Watheti wa Yowani 2 FHB Father's Heart Bible™

2 ¹Bana bama batondama, yilusonikini mambu mana ndangu lwasumukaku. Kaasi yuka ni mutu wásumuka, twenina yi mutu wuna wisi tuzonzila ku thwala ya Tata, disongidila Yesu Kidisitu, wuna wa masonga. ²Yandi meni kenina kimenga kya ndoluka ya masumu metu, heku ni ma betu mosi, kaasi phi ma tsi yosu. ^a a v2 Yesu kenina kimenga kina kisi fukidila masumu metu amana kisi katula ndola, heku ni kikuma kya babana basi kwikila mosi, kaasi kátambika kikuma kya tsi yosu. ³Mu dyadi twazaya ni tumuzayini: yuka ni twalunda mikuku myandi. ⁴Wuna wisi zonza: «Yimuzayini», amana kalundaku mikuku myandi, kenina kingumba, kyedika kyeninamwoku mwena yandi. ⁵Kaasi wuna wisi lunda ndinga yandi, lungongu lwa Tata wetu lwalungila kyedika mwena yandi. Mu dyadi twazaya ni twenina mwena yandi: ⁶Wuna wisi zonza ni kenina nangina mwena yandi, kafweti dyata bwosu buna yandi meni kádyatila.

⁷Banduku bama, yilusonikinibwoku mukuku wa pha, kaasi mukuku wa khulu, wuna lwátambula tuka ku luyandiku. Mukuku wa khulu wenina ndinga yina lwáyuka. ⁸Buthwena, yilusonikini mukuku wa pha, wuna wenina kyedika mwena yandi yi mwena benu, mukuma phipha yisi hita amana mwini wa kyedika wekina kenza. ⁹Wuna wisi zonza ni kenina mu mwini, amana kamengaka phangi wandi, kedi kenina mu phipha tii yi buthwena. ¹⁰Wuna wisi zola phangi wandi, kisi nangina mu mwini, amana mwena yandi mweku kisinza kya kudikhukula. ¹¹Kaasi wuna wisi menga phangi wandi, kenina mu phipha, kisi kangala mu phipha, kazayiku keti kwenda kwandi, mukuma phipha yáfidingima mesu mandi.

¹²Yilusonikini, bana bama, mukuma masumu menu malolukini kikuma kya khumbu yandi.

¹³Yilusonikini, batata, mukuma luzayi Wuna wenina tuka ku luyandiku. Yilusonikini, bangunza, mukuma lwánunga Mbi.

¹⁴Bana, yilusonikini mukuma luzayi Tata. Batata, yilusonikini mukuma luzayi Wuna wenina tuka ku luyandiku. Bangunza, yilusonikini mukuma lwenina ngolu, amana ndinga ya Tata wetu yisi zingila mwena benu, amana lwánunga Mbi.

Luzolaku Tsi

¹⁵Luzolaku tsi, keti kima kyosu kyenina mu tsi. Wosu wuna wisi zola tsi, lungongu lwa Tata lwisi nanginaku mwena yandi. ¹⁶Byosu bina byenina mu tsi—nzoluka za lutu, nzoluka za mesu, yi lulendu lwa luzingu—byisiku tuka kwena Tata, kaasi byisi tuka mu tsi. ¹⁷Tsi yi nzoluka zandi bisi hita, kaasi wuna wisi hanga luzolu lwa Tata wetu, kisi zingila mu kimakulu.

Kebenu kwena Babana Basi Tuna Mwana

¹⁸Bana, yenina tangwa dya tsuka. Bwosu lwáyuka ni Mutendi wa Kidisitu wisa kwisa, bwabu batendi ba Kidisitu balawu bakwísa; mu dyadi twazaya ni yenina tangwa dya tsuka. ^b b v18 «Mutendi wa Kidisitu» disongidila «wisi tendisa» holo «wisi vingila vuma kya» Kidisitu. Yowani wusongidila ni wenina mutu wosu wuna wisi tuna ni Yesu kenina Kidisitu (2:22); batu balawu bakwísa kala, bana basi twadiswa kwena kitembu kya Mutendi wa Kidisitu (4:3). ¹⁹Bátuka mwena betu, kaasi bakalaku ba betu; yuka ni bakala ba betu, bakala nangina hakimosi yi betu. Kaasi bálubuka, ndangu kamonika ni ka mutu mu bawu ku kákala wa betu. ²⁰Kaasi benu lwátambula masi ma kusita kwena Wuna Watoma, amana benu boosu luzayi kyedika. ²¹Yilusonikini heku ni mukuma luzayiku kyedika, kaasi mukuma luzayi kyawu, amana ka luvunu lumosi ku lwisi tuka mu kyedika. ²²Nati kenina kingumba, yuka heku ni wuna wisi tuna ni Yesu kenina Kidisitu? Yandi wenina Mutendi wa Kidisitu, wisi tuna Tata yi Mwana. ²³Wosu wuna wisi tuna Mwana, keku yi Tata; amana wosu wuna wisi tambwasa Mwana, yandi phi kenina yi Tata.

²⁴Benu, mana lwáyuka tuka ku luyandiku manangina mwena benu. Yuka ni mana lwáyuka tuka ku luyandiku manangina mwena benu, benu phi kalunangina mwena Mwana yi mwena Tata. ²⁵Amana kiki kyenina kilangi kina yandi meni kátusila: luzingu lwa mvula yi mvula.

²⁶Yilusonikini mambu mana kikuma kya babana basi sanda mu kuluzimbikisa. ²⁷Kaasi benu, masi ma kusita mana lwátambula kwena yandi, manangina mwena benu, amana ka mfunu ku wa mutu wa kulonga. Kaasi bwosu masi mandi ma kusita masi lulonga mu byosu—mana menina kyedika, heku ni luvunu—nanginakenu mwena yandi, bwosu malulongila.

²⁸Amana buthwena, bana bama, nanginakenu mwena yandi, ndangu tangwa kamonika, twakala yi kikumbwala amana twakwatukaku tsoni ku thwala yandi mu tangwa dya kwisa kwandi. ²⁹Yuka ni luzayi ni yandi kenina wa masonga, luzayi phi ni wosu wuna wisi hanga masonga, wábutuka mwena yandi.