya wákala pfumu wa kibuka kya baphumbulu; Yosafati mwana wa Ahiludi wákala musoniki wa mambu; 16Satoki mwana wa Ahitubi yi Ahimeleki mwana wa Abyatadi bákala banganga Nzambi; Savesa wákala musoniki; 17Benaya mwana wa Yeyoyada wákala twadisa bisi Keleti yi bisi Peleti; amana bana ba Tavidi bákala bapfumu ba theti bela-bela yi kyamvu. a a v17 Bisi Keleti yi bisi Peleti bákala baphumbulu ba kitata ba kutsinza kyamvu Tavidi; nanga bákala baphumbulu ba kinzenza ba kisalu.
