Minkheti mya maswekamu ma Tata wetu
Bisi Khoditu bisi fundisa bantumwa ba bawu hanga bapfumu bisi fundisa basadi ba bawu. Pholu wusi zimbula ni mfundusu yimosi yina yisongila yenina khembu ya Tata wetu tangwa Pfumu kakwísa, wusi songa nzala yandi mosi, mbeta yi kukonda nzu, amana wusi babambukisa ni yandi wababuta mu Musamu wa Bukheti, buna wusi sonika hanga tata.
4 1Lutubanzilenu hanga basadi ba Kidisitu yi minkheti mya maswekamu ma Tata wetu. 2Amana bulombi kwena minkheti ni bafweti bámonika ba kusila mbundu. 3Kaasi kwena meni kyeku kima kya mbuta yuka ni benu lumfundisa, holo yuka ni pfundusu ya batu yimfundisa. Meni-meni phi, yisiku difundisa. 4Mbazayiku kima kyambi ha thandu ya meni-meni, kaasi dyadi disiku kulungisa. Wuna wisi mfundisa yenina Pfumu wetu Yesu. 5Yihana ni lufundisaku ku thwala tsungi, ku thwala Pfumu wetu Yesu kakwísa. Yandi kakwísa monikisa mana masweki mu mudima amana kamonikisa kutendana kwena muna mbundu. Muna tangwa dina, kosu mutu katámbula khembu kwena Tata wetu.
6Baphangi bama, mambu mama mbati masokulwila meni-meni yi Apholosi kikuma kya benu, ndangu kwena betu lwalonguka ni lwaludikila mana másonama, amana ni lubwaku mu lulendu mu kukumisa mutu mosi ha thandu ya mukwawu. 7Mukuma nani wisi kukitula wa kuswaswana? Biki wenina byawu wawuna wátambulaku? Yuka ni wátambula byawu, biki wisi dikumisina hanga mutu wuna watambulaku?
8Buthwena lwenina phi yi byosu byolwazodini! Buthwena lwákituka bamvwama! Konda betu lwáyandika yala—yuka ni mu kyedika lwáyala, ndangu betu phi twayála hakimosi yi benu! 9Mukuma, mu thinu yama, Tata wetu wátumonikisa betu bathumwa hana tsuka, hanga batu bafundiswa ndola ya lufwa, mukuma twákituka kima kya kutala kwena tsi, banzyo yi batu. 10Betu twenina bilawu kikuma kya Kidisitu, kaasi benu lwenina badimuka mwena Kidisitu. Betu tulebakana, benu lwenina yi ngolu. Benu lukembiswa, betu tusafulwa. 11Tii yikuna tangwa dyadi, twenina yi nzala, yi kihwinya, tweku yi miledi, tufimbwa, amana tukondi nzu. 12Tubati sala ngolu ni moku ma betu-meni. Basafulwa, tubati sakumuna; banyokoswa, tubati kanga mbundu. 13Batusinga, tubati vutula mu talala. Twákituka kinkutudila kya tsi, mvindu ya batu boosu, tii yikuna lelu.
14Yisi lusonikina mambu mama ndangu yilukwatisa tsoni ku, kaasi ndangu yiluwengisa hanga bana bama batondama. 15Mbatanana lwenina yi bathwadisi ba lawu mwena Kidisitu, lweku yi batata ba lawu—meni, mu Musamu wa Bukheti, yílubuta benu mwena Kidisitu Yesu. a a v15 Pholu kisi vinganina Tata wetu ku; yandi wisi sala hanga kilekwa kya kimutu kina muna dyandi Tata wetu kabuta bana bandi muna dikanda. Musamu wa Bukheti wawu-meni wisi hanga mbutukulu. 16Yihana ni yikulubokila, kalenu bana bisi sokulula mbandu ya meni. 17Kikuma kya bwabuna, yilúhitika Thimoti, mwana wama watondama wa kusila mbundu mwena Pfumu—yandi kalubambukisa phila zama za kuzingilaka mwena Kidisitu Yesu, bwosu yisi longa muma mwosu, mu mabundu moosu. 18Batu bahika bábadidikisa nana mu lulendu, hanga meni yikwisaku kwena benu. 19Kaasi yikwísa kwena benu ka thama ku, yuka ni Pfumu wetu Yesu kazolabwa, amana yizaya heku ni lengu ndinga ya batu ba lulendu bana, kaasi ngolu za bawu. 20Mukuma Kipfumu kya Tata wetu kyeku kima kya lengu ndinga, kaasi kya ngolu. 21Biki lwenina luzodidi? Yikwísa yi mwani holo ni lungongu mu kitembu kya talala?
